ماسەلەن, جامبىل وبلىستىق پوليتسيا دەپارتامەنتىندە ەرەكشە تاپسىرمالار جونىندەگى اعا ينسپەكتور بولىپ ىستەيتىن ديليافرۋز كەنجەحانوۆا ءوزىنىڭ بەس بالاسىنىڭ ۇستىنە اتا-انا قامقورلىعىنسىز قالعان ءتورت بالانى قوسىپ اسىراپ العان ەكەن. ارينە, بۇگىندە وزگەنىڭ بالاسىن باۋىرىنا باسپاق تۇگىل, ءوز بالاسىنان بەزىپ جاتقاندار دا جەتەرلىك. بىراق ديليافرۋز سياقتى قايىرىمدى جاندار از دا بولسا جەتىمدەردىڭ كوز جاسىنىڭ قۇرعاپ, كوڭىلىنىڭ وسۋىنە سەبەپكەر بولىپ ءجۇر.
«2019 جىلى تاراز قالاسىنداعى №55 مەكتەپتە ءبىلىم سالاسىنا جاۋاپتى ماماندارمەن بىرگە «مەكتەپكە جول» اكتسياسىن وتكىزدىك. كوميسسيانىڭ قۇرامىندا مەن دە بار ەدىم. مەكتەپكە باراتىن قۇجاتتارى جوق بالالار مەن ازاماتتىق الماعان اتا-انالاردى سول اكتسيا كەزىندە كوپتەپ جولىقتىردىق. اكتسيا بارىسىندا ءبىر قاريا ءۇش رەت كەلىپ كومەك سۇرادى. ول كىسىنىڭ بىرنەشە رەت كەلگەنىن بايقاپ, قانداي ماسەلەنى شەشە الماي جۇرگەنىن وزىنەن سۇراپ ءبىلدىم. سويتسەك, ۇيىندە كامەلەتكە تولماعان ءتورت بالا بار ەكەن. شەشەلەرى ءتورت بالانى بىردەي قارياعا تاستاپ, ءوزى ءىز-ءتۇزسىز كەتكەن. وعان ىزدەۋ جاريالانعانىمەن, ناتيجە بولمادى. بالالار مەكتەپكە باراتىن جاسقا كەلگەنىمەن, قۇجاتتارى جوق ەكەن. ءبىز قاريانىڭ كوڭىلىن جايلاندىرىپ, ۇيىنە قايتاردىق», دەيدى ديليافرۋز كەنجەحانوۆا. سودان كەشكە قاراي ءبىر توپ كوميسسيا مۇشەسى بەيتانىس قاريا بەرىپ كەتكەن مەكەنجايعا بارادى. بالالاردىڭ ناشار جاعدايىن كورەدى. «قاسىمىزدا قامقورشىلار كەڭەسىنىڭ وكىلى جۇرگەن. ول دەرەۋ جەتكىنشەكتەردى بالالار ۇيىنە جونەلتۋ كەرەك دەگەن شەشىم شىعارىپ, ءتيىستى اكت جاسادى. مۇنى ەستىگەن الگى قاريا جىلاپ جىبەردى. «كومەكتەسەم دەگەن ۋادەلەرىڭىز قايدا؟ بالالار ۇيىنە تاپسىرۋدى مەن بىلمەي وتىر دەيسىزدەر مە؟», دەپ رەنجىدى. زاڭعا سايكەس بالالاردىڭ ەشبىر تۋىسقانى بولماعاندىقتان, ولار مەملەكەتتىك مەكەمەگە بەرىلۋى كەرەك بولاتىن نەمەسە اسىراپ الاتىن قامقورشى تابۋ كەرەك ەدى», دەيدى ول. اقىرى ديليافرۋز كەنجەحانوۆا الگى بالالاردى پاتروناتتىق تاربيەگە الۋعا شەشىم قابىلدايدى.
ء«الى كۇنگە دەيىن ولاردىڭ اناسىن ىزدەپ جاتىرمىز. ونى تابۋ ءۇشىن قولدان كەلگەننىڭ ءبارىن جاسايمىن. ءبىر جاعىنان بەس بالانىڭ اناسى رەتىندە بەيكۇنا سابيلەردىڭ تاعدىرىنا بەيجاي قاراي المادىم. ال ەكىنشى جاعىنان, بۇل مەنىڭ جۇمىسىممەن تىعىز بايلانىستى شارۋا ەدى. سوندىقتان دا وتباسىمنىڭ كەلىسىمىن العان سوڭ, بالالار مەن قاريانى ءوز ۇيىمىزگە كوشىرىپ الدىق. مەنىڭ دە ديانا دەگەن قىزىم بار. سوندىقتان بولار, قىزىممەن اتتاس بەس جاسار بالدىرعاندى تاعدىردىڭ قاتال سىنىنا قاريامەن بىرگە قالدىرۋعا ارىم جىبەرمەدى. بيىل بىرگە تۇرىپ جاتقانىمىزعا ءۇش جىل بولادى. جيىرما جىلدان بەرى ىشكى ىستەر سالاسىندا قىزمەت اتقارىپ كەلەمىن. جۇمىسىم اۋىر بولسا دا, بالالاردى قامقورلىقتان كەندە قالدىرعان جوقپىن دەپ ويلايمىن», دەيدى ول.
ديليافرۋز كەنجەحانوۆا اۋەلى ارىپتەستەرىنە بۇل ارەكەتى تۋرالى ەشتەڭە ايتپاپتى. بىراق كەيىننەن وسى ءبىر ساۋاپتى ءىس تۋرالى بىلگەن ارىپتەستەرى شامالارىنىڭ كەلگەنىنشە كومەك بەرىپ, قولداۋ كورسەتىپتى. ءتىپتى دەمەۋشىلەر دە تابىلىپ, قاشىقتان وقىتۋ كەزىندە بالالارعا كومپيۋتەر مەن پرينتەر سىيلاپتى. بۇل كۇندە توعىز بالا ءبىر شاڭىراقتىڭ استىندا تاتۋ-ءتاتتى ءومىر ءسۇرىپ جاتىر. «بالانىڭ ءبارىن پەرزەنتىم دەپ قابىلدايتىن ادامدار كوپ بولسا, ەلىمىزدە جەتىمدەر ءۇيى دە قالمايتىن ەدى», دەيدى كوپبالالى انا. شىنىندا دا, قوعامدا ديليافرۋز سياقتى جۇرەگى مەيىرىمگە تولى جاندار كوپ بولسا, ەشقانداي بالا ءتىرى جەتىمدىكتىڭ تاقسىرەتىن تارتپاس ەدى...
جامبىل وبلىسى
