«كۇلشە قىز» مۋزىكالىق ەرتەگىسى ورىس دراماتۋرگى ەۆگەني ششۆارتس پەن كومپوزيتور انتونيو سپاداۆەككيانىڭ «زولۋشكا» اتتى ەرتەگىسىنىڭ جەلىسىنەن الىنعان. شىعارمانى قازاق تىلىنە اۋدارعان – ەسىم سەگىزباەۆ. اتالعان ەرتەگىنىڭ قويۋشى رەجيسسەرى «ساحناگەر-2019» ۇلتتىق تەاتر سىيلىعىنىڭ يەگەرى, مۋزىكالىق جاس كورەرمەن تەاترىنىڭ اكتەرى ءارى رەجيسسەرى راسۋل ۋسمانوۆ. مۋزىكامەن ارلەگەن حالىقارالىق كونكۋرستاردىڭ لاۋرەاتى رۋسلان بايمۋرزين, قويۋشى حورەوگراف ۋاليتبەك سيازبەكوۆ جانە قويۋشى سۋرەتشى ءانۋار ساپيەۆ.
«بۇگىنگى پرەمەرا الەمگە تانىمال «كۇلشە قىز» ەرتەگىسى. ءبىزدىڭ ەرتەگىمىز جاي عانا ەرتەگى ەمەس – مۋزىكالىق ەرتەگى. ال سىزدەر ساباقتارىڭىزدى ويداعىداي اياقتاپ, كانيكۋلعا, جاقسى دەمالىسقا شىعاتىن كۇنگە جەتەيىك. كانيكۋلدا ءبىز سىزدەرگە تاعى دا كەرەمەت ەرتەگىلەردى دايىندايتىن بولامىز!» دەگەن تەاتر ديرەكتورى, قازاقستاننىڭ ەڭبەك سىڭىرگەن قايراتكەرى اسحات ماەميروۆ كىشكەنتاي كورەرمەندەردى جاڭا پرەمەرانىڭ اشىلۋىمەن قۇتتىقتادى.
مۋزىكالىق جاس كورەرمەن تەاترى «كۇلشە قىز» مۋزىكالىق ەرتەگىسى ارقىلى ونەر جولىنا قىزىعۋشىلىقپەن قارايتىن دارىندى جاسوسپىرىمدەر مەن بالالاردىڭ قيالىن قوزعاپ, ولاردى ونەرگە قىزىقتىرىپ, قاناتتاندىردى.
«تەاتر رەپەرتۋارىندا العاش رەت بالالارعا ارنالعان ورىس تىلىندەگى قويىلىم ساحنالانىپ وتىر. ءبىز وسى ەرتەگىدە باسقا تەاترلاردان وزگەشەلەۋ ەتىپ جاسادىق. قويىلىمدا پاراللەلدى ەشكىمگە كەدەرگىسىن تيگىزبەيتىن ەكى – ەرتەگىشىلەر دەگەن كەيىپكەرلەردى قوستىق. ولار سپەكتاكلدىڭ باسىنان سوڭىنا دەيىن ءجۇرىپ, اۆتور رەتىندە ۇلكەن ءرولدى جۇرگىزەدى. سونىمەن قاتار ساحناداعى ارتىستەر كورەرمەن بالالاردى ەرتەگى الەمىنە الىپ كەتۋ ءۇشىن بالالارمەن قارىم-قاتىناس جاساپ وتىرادى. سوندىقتان دا مەنىڭ ويىمشا ينتەراكتيۆتى تۋىندى دەپ ويلايمىن. الداعى ۋاقىتتا اعىلشىن تىلىندە ساحنالاۋ جوسپارىمىزدا بار. ءبىز قويىلىمعا ەكى اي ۋاقىت دايىندالدىق. ارتىستەر كەرەمەت ويناپ شىقتى. رەجيسسەر رەتىندە ارتىستەردىڭ ويىنىنا, ساحنانىڭ بەزەندىرىلۋىنە ريزامىن!», دەدى قويىلىمنىڭ رەجيسسەرى راسۋل ۋسمانوۆ.
«كۇلشە قىز» ەرتەگىسى – تەاترسۇيەر كوپشىلىككە بۇرىننان تانىس ايگىلى ەرتەگى. ونداعى ايتىلاتىن وي مەن وتەتىن وقيعا جاس كورەرمەننىڭ كوڭىلىن ەلىتىپ, قيالىنا قانات بىتىرەتىنى ءسوزسىز. اناسىنان ەرتە ايىرىلعان كۇلشە قىزدىڭ ءومىرى بىردە ايانىشتى بولسا, ەندى بىردە عاجايىپ وقيعالارمەن الماسىپ وتىرادى. ونىڭ وگەي شەشەسى مەن ودان تۋعان ەكى اپكەسى ءارتۇرلى قيسىنسىز ارەكەتتەرىمەن كۇلشە قىزدى تەك ءۇي جۇمىستارىنا سالىپ قويعىسى كەلەدى. الايدا باق تا, باقىت تا ماڭدايىڭا جازىلعان بولسا, وعان كەدەرگى بولاتىن كۇش-قايرات جوق. «كۇلشە قىز» ەرتەگىسى وسىنداي ويلاردىڭ, اق پەن قارانىڭ, شىندىق پەن قياناتتىڭ اراسىنداعى قاقتىعىستاردى سۋرەتتەپ, كورەرمەندى تاعدىردىڭ تىلسىم جولدارىندا وتەتىن تاڭعاجايىپ وقيعالارعا قاراي جەتەلەيدى. ەرتەگىنىڭ تاربيەلىك ءمانى – كەز كەلگەن ادام الدىنان كەزدەسكەن قيىندىقتارعا شىداپ, مويىماسا, اقىرى ءبىر جاقسىلىققا كەز بولادى.
