قازاقستان • 13 مامىر، 2021

​​كولساي كولدەرىندە ەكوتۋريزم قالاي داميدى؟

17 رەت كورسەتىلدى

ەكولوگيا، گەولوگيا جانە تابيعي رەسۋرستار ءمينيسترى ماعزۇم مىرزاعاليەۆ «كولساي كولدەرى» مەملەكەتتىك ۇلتتىق تابيعي پاركىندە بولىپ، ەكوتۋريزم ينفراقۇرىلىمىن قۇرۋ جوباسىمەن تانىستى، دەپ حابارلايدى Egemen.kz.

قازاقستاننىڭ تابيعي بىرەگەيلىگىن ساقتاۋ ۇيىمداستىرىلعان ءتۋريزمدى دامىتۋعا تىكەلەي بايلانىستى. سوندىقتان قازىر ەكولوگيالىق تۋريزمگە كوپ كوڭىل بولىنۋدە. بۇل جاعدايدا ەكولوگيالىق مانگە باسا نازار اۋدارىلادى: ۇلتتىق پاركتەردە قۇرىلاتىن بارلىق ينفراقۇرىلىم ەكولوگيالىق تازا ماتەريالداردان دايىندالادى جانە بارلىق وبەكتىلەر قورىق ايماقتارىنان تىس جەرلەردە ورنالاساتىن بولادى.

ايتا كەتەيىك، ۇلتتىق پاركتەگى تۋريستەر سانى جىل سايىن ارتىپ كەلەدى. پاندەميا شەتەلدىك كۋرورتتارعا شەكتەۋ بولعانىمەن، ىشكى ءتۋريزمنىڭ دامۋىنا جول اشتى.

ماسەلەن، وتكەن جىلى كولسايعا 80 مىڭعا جۋىق تۋريست كەلسە، بيىل ولاردىڭ سانى 135 مىڭعا جۋىق بولادى دەپ كۇتىلۋدە. بۇل ناقتى كورسەتكىش ەمەس، كەلۋشىلەر سانى بۇدان دا كوپ بولۋى مۇمىكىن. ۇلتتىق پاركتە قاۋىپسىز تۋريستىك باعىتتار مەن سوقپاقتار، زاماناۋي ۆيزيت-ورتالىقتار، گلەمپينگتەر، كەمپينگتەر، قازاق اۋىلدارى جانە كەرۋەن جولى، كورۋ الاڭدارى، دەمالۋعا ارنالعان ورىندار سياقتى جاعدايلار جاسالعاننان كەيىن كەلۋشىلەر سانى ەسەلەپ ارتادى.

ەلدەگى ۇلتتىق پاركتەردە ەكوتۋريزمدى دامىتۋ تۇجىرىمداماسى وسىعان سايادى. ول تۇجىرىمدامادا تۋريستىك وبەكتىلەر قورشاعان ورتاعا ەڭ از جۇكتەمەمەن كۇردەلى قۇرىلىسسىز ورنالاستىرىلاتىنى دا قاراستىرىلعان.

«كولساي كولدەرى بويىنشا ءبىز كولدەردەن تومەن ينفراقۇرىلىم سالۋ تۋرالى شەشىم قابىلدادىق، اۆتوكولىكتەردىڭ كىرۋى شەكتەلەدى، ويتكەنى قايىڭدى كولى ەرەكشە، ونى ساقتاۋ ماڭىزدى. ينۆەستور قاجەتتى ەكولوگيالىق، بيولوگيالىق زەرتتەۋلەر جۇرگىزگەنىن اتاپ وتەمىن. مۇندا «زيان تيگىزبەۋ» قاعيداسى باستى ورىندا تۇر»، دەدى مينيستر ۇلتتىق پارككە بارعان كەزىندە.

سونداي-اق كولدىڭ بوگەتىن قالپىنا كەلتىرۋ جوسپارلانۋدا، قازىر جوبالىق-زەرتتەۋ جۇمىستارى جۇرگىزىلۋدە. قايىڭدى كولى شامامەن 100 جىل بۇرىن سەلدىڭ قۇلاۋى ناتيجەسىندە پايدا بولعان. سوڭعى جىلدارى بوگەت شايىلىپ، كولدىڭ دەڭگەيى تومەندەي باستادى.

«2-3 جىل ىشىندە مۇندا جاڭا تۋريستىك مارشرۋتتار، جاياۋ جۇرگىنشىلەرگە ارنالعان جولدار جاسالادى. بارلىق جوسپارلانعان جۇمىستاردى جۇزەگە اسىرۋ ءۇشىن كونكۋرس قورىتىندىسى بويىنشا جەكە ينۆەستور انىقتالدى، ول كولسايدا بىرنەشە جىلدان بەرى جۇمىس ىستەپ كەلەدى، بۇل ورىنداردى جاقسى بىلەدى. ەكوتۋريزم بويىنشا بارلىق جوبالار ۇلتتىق پاركتىڭ تۋريستىك ايماعىندا عانا ىسكە اسىرىلاتىن بولادى»، دەپ اتاپ ءوتتى ماعزۇم مىرزاعاليەۆ.

ەستەرىڭىزگە سالا كەتەيىك، بيىل «كولساي كولدەرى» مۇتپ-دا ەكوتۋريزمدى دامىتۋ بايقاۋىندا جەڭىسكە جەتكەن ينۆەستور – «اتىراۋ-رەنت» جشس ۇلتتىق پاركتى دامىتۋعا 5 ملرد تەڭگەگە جۋىق ينۆەستيتسيا تارتۋدى جوسپارلاپ وتىر. ەكولوگيالىلىق ءماندى ەسكەرە وتىرىپ، جوبانىڭ ىسكە اسىرىلۋىن باقىلاۋدى ۇلتتىق پارك جانىنداعى قوعامدىق كەڭەس جۇزەگە اسىراتىن بولادى.

سوڭعى جاڭالىقتار

الەكسەي تسوي وتستاۆكاعا كەتە مە؟

قازاقستان • بۇگىن، 15:37

كەڭەستەردىڭ قىزمەت اياسى كەڭەيدى

قازاقستان • بۇگىن، 08:37

5 جىلدا – 2 ملرد اعاش

قازاقستان • بۇگىن، 08:36

ءسۇت زاۋىتىنداعى سىناق

ايماقتار • بۇگىن، 08:27

«قارا باۋىر قاسقالداق»

رۋحانيات • بۇگىن، 08:25

ەكىدىڭ ماڭىنداعى ەسكەرتكىشتەر

ايماقتار • بۇگىن، 08:22

كۇي – قازاقتىڭ قازىناسى

رۋحانيات • بۇگىن، 08:19

جۇرەك جىلۋى جان جادىراتادى

ايماقتار • بۇگىن، 08:18

ۇقساس جاڭالىقتار