قوعام • 15 مامىر، 2021

نۇرتىلەۋ يمانعالي ۇلىن ەسكە الۋعا ارنالعان ۆولەيبول ءتۋرنيرى ءوتىپ جاتىر

26 رەت كورسەتىلدى

نۇر-سۇلتان قالاسىندا ۆولەيبولدان باق وكىلدەرى اراسىنداعى «باق ليگانىڭ» ءبىرىنشى ماۋسىمى باستالدى، دەپ حابارلايدى Egemen.kz

بۇل ماۋسىم قازاق تەلەۆيزياسىنىڭ مايتالمانى نۇرتىلەۋ يمانعالي ۇلىن ەسكە الۋعا ارنالعان. ونى «Qazaqstan» رترك، ل.گۋميلەۆ اتىنداعى ەۋرازيا ۇلتتىق ۋنيۆەرسيتەتى جانە قازاقستان ۆولەيبول فەدەراتسياسى ۇيىمداستىرىپ وتىر.

ەۇۋ الەۋمەتتىك-مادەني دامۋ جونىندەگى پرورەكتورى ديقان قامزابەك ۇلى «ەۋرازيا» سپورت كەشەنىندە ماۋسىمنىڭ اشىلۋ سالتاناتىندا: «ارينە، ەۋرازيا ۇلتتىق ۋنيۆەرسيتەتى مۇنداي يگى باستامالاردى قاشاندا قولدايدى. مۇنى سپورت سالاسىنا دەگەن قۇلشىنىس، الەمدى جايلاعان دەرتتىڭ قامالىن بۇزاتىن، سالاماتتىققا اكەلەتىن ۇلكەن ىنتا دەپ قابىلدادىق. ارينە، قازاقتا ء«ولى ريزا بولماي، ءتىرى بايىماس» دەيدى. نۇرتىلەۋ يمانعالي ۇلى، ءوزىنىڭ تەلەجۋرناليست رەتىندەگى تۇلعاسىن ءوزى جاساعان، ول دا سالاماتتى ءومىر سالتىن ەرەكشە قادىرلەدى. ءبىزدىڭ جاستارىمىزدىڭ دا فورمادا بولۋى وتە ماڭىزدى. نۇرتىلەۋ اعا ءوز زامانىندا تەلەجۋرناليستيكا سالاسىنداعى كوپ پروبلەمانى كوتەردى، كوپ تەلەجوبالاردى جۇزەگە اسىردى. بۇل – بۇگىنگى جاستار ءۇشىن ۇلكەن موتيۆاتسيا، ادام ويلاعانىن جۇزەگە اسىرا الادى. ونىمەن پىكىرلەسكەن كەزدەرىمىز دە بولدى، ۇلتقا بولسىن، جاستارعا بولسىن دەگەن ادام ەدى. ونداي ازاماتتاردى ارقاشان ەسكە الىپ وتىرۋىمىز كەرەك»، دەپ اتاپ ءوتتى.

نۇرتىلەۋ يمانعالي ۇلىن ەسكە الۋ ءتۋرنيرى جونىندەگى باستامانى «قازاقستان» رترك باسقارما ءتورايىمىنىڭ ورىنباسارى ەرجانار اشەيحان كوتەرگەن بولاتىن.

«وزدەرىڭىز بىلەتىندەي، ۆولەيبول –اريستوكراتتىق ويىن، كوماندالىق رۋح قالىپتاستىراتىن ويىن. ونى نۇرتىلەۋ يمانعالي ۇلىن ەسكە الۋ ءتۋرنيرى دەپ اتادىق جانە الداعى ۋاقىتتا تۇراقتى وتكىزۋدى جوسپارلاپ وتىرمىز. ەڭ باستى ماقسات – ءبىر-بىرىمىزبەن ارالاسساق دەگەن وي. سوندىقتان اپتانىڭ ءبىر كۇنىن ءبىر-بىرىمىزبەن جاقىن تانىسۋعا ارناۋدى ۇيعاردىق. تەك قانا جەڭىستى كۇندەردە جولىعايىق»، دەدى ە.اشەيحان.

بىرىنشىلىك 28 ماۋسىمدا اتالىپ وتەتىن جۋرناليستەر كۇنىنە دەيىن جالعاسادى جانە وندا 8 كوماندا – «2-باپ. تسەنزۋرا»، «7 ارنا»، «Atameken business channel»، «Qazaqstan TV»، «Qazaq radiolary»، «قازاقپارات اگەنتتىگى»، «قازمەديا ورتالىعى» جانە «حابار اگەنتتىگى» ۇجىمدارى سايىسقا تۇسەدى.

ايتا كەتەيىك، 2016 جىلدىڭ 10 جەلتوقسانىندا بايراق كوتەرگەن «باق ليگا» – قازاقستان باق وكىلدەرىن بىرىكتىرىپ، رەداكتسيالار اراسىنداعى ارىپتەستىك تاتۋلىقتى ارتتىرۋعا ارنالعان جوبا.

بۇگىنگە دەيىن BAQ league قازاقستاننىڭ اقپارات قۇرالدارى اراسىندا فۋتبول دودالارىن وتكىزىپ كەلدى. شاعىن فۋتبولدان 8 ماۋسىم ءوتىپ، وعان ەلىمىزدىڭ 40-قا جۋىق رەداكتسياسىنان 500-گە تارتا جۋرناليست قاتىستى. ەندى «باق ليگا» فۋتبولدان بولەك، باق وكىلدەرى اراسىندا ۆولەيبول چەمپيوناتتارىن دا قولعا الىپ، تۇراقتى تۇردە ۇيىمداستىرۋدى جوسپارلايدى.

سوڭعى جاڭالىقتار

ستۋدەنتتەردىڭ ستيپەندياسى كوبەيەدى

ايماقتار • 11 ماۋسىم، 2021

اقتوبە وبلىسىنا باس يمام تاعايىندالدى

تاعايىنداۋ • 11 ماۋسىم، 2021

ۇقساس جاڭالىقتار