ءىس-شاراعا جەرگىلىكتى تۇرعىنداردان جاساقتالعان ەرىكتىلەر تارتىلدى.
وسىنداي ءىس-شارالاردىڭ بىرىندە «توسقاۋىل» شەكارا ناريادى زاڭسىز اڭ اۋلاعان ازاماتتى ۇستادى. 9 مامىر كۇنى كەشكى 19:30-دار شاماسىندا بولعان قۇرىقتاۋ وپەراتسياسىنا «كولساي كولدەرى» مەملەكەتتىك ۇلتتىق تابيعي پاركىنىڭ قىزمەتكەرلەرى دە قاتىستى.
«قازاق-قىرعىز شەكاراسىنىڭ بويىندا جاتقان «كولساي كولدەرىنىڭ» اۋماعىن كۇزەتۋ مىندەتى جۇكتەلگەن «جالاڭاش» شەكارالىق ءبولىمىنىڭ ۋچاسكەسىندەگى مايبۇلاق ەلدى مەكەنىنىڭ اۋماعىندا قولعا تۇسكەن اڭشىدان تىركەلمەگەن «وپتيكالى بلايزەر» ماركىلى قارۋى مەن ونىڭ 20 وق-ءدارىسى تاركىلەندى. سونداي-اق كولىكتىڭ ارتقى جۇك سالعىشىنان مارالدىڭ ەتى مەن مۇيىزدەرى شىقتى», دەيدى ۇقك شەكارا قىزمەتىنىڭ زاپاستاعى پودپولكوۆنيگى تامارا داۋلەتباەۆا.
شەكارا ناريادى تاركىلەگەن زاتتار ايعاق رەتىندە كەگەن اۋداندىق پوليتسيا بولىمىنە تاپسىرىلدى. كەيىننەن بەلگىلى بولعانداي, شەكاراشىلاردىڭ قۇرىعىنان قۇتىلىپ كەتە الماعان ازامات مارالدى ءوزى اتىپ, سويىپ العانىن مويىندادى.
«كوزدىڭ جاۋىن الاتىن سۇلۋلىعىمەن تالايلاردى تامساندىرعان كولسايدىڭ ماڭايى كوكتەم شىعا دەمالۋشىلارعا تولىپ كەتەدى. الايدا شەكارا اۋماعى سانالعاندىقتان, مۇندا كەلۋشىلەردىڭ قۇجاتتارىن تەكسەرۋ – شەكاراشىلاردىڭ باستى مىندەتى. بۇل – ەڭ الدىمەن ەلىمىزدىڭ تابيعات اياسىندا سۇق كوزدەردەن قورعاۋعا تيگىزەر پايداسى ۇشان-تەڭىز», دەيدى تامارا داۋلەتباەۆا.
