ونەر • 18 مامىر، 2021

گۇلدەردىڭ سىرىن ۇققان...

19 رەت كورسەتىلدى

جۋىردا ەلباسى كىتاپحاناسىندا دارىندى سۋرەتشى انار ءابجانوۆانىڭ «الاتاۋ جاۋھارلارى» اتتى جەكە كورمەسى اشىلدى. بۇل مازمۇندى ءىس-شارا ەلباسى كىتاپحاناسىنىڭ جيناعىنداعى تانىمال اۆتورلاردىڭ شىعارماشىلىعىن ناسيحاتتاۋعا باعىتتالعان «تاۋەلسىزدىكتىڭ مادەني كودى» جوباسى اياسىندا ۇيىمداستىرىلدى.

تاقىرىپتىق كورمەگە قىلقالام شەبەرىنىڭ وتىزدان اسا جۇمىسى قويىلدى. سۋرەتشى تۋىندىلارىنان اۆتوردىڭ كاسىبي شەبەرلىگىن عانا ەمەس، ونىڭ تۋعان ولكەسىنە سۇيىسپەنشىلىگى مەن تابيعاتقا ىنتىزار شىنايى سەزىمىن دە بايقاۋعا بولادى. ول ءوز شىعارماشىلىعى ارقىلى ادامداردى تابيعاتتى باعالاۋ مەن قور­عاۋعا ۇندەيدى.

كورمەنىڭ اشىلۋىندا ەلباسى كىتاپ­حاناسىنىڭ ديرەكتورى باقىتجان تەمىربولات سۋرەتشىنىڭ ەڭبەكتەرىندە ەلباسىنىڭ « ۇلى دالانىڭ جەتى قىرى» ماقالاسىنىڭ مازمۇنى شىعارماشىلىق نەگىزدە كورىنىس تاۋىپ، ونەر تىلىندە بەينەلى سۋرەتتەلگەندىگىن اتاپ ءوتىپ، كورمە يەسىنە «نۇرسۇلتان نازارباەۆ. ءومىر­بايان» كىتابىن سىيلادى.

سونداي-اق ەلورداداعى ۇلتتىق مۋزەي ديرەكتورى ارىستانبەك مۇحامەدي ۇلى انار ءابجانوۆانىڭ شىعارماشىلىعىن جوعارى باعالاپ، ونىڭ ستۋدەنت كەزىندە حالىقارالىق دەڭگەيدەگى ءتۇرلى بايقاۋلاردا توپ جارعاندىعىن ءسوز ەتتى.

ال قىلقالام شەبەرىنىڭ ۇستازى، قازاقستان سۋرەتشىلەر وداعىنىڭ مۇشە­سى، كەسكىندەمەشى ارىستان سماعۇلوۆ شاكىرتىنىڭ ونەرىنە ءدان ريزا ەكەندىگىن ايتا كەلىپ:

– انار ءابجانوۆا سياقتى سۋرەتشىنىڭ قالىپتاسۋىنا ءوز ۇلەسىمدى قوسقانىمدى ماقتان تۇتامىن. جاس كەزىنەن ول ءوز شە­بەرلىگىن شىڭداپ، كوپ جۇمىس ىستەدى. تىنىمسىز ەڭبەگىنىڭ ارقاسىندا ەلىمىز­دەن تىس جەردە كورمەسى ءوتىپ ءجۇر. انار – وتە ەڭبەكقور، تالانتتى جان. وعان تەك تابىس تىلەيمىن، − دەدى ول.

جالپى سۋرەتشىنىڭ شىعارماشى­لىعىندا گۇلدەر بەينەسى – قىسقى جانە قالالىق پەيزاجدارمەن ەرەكشە ورىن الادى. ونىڭ ايتۋىنشا، ەلىمىزدە وسە­تىن قىزعالداقتار تاقىرىبىنا ار­­نالعان سۋرەت توپتاماسىن جاساۋ يدەيا­سىنا ەلباسىنىڭ « ۇلى دالانىڭ جەتى قىرى» ماقالاسى شابىت بەرگەن. اتالعان ماقالادا نۇرسۇلتان نازارباەۆ قازاق­ستان الما مەن قىزعالداقتىڭ تاريحي وتانى ەكەنىن اتاپ وتكەن. ەل تا­­ۋەل­سىزدىگىنىڭ وتىز جىلدىعى اياسىن­­دا ەلباسىنىڭ باعدارلامالىق ماقالا­سىنىڭ مازمۇنى «بۇكىل الەم ءۇشىن وزىندىك ءمان-ماڭىزى زور» قىزعالداقتارعا ارنالعان جۇمىستاردىڭ جارىق كورۋىنە مۇرىندىق بولدى. قازاقستاننىڭ تۇڭعىش پرەزيدەنتى «وسىمدىكتەر الەمى­نىڭ جاۋھارى» اتاعان گرەيگ قىزعالداق­تارىنىڭ اسەمدىگى انار ءابجانوۆانى ىلە الاتاۋىنا شىققان كەزدە تاڭعالدىرعان. گرەيگ قىزعالداقتارى بەينەلەنگەن جۇمىس توپتاماسى رەگەل، كولپاكوۆسكي قىز­عالداقتارىنىڭ سۋ­رەتتەرىمەن تولىق­تىرىلعان.

بيىل سۋرەتشىنىڭ شىعارماشىلىعىنا 20 جىل تولىپ وتىر.

– تاۋلاردا وسەتىن قىزعال­داق­تاردىڭ گۇلدەگەن ءساتىن ەكىنىڭ ءبىرى كورە المايدى. بۇل سيرەك كەزدەسەتىن قۇ­بىلىس. سۇلۋلىعىنا ءتىل جەتپەيدى. مەن وسى كەرەمەتتى كورىپ، قاعازعا تۇ­سىرە الدىم. تابيعاتتىڭ ءوزى ماعان سەنىم ارتقانداي. ءوز سۋرەتتەرىم ار­قىلى تابيعاتقا، ونىڭ بىرە­گەي سۇ­لۋ­لىعىنا ۇقىپتى قاراۋدى ناسيحات­تاعىم كەلەدى. قىزىل كىتاپقا ەنگەن وسىم­­دىكتەردى جويماي، كەرىسىنشە ساق­تاپ قالۋدى سۇرايمىن، – دەيدى انار ءابجانوۆا.

سونىمەن قاتار كورمە اياسىندا سۋرەت­شىنىڭ شەبەرلىك-سىنىبى مەن اۆتوگراف-سەسسياسى ۇيىمداستىرىلدى.

سوڭعى جاڭالىقتار

ىندەتپەن كۇرەستە ىركىلمەگەن مامان

كوروناۆيرۋس • بۇگىن، 08:34

ارمانىنا جەتكەن جان

رۋحانيات • بۇگىن، 08:30

وتانشىلدىق – تاۋەلسىزدىك تىرەگى

رۋحانيات • بۇگىن، 08:16

العىس ارقالاعان جاناشىر جاندار

مەديتسينا • بۇگىن، 08:01

حەم اعاي

ادەبيەت • كەشە

نەسيە كورسەتكىشى ارتتى

ەكونوميكا • كەشە

ۇقساس جاڭالىقتار