ال جەتىسۋداعى 1 236 مەكتەپكە دەيىنگى ءبىلىم مەن تاربيە بەرۋ مەكەمەسىنىڭ 184 نىسانى – مەملەكەتتىك بالاباقشا بولسا, 717 بالاباقشا جەكەمەنشىك ەكەن. جانە جەكە ينۆەستورلار اشقان 335 شاعىن ورتالىق بار. جالپى, جەكە كاسىپكەرلەر اشقان بالاباقشالاردىڭ ۇلەسى 58,2 پايىزدى قۇراپ وتىر. بالاباقشاعا دەگەن سۇرانىس وبلىستىڭ الماتى قالاسىمەن شەكتەسەتىن اۋداندارىندا جوعارى. بۇل تۇسىنىكتى دە, ويتكەنى تۇرعىنداردىڭ دەنى مەگاپوليسكە قاتىناپ جۇمىس ىستەيتىن اۋىلداردا بالانى مەكتەپكە دەيىنگى تاربيە بەرۋ ورىندارىنا بەرۋ داستۇرگە اينالعان. وسى زاڭدىلىق ىلە اۋدانىنىڭ اۋماعىنا دا ءتان. قازىر اۋداندا بالالاردى مەكتەپكە دەيىنگى ءبىلىم بەرۋ ورىندارىمەن قامتۋدى 100 پايىزعا جەتكىزۋ ءۇشىن جۇمىس ىستەلىپ جاتىر. بۇگىندە بۇل كورسەتكىش 97,5 پايىزدى قۇرايدى. ال اۋدان بويىنشا مەكتەپكە دەيىنگى ۇيىمداردا 1 مىڭ 388 تاربيەشى ەڭبەك ەتەتىن كورىنەدى.
جوعارىدا مەكتەپكە دەيىنگى ءبىلىم مەن تاربيە بەرەتىن ورىنداردى اشۋعا جەكە كاسىپكەرلەر مۇرىندىق بولىپ وتىرعانىن ايتتىق. قازىر قالاعا جاقىن اۋىلداردا كوپتەگەن جەكەمەنشىك بالاباقشا جۇمىس ىستەپ تۇر. جاڭادان اشىلىپ جاتقاندارى دا جەتكىلىكتى. سونىڭ ءبىرى جاقىندا ىسكە قوسىلعان «ايسۇلتان-1» بوبەكجاي بالاباقشاسى. 100 بالاعا ارنالعان ورتالىق قويانقۇس اۋىلىندا ورنالاسقان. «ايسۇلتان-1» بوبەكجاي-بالاباقشاسىنىڭ جاڭادان بوي كوتەرۋىنە كاسىپكەر قايرات قۇلسەيىتوۆ اتسالىسقان ەكەن. جيىرما بەس جىلعا جۋىق بيزنەس سالاسىندا تابىستى ەڭبەك ەتكەن ول ەندى اۋىل بالالارىنىڭ ءبىلىم الىپ, تاربيەلى بولۋىنا ۇلەس قوسۋدى ماقسات ەتىپ وتىر. بالاباقشادا وتىزعا جۋىق تالىمگەر, تاربيەشى, جۇمىسشى ەڭبەك ەتەتىن بولادى. ياعني اۋىل تۇرعىندارىنا جۇمىس تا تابىلدى.
– بالاباقشا 100 بالاعا ارنالعان توسەكتىك جابدىقپەن تولىق قامتىلدى. 30 ادامعا جۇمىس ورىنى اشىلدى. وسىنىڭ ءبارىن ءوز قاراجاتىمىزبەن ىستەپ, بالاباقشانى تالاپقا ساي ەتىپ سالدىق. عيماراتتىڭ ىرگەتاسىنان باستاپ نورماتيۆتىك قۇقىقتىق اكتىلەردە بەلگىلەنگەن سانيتارلىق-ەپيدەميالىق تالاپتاردىڭ ساقتالۋىن قاتاڭ قاداعالادىق. ويتكەنى بالالار كەڭ دە جارىق ءارى قاۋىپسىز عيماراتتا ونەر ۇيرەنىپ, تاربيە الۋى كەرەك, – دەيدى كاسىپكەر قايرات قۇلسەيىتوۆ.
سونداي-اق بالاباقشانىڭ ويىن بولمەسى ۇلتتىق ناقىشتا بەزەندىرىلگەن ەكەن. ونداعى قازاقى ورنەكتەر, شاڭىراق سيمۆولى ۇلتتىڭ مادەنيەتى مەن ءداستۇرىن پاش ەتىپ, وسكەلەڭ ۇرپاق ساناسىنا ۇلتجاندىلىقتى جاستايىنان سىڭىرۋگە نەگىز بولادى دەگەن سەنىم بار.
– قازىر جەكە كاسىپكەرلەردىڭ بالاباقشا, دامىتۋ ورتالىقتارىن اشۋعا ىنتاسى جوعارى. بۇل باعىتتاعى كوزقاراس بۇرناعىعا قاراعاندا تۇبەگەيلى وزگەردى. ويتكەنى كاسىپكەرلەر بۇل ىستە تەك پايدانى عانا ويلاماي, مەملەكەت پەن حالىق الدىنداعى جاۋاپكەرشىلىكتى سەزىنىپ كەلەدى. عيماراتتاردىڭ تالاپقا ساي بولۋىنان باستاپ تالىمگەرلەر مەن تاربيەشىلەردىڭ ءبىلىمى مەن بىلىكتىلىگىنە دەگەن سۇرانىس ارتتى. بۇل, ارينە, باسەكەنىڭ ارقاسى. ۇزدىك, وزىق بالاباقشاعا دەگەن تاڭداۋ جوعارى. ەكىنشى جاعىنان بالالاردى مەكتەپكە دەيىنگى ءبىلىم بەرۋ ورىندارىمەن قامتۋ مىندەتى ورىندالىپ جاتىر. ءبىزدىڭ اۋداندا بۇل ماسەلە 100 پايىز شەشىلەدى. قازىردىڭ وزىندە كورسەتكىش 97,5 پايىزدى قۇرايدى. وعان مەملەكەت تە, جەكە بيزنەس تە مۇددەلى, – دەيدى ىلە اۋدانى ءبىلىم ءبولىمىنىڭ باسشىسى ءلاززات كاتكەەۆا.
