ساحنا ونەرى ارقىلى كارانتيندىك, ساقتىق شارالارى مەن ۆاكتسينانىڭ ماڭىزدىلىعىنا حالىقتىڭ نازارىن اۋدارۋدى ماقسات ەتكەن سپەكتاكل تولىعىمەن ءومىرىمىزدىڭ قازىرگى بولمىسىن كورسەتەتىن شىنايى وقيعالارعا نەگىزدەلگەن. ارينە باستى نازاردا – 2020 جىلدىڭ ەڭ تانىمال سوزىنە اينالعان «COVID-19» قۇبىلىسى. تەاتر ارتىستەرى بۇل قويىلىم ارقىلى ءومىردىڭ باستى قۇندىلىقتارىن, كارانتين كەزىندەگى ادامداردىڭ ىشكى وي-تولعانىسىن, پاندەميادا ادامزاتتىڭ باسىنا تۇسكەن قيىندىقتاردى جەتكىزۋگە تىرىستى.
«الەم بولىپ كۇرەسىپ جاتقان كوروناۆيرۋس دەرتىنىڭ ادامزات ومىرىنە الىپ كەلگەن وزگەرىسى بارشامىزعا ايتپاي-اق تۇسىنىكتى. ۆيرۋستىڭ تاراۋ سالدارىنان قانشاما ادام ومىردەن وزدى. اۋرۋدان قورعانۋ ماقساتىندا بۇرىن بولماعان كارانتيندىك شەكتەۋلەر ەنگىزىلدى, سونداي-اق ۆاكتسينا الۋ دا ماڭىزدى بولىپ وتىر. «COVID-19» قويىلىمىن وتكەن جىلدىڭ تامىز ايىندا قولعا الىپ, بيىل اقپان ايىندا تەاترىمىزدا العاش رەت كوپشىلىككە ۇسىندىق. قويىلىمنىڭ ءمان-مازمۇنى مەن تاريحى تىكەلەي ومىردەن الىنعان جانە بۇل – ءبىزدىڭ ۇجىمنىڭ دەبيۋتتىك شىعارىلىمى. بۇگىنگى قاتىسۋشىلار ارتىستەر عانا ەمەس, سونىمەن قاتار وسى قويىلىمنىڭ اۆتورلارى بولىپ سانالادى. تاعى ءبىر ايتىپ وتەتىن جايت, بۇگىن ءبىز قويىلىمنىڭ ءۇزىندىسىن (15-20 مينۋت) عانا ۇسىنىپ وتىرمىز, ال تولىقتاي كورەرمەن تەاترىمىزدان كەلىپ كورە الادى», دەدى تەاتردىڭ كوركەمدىك جەتەكشىسى ەسلام نۇرتازين.
ەستەرىڭىزگە سالا كەتەيىك, ەلىمىزدە العاش بولىپ پاندەميا تاقىرىبىن كوتەرگەن قويىلىمنىڭ رەجيسسەر-حورەوگرافى – Astana Musical تەاترىنىڭ ءارتىسى انەل مىرزاعۇلوۆا, ال قويىلىم مۋزىكاسىن تەاتر ءارتىسى اقجول ومىرزاقوۆ جازعان.
ءىس-شارا قالالىق اكىمدىكتىڭ قولداۋىمەن بارلىق سانيتارلىق نورمالاردى ساقتاي وتىرىپ ءوتتى. قويىلىمعا قاتىسقان بارلىق ءانشى پتر-تەستتەن وتكەن.
الەۋمەتتىك ماڭىزعا يە شىعارماشىلىق قويىلىمنىڭ تولىق نۇسقاسىن استانالىقتار 21-22 مامىر كۇندەرى Qazagstan ورتالىق كونتسەرت زالىندا تاماشالاي الادى.
