جاڭادان پايدالانۋعا بەرىلەتىن اۆتوماگيسترالداردىڭ قاتارىندا: شىمكەنت – وزبەكستان شەكاراسى, ورال – رەسەي فەدەراتسياسىنىڭ شەكاراسى (ساراتوۆ), ورال – رەسەي شەكاراسى (سامارا), ورىنبور – اقتوبە, ششۋچينسك-پەتروپاۆل, شىمكەنت – قىزىلوردا, شىمكەنت – تاراز, تاراز – قاينار, قاپشاعاي – تالدىقورعان, قارابۇتاق – قىزىلوردا, اقتوبە – ورال, اتىراۋ – بەينەۋ – وزبەكستان شەكاراسى, اقتاۋ – بەينەۋ, قوستاناي – رەسەي شەكاراسى (ترويتسك), نۇر-سۇلتان – قوستاناي, پاۆلودار – رەسەي شەكاراسى (ومبى), نۇر-سۇلتان – پاۆلودار, پاۆلودار – سەمەي – قالباتاۋ ۋچاسكەلەرى بار.
بۇل ۋچاسكەلەرمەن جۇرەتىن اۆتوكولىكتەردەن قانشا تولەماقى الىناتىنى تاس جولدىڭ تەحنيكالىق ساناتىنا تىكەلەي بايلانىستى. ماسەلەن, ءى تەحنيكالىق ساناتتاعى تاس جولداردا بارلىق اۆتوكولىكتەن, ال ءىى جانە ءىىى تەحنيكالىق ساناتتاعى تاس جولداردا تەك جۇك كولىكتەرىنەن تولەم الىنادى.
«QazAvtoJol» ۇك» اق حابارلاماسىنا سۇيەنسەك, العاشقى اقىلى ۋچاسكە ەنگىزىلگەن كەزدەن باستاپ, بۇگىنگە دەيىن جول تاريفتەرىنە وزگەرىس ەنگىزىلمەگەن. ال جاڭا اقىلى ۋچاسكەلەردە تولەم مولشەرلەمەسى قانداي بولاتىنىن يندۋستريا جانە ينفراقۇرىلىمدىق دامۋ مينيسترلىگى قاراستىرىپ جاتىر. بىراق جولدارعا سىناق مەرزىمى جۇرگىزىلگەن كەزدە اۆتوكولىكتەردەن ازىرشە تولەم الىنبايدى, دەيدى ماماندار.
مەملەكەتتىك باعدارلامانى جۇزەگە اسىرۋ بارىسىندا يندۋستريا جانە ينفراقۇرىلىمدىق دامۋ مينيسترلىگى مەن «QazAvtoJol» ۇك» اق بىرلەسىپ, تولەم الۋدىڭ «اشىق جۇيەسىن» ەنگىزبەكشى. ونىڭ ەرەكشەلىگى, ۋچاسكەلەردە شلاگباۋمدار بولمايدى. اۆتوكولىكتەردىڭ ءجۇرىپ وتكەن جولى تۋرالى اقپاراتتار اركالاردا ورنالاسقان ارنايى كامەرالاردا تىركەلەدى.
تولەم اۆتوكولىكتىڭ مەملەكەتتىك تىركەۋ ءنومىرى بويىنشا جۇرگىزىلەدى. سونداي-اق تولەماقى مەن اۆتوكولىك تۋرالى تولىق اقپارات الۋعا مۇمكىندىك بەرەتىن ارنايى بەلگىلەردى (RFID-بەلگى) ورناتۋ دا جوسپاردا بار.
اقىلى ۋچاسكەلەردىڭ كوبەيۋى جۇرگىزۋشىلەر مەن جولاۋشىلاردىڭ قاۋىپسىزدىگىن قامتاماسىز ەتەدى, جول-كولىك اپاتى ازايادى, جول ينفراقۇرىلىمى داميدى, دەيدى ماماندار.
«QazAvtoJol» ۇك» اق ءباسپاسوز قىزمەتىنىڭ مالىمەتى بويىنشا, جولدار قايتا جاڭعىرتىلىپ, جوندەلگەننەن كەيىن كولىك اپاتى ازايعانى بايقالعان. مىسالى, قايتا جاڭارتۋ جۇمىستارىنان كەيىن «اقتوبە – ورال – رەسەي شەكاراسى» اۆتوجولىنداعى كولىك اپاتى 25%-عا, «نۇر-سۇلتان – پاۆلودار» اۆتوجولىندا 46%-عا, «قىزىلوردا – شىمكەنت – تاراز» اۆتوجولىندا 43%-عا, ال «پاۆلودار – سەمەي – قالباتاۋ» ۋچاسكەسىندە 62%-عا تومەندەپتى.
