جالپى بيىلعى جىل ەلىمىزدىڭ ءبىرىنشى راكەتكاسى ءۇشىن ءساتتى وتۋدە. ول قاڭتار ايىندا تۇركيانىڭ انتاليا قالاسىندا وتكەن اتر ءتۋرنيرىنىڭ اقتىق سىنىندا ونەر كورسەتتى. ودان كەيىن ەكى بىردەي ءدۇبىرلى دودانىڭ شيرەك فينالىنا دەيىن جەتتى. باسقا دا جارىستاردا جامان ويناعان جوق. مىنە, وسىنداي تابىستارىنىڭ ارقاسىندا الەكساندر بۋبليك ءوزىنىڭ سپورتتىق كارەراسىندا العاش رەت وسىنداي وتە جاقسى ناتيجەگە قول جەتكىزىپ وتىر. قازاقستاننىڭ تاعى ءبىر وكىلى ميحايل كۋكۋشكين «توپ-100» تەننيسشىنىڭ قاتارىنا قايتا ورالدى. قازىرگى كەزدە ول ۇزدىك جۇزدىكتى قورىتىندىلاۋدا.
ايەلدەر سايىسىندا وتانداستارىمىز اراسىنداعى ەڭ جاقسى كورسەتكىش ەلەنا رىباكيناعا تيەسىلى. 22 جاستاعى اسا دارىندى ويىنشى WTA تىزىمىندە 22 ورىندى يەلەنۋدە. ال يۋليا پۋتينتسەۆا 35 جانە زارينا دياس 93 ساتىلارعا جايعاستى.
بۇگىنگى تاڭداعى الەمدىك رەيتينگتىڭ كوشباسشىلارى جايىندا ايتار بولساق, اتر رەيتينگىندە سەربيالىق نوۆاك دجوكوۆيچ جەكە-دارا كوش باستاپ ءتۇر. ەكىنشى جانە ءۇشىنشى ورىندى رەسەيلىك دانيل مەدۆەدەۆ پەن يسپانيالىق رافاەل نادال ەنشىلەۋدە. WTA ءتىزىمىنىڭ العاشقى ۇشتىگىنە اۋستراليالىق ەشلي بارتي, جاپونيالىق ناومي وساكا جانە رۋمىنيالىق سيمونا حالەپ ەنىپ وتىر.
