ايماقتار • 13 مامىر، 2021

تجد شومىلۋ كەزىندەگى قاۋىپسىزدىك ەرەجەلەرىن ءتۇسىندىردى

33 رەت كورسەتىلدى

ەلوردانىڭ سۋ ايدىندارىندا جىلدا جاز مەزگىلىندە جازاتايىم وقيعالار تىركەلەدى. بۇل كوبىنە جۇرتتىڭ تىيىم سالىنعان ورىنداردا شومىلۋى، سۋ قويمالارىنىڭ جانىندا الكوگول ءىشۋى جانە بالالاردى قاراۋسىز قالدىرۋى سەبەپتى بولادى. ەلوردالىق تج دەپارتامەنتى سۋ ايدىندارىنداعى قاۋىپسىزدىك ەرەجەلەرىن ءتۇسىندىرىپ ءوتتى، دەپ حابارلايدى Egemen.kz نۇر-سۇلتان قالاسىنىڭ رەسمي سايتىنا سىلتەمە جاساپ.

بەلگىلەنبەگەن سۋ ورىندارى قاۋىپتى. سەبەبى ونىڭ ءتۇبى زەرتتەلمەگەن. تۇبىندە سىنعان اينەك، بالىق اۋلاۋ تورى، سىم، ارماتۋرا، تاس سەكىلدى قاۋىپتى زاتتار بولۋى مۇمكىن. سوندىقتان مۇنداي ورىنداردا شومىلۋ قايعىلى جاعدايعا اكەلۋى مۇمكىن.

سونداي-اق وزەندەردە دە شومىلۋ قاۋىپتى. سەبەبى وزەننىڭ اعىسى بار. اسىرەسە جاعادان ۇزاپ كەتكەن ادام ءۇشىن قاۋىپتى. جاعالاۋدان نەعۇرلىم الىس بولسا وزەننىڭ اعىسى سۋ بەتىندە دە، استىندا دا قاتتى بولادى.

سونداي-اق سۋ قۇيىلعان تاستاندى قازانشۇڭقىرلار دا قاۋىپ توندىرەدى. سوندىقتان مۇنداي ورىنعا كىرۋگە جانە ويناۋعا قاتاڭ تىيىم سالىنادى. ارنايى جابدىقتالعان جاعاجايلار قاۋىپسىز بولىپ سانالادى.

قازىرگى ۋاقىتتا نۇر-سۇلتان قالاسىنىڭ اۋماعىندا قاۋىپسىزدىك تالاپتارىنا سايكەس شومىلۋعا ارنالعان ءۇش ۋچاسكە بار. اتاپ ايتقاندا ورتالىق جاعاجاي، «تري پەسكاريا» جانە «استانالىق اۋلا» دەمالىس ايماعى. قالاداعى سۋ ايدىندارىنىڭ باسقا ۋچاسكەلەرى شومىلۋعا جابدىقتالماعان جانە سانكتسيالانباعان، مۇنداي جەرلەردە شومىلۋعا بولمايدى.

جىل سايىن شومىلۋ كەزەڭى باستالار الدىندا ءتيىستى قىزمەتتەر جاعاجايلاردى تەكسەرۋى ءتيىس. شومىلۋعا بولاتىن ارنايى شەكاراسى بەلگىلەنەدى، بالالار ءۇشىن شومىلۋعا ارنالعان جەكە ورىندار جابدىقتالادى. قۇتقارۋ قۇرال-جابدىقتارى جانە باقىلاۋ مۇنارالارى ورناتىلادى.

قاۋىپتى جاعدايلار ءارتۇرلى بولادى. بىراق سەبەپتەرى بىردەي: ءوزىنىڭ جاي-كۇيى مەن قاۋىپسىزدىك ەرەجەلەرىن ەلەمەۋ، ياعني تىيىم سالىنعان جەرلەردە شومىلۋ، ۇزاق ءجۇزۋ جانە سۋدا ۇزاق ۋاقىت بولۋ.

بالالارعا قاتىستى جازاتايىم وقيعا نەگىزىنەن ەرەسەكتەردىڭ قاراۋىنسىز قالۋىنان، دەنەسى قۇرىسىپ قالعانعا دەيىن سالقىن سۋدا ۇزاق شومىلۋىنان بولادى. سونداي-اق جۇزە الماۋى، قاۋىپتى ويىندار، ارعى جاعاسىنا دەيىن ءجۇزىپ وتۋگە ۇمتىلۋى جانە جۇزە الماعاندىقتان ءتۇرلى زاتتارمەن ءجۇزۋى دە قايعىلى اياقتالىپ جاتادى.

سۋ ايدىندارىندا مىنانداي ارەكەتتەرگە رۇقسات ەتىلمەيدى:
1) «شومىلۋعا تىيىم سالىنادى» بەلگىلەرى ورناتىلعان جەرلەردە شومىلۋعا;
2) ءجۇزۋ شەكاراسىن بەلگىلەيتىن بەلگىلەردەن تىس جۇزۋگە;
3) كاتەرلەرگە جانە باسقا دا ءجۇزۋ قۇرالدارىنا ءجۇزىپ جەتۋگە;
4) قايىقتاردان، كاتەرلەردەن، ايلاقتاردان، جارتاستاردان، قورشاۋلاردان جانە باسقا دا ورىنداردان سۋعا سەكىرۋگە;
5) وسى ماقساتتارعا بەيىمدەلمەگەن ورىنداردا سپورتپەن اينالىسۋعا، ونىڭ ىشىندە سپورتتىق ويىندار ويناۋعا;
6) جالعان دابىل قوسۋعا;
7) سۋ ايدىندارىن لاستاۋعا، كىر جۋعا، وتىن جارۋعا، شومىلۋعا بولىنگەن ورىنداردا 500 مەترگە دەيىن كولىك جۋعا جانە جوندەۋگە;
8) شاعىن كولەمدى (ونىڭ ىشىندە ەسكەكتى) سۋ كولىكتەرىنە كىرۋگە جانە جاعاجايلار مەن اكۆاتوريا ۋچاسكەلەرىندە (ادامداردىڭ قاۋىپسىزدىگىن قامتاماسىز ەتەتىن كەمەلەردى قوسپاعاندا) مانەۆر جاساۋعا تىيىم سالىنادى;
9) سۋ ايدىندارىندا قاۋىپسىزدىك بەلگىلەرىن ءوز بەتىمەن الىپ تاستاۋعا، بۇلدىرۋگە نەمەسە ورناتۋعا جول بەرىلمەيدى;
10) الكوگولدىك جانە ەسىرتكىلىك ماساڭ كۇيدە شومىلۋعا;
11) تەكسەرىلمەگەن جانە جابدىقتالماعان جەرلەردە سۇڭگۋگە;
12) جۇزۋگە ارنالماعان زاتتارمەن جۇزۋگە;
13) دەمالۋشىلارعا جاراقات اكەلۋى مۇمكىن قوقىستى جاعالاۋدا جانە شەشىنەتىن بولمەلەردە قالدىرۋعا;
14) سۋ ايدىندارىنداعى قاۋىپسىزدىك بەلگىلەرىنە شىعۋعا;
15) بالالارعا ەرەسەكتەردىڭ قاراۋىنسىز سۋعا تۇسۋىنە جول بەرىلمەيدى.
ەسىڭىزدە ساقتاڭىز، ءوز قاۋىپسىزدىگىڭىز ءوز قولىڭىزدا!

سوڭعى جاڭالىقتار

الەكسەي تسوي وتستاۆكاعا كەتە مە؟

قازاقستان • بۇگىن، 15:37

كەڭەستەردىڭ قىزمەت اياسى كەڭەيدى

قازاقستان • بۇگىن، 08:37

5 جىلدا – 2 ملرد اعاش

قازاقستان • بۇگىن، 08:36

ءسۇت زاۋىتىنداعى سىناق

ايماقتار • بۇگىن، 08:27

«قارا باۋىر قاسقالداق»

رۋحانيات • بۇگىن، 08:25

ەكىدىڭ ماڭىنداعى ەسكەرتكىشتەر

ايماقتار • بۇگىن، 08:22

ۇقساس جاڭالىقتار