مىنە, وسى تۇيتكىلدى ەسكەرگەن شىمكەنت قالاسى اكىمدىگى شاھار تۇرعىندارىنىڭ تۇرمىستىق, الەۋمەتتىك ماسەلەلەرىنە سالا ماماندارىنىڭ نازارىن اۋدارتۋ ماقساتىندا «شىمكەنت قالاسىنىڭ سيتۋاتسيالىق Ikomek109 ورتالىعىن» قۇرعان بولاتىن. يگىلىكتى باستاما ەلباسىنىڭ حاتتامالىق تاپسىرىسىن ورىنداۋ ءۇشىن قالا اكىمى مۇرات اي̆تەنوۆتىڭ باستاماسىمەن وتكەن جىلدىڭ ماۋسىم ايىنان باستاپ قولعا الىنعان. سودان بەرى اتالعان مەكەمە قالاداعى كۇرمەۋى شەشىلمەگەن كوپ ماسەلەنى انىقتاپ, كورسەتىلەتىن قىزمەتتەردىڭ جەدەل ءارى ساپالى شەشىلۋىنە ىقپال ەتۋ جولىندا جۇمىس ىستەپ كەلەدى.
«كۇنىنە 3 مىڭ قوڭىراۋعا دەي̆ىن قابىلداۋعا قاۋقارلى مەكەمە قاجەت بولعان جاعداي̆دا 5 مىڭ تۇرعىننىڭ سۇراعىنا دا جاۋاپ بەرە الادى. 24/7 فورماتىنداعى ورتالىق قالا تۇرعىندارى مەن قوناقتارىنىڭ 50 مىڭنان اسا ءوتىنىشىن قابىلداپ ۇلگەردى. iKomek ورتالىعىنىڭ وپەراتورلارى تۇرعىنداردان وتىنىمدەردى قالالىق جانە ءموبيلدى تەلەفونداردىڭ 109 بىرىڭعاي̆ نومەرى, سونداي-اق الەۋمەتتىك جەلىدەگى رەسمي پاراقشالارى ارقىلى قابىلداپ الادى. سيتۋاتسيالىق iKomek بىرىڭعاي بايلانىس ورتالىعىنىڭ كوزدەگەنى قالا تۇرعىندارىنان كەلگەن وتىنىشتەردىڭ 99 پايىزىن قاناعاتتاندىرۋ», دەيدى ورتالىق ديرەكتورى ازات ءامىرتاي.
بۇگىندە اتالعان ورتالىقتا 30-عا جۋىق مامان نەگىزگى ءۇش باعىت بويىنشا جۇمىس ىستەۋدە. جەلىدە قوڭىراۋلار مەن سۇرانىستاردى قابىلداۋ ءۇشىن 24 وپەراتور ساقاداي-ساي بولسا, ساپانى باقىلاۋ جانە اتقارۋشى ورگاندارمەن ءوزارا قارىم-قاتىناس ورناتۋ بويىنشا 6 ينسپەكتور ەڭبەك ەتەدى. وسىلايشا ورتالىققا كەلىپ تۇسكەن سۇراقتار
4 اۋدان اكىمدىگى, 22 قالالىق باسقارما, تاعى باسقا مەملەكەتتىك مەكەمەلەر مەن سەرۆيستىك مەكەمەلەرگە (جالپى 56 اتقارۋشى مەكەمە) جولدانادى.
«قالا تۇرعىندارىنىڭ تۇرمىسىن جاقسارتۋ ماقساتىندا تۇرعىن ءۇي-كوممۋنالدىق شارۋاشىلىق, تۇرعىن ءۇي قاتىناستارى, دەنساۋلىق ساقتاۋ, ءبىلىم بەرۋ, حالىقتى جۇمىسپەن قامتۋ جانە الەۋمەتتىك قورعاۋ سالاسى بويىنشا 1 مىڭنان استام قىزمەتتەن تۇراتىن كاتالوگ ازىرلەنىپ, بەكىتىلدى. سۇرانىستىڭ ورىندالۋىن باقىلاۋدى جاقسارتۋ ءۇشىن iKomek جۇمىسىنىڭ بارلىق ناتيجەسى باسقارۋ تاقتاسىندا كورسەتىلەدى. وسى تاقتادا جەرگىلىكتى اتقارۋشى ورگانداردىڭ رەيتينگىن دە كورۋگە بولادى. بۇل ءوز كەزەگىندە قالا تۇرعىندارىنىڭ بەرگەن وتىنىشتەرىنىڭ ۋاقىتىلى ورىندالۋىن قامتاماسىز ەتەدى», دەيدى ورتالىق باسشىسى.
تۇرعىنداردىڭ وتىنىشتەرىن قابىلداۋ ءۇشىن ارنايى ءموبيلدى قوسىمشا دا ىسكە قوسىلىپتى. ورتالىققا سوڭعى 3 ايدا 52 325 ارىز-شاعىم كەلىپ تۇسسە, ونىڭ 51 539-ى بويىنشا ناقتى شەشىم شىققان. ورتالىققا كەلىپ تۇسكەن ارىز-شاعىمداردىڭ كوبىسى قالاداعى جول ينفراقۇرىلىمىنا, جولداردى جوندەۋگە بايلانىستى سۇراقتار. وسىعان وراي وتكەن اپتادان باستاپ قالا كوشەلەرىندە شۇڭقىرلاردى جاماۋ, اسفالت توسەۋ, جولدى رەتكە كەلتىرۋ ءىسى قولعا الىنا باستادى.
ورتالىق ديرەكتورىنىڭ ايتۋىنشا, توقساندىق قورىتىندى بويىنشا 5 قالالىق باسقارما جانە اۋدان اكىمدىكتەرى تۇرعىنداردىڭ وتىنىشىنە ساپالى تۇردە جاۋاپ بەرگەنى ءۇشىن قالا اكىمىنىڭ العىس حاتىنا ۇسىنىلعان. ال تۇرعىنداردىڭ شاعىمدارىنا نەمقۇرايدى قاراپ, ساپاسىز ورىنداۋىنا بايلانىستى 2 باسقارما قالا باسشىسىنان سوگىس الىپتى.
«نەگىزىندە ورتالىققا كەلىپ تۇسكەن ارىز-شاعىمداردىڭ باسىم كوپشىلىگى بىردەن شەشىمىن تاپپايدى. سەبەبى قالا تۇرعىندارىنان كەلەتىن وتىنىشتەر سان الۋان. ونىڭ ىشىندە ينفراقۇرىلىمدىق جوبا, قۇرىلىس جۇمىستارىن الدىن الا جوسپارلاۋعا بايلانىستى كەيبىر وتىنىشتەردىڭ ورىندالۋى ۋاقىت وزدىرۋعا تۋرا كەلەدى. ءتىپتى كەيبىر ارىز-شاعىمدار بويىنشا جۇمىستار 2022-2023 جىلدارى اتقارىلاتىنى دا جاسىرىن ەمەس. ماسەلەن, ءوزىن نۇرگۇل ارالباەۆا دەپ تانىستىرعان قالا تۇرعىنى ساپالى ينتەرنەتپەن قامتۋ ماسەلەسىن ايتىپ حابارلاستى. اباي اۋدانىنا قاراستى قۇرساي شاعىناۋدانىندا تۇراتىن تۇرعىن «اباي اۋدانىنىڭ اكىمىنىڭ قابىلداۋىندا اقپاندا بولدىم. ءبىز تۇراتىن ايماقتا ينتەرنەت ماسەلەسى ناۋرىز ايىنا دەيىن شەشىلەدى دەگەن ەدى. ال قازىر ءساۋىر ايى دا ءوتىپ بارادى. ەشقانداي وزگەرىس جوق دەيدى. وسىعان وراي, iKomek ورتالىعىنىڭ ماماندارى اۋدان اكىمىنىڭ بۇل ورايدا ناقتى قانداي ءىس اتقارىپ وتىرعانىن, قالا تۇرعىنىنا تەز ارادا ول تۋرالى حابارلاما بەرۋىن سۇراعان. اباي اۋدانى اكىمدىگىنىڭ كوممۋنالدىق شارۋاشىلىق ءبولىمىنىڭ باسشىسى وڭعار ابىلقايىردىڭ جاۋابىنا سۇيەنسەك, قۇرساي شاعىناۋدانىن ينتەرنەت جۇيەسىمەن قامتاماسىز ەتۋ ءۇشىن №49 ورتا مەكتەپتىڭ اۋماعىنان جەر تەلىمى ءبولىنىپ, بيىل قىركۇيەك ايىندا شاعىناۋدان تۇرعىندارى ساپالى ينتەرنەت جەلىسىنە قوسىلۋ مۇمكىندىگىن الماق», دەيدى سيتۋاتسيالىق Ikomek109 ورتالىعىنىڭ ديرەكتورى.
سوڭعى كەزدەرى شاھار تۇرعىندارىنان قوعامدىق كولىكتەردەگى «تولەم» جۇيەسى بويىنشا ارىز-شاعىمدار كوبەيگەن. بۇگىندە سالالىق باسقارماعا حات جولدانىپ, تۇرعىندارمەن كەرى بايلانىس ورناتىلعان. باسقارما جۇمىسىنا جاردەمشى رەتىندە ورتالىق وپەراتورلارى تۇرعىندارعا قوعامدىق كولىكتىڭ ناقتى ينتەرۆالىن جانە قاي اۋداندا تۇرعاندىعى مەن قانشا ۋاقىتتا ايالداماعا جەتەتىندىگى تۋرالى اقپاراتتى بەرە الادى.
ورتالىق قىزمەتكەرلەرىنىڭ ايتۋىنشا, كەلىپ تۇسكەن ارىز-شاعىمداردى تولىقتاي ساپالى ورىنداعان باسقارمالار قاتارىندا ءبىلىم, مەملەكەتتىك ساتىپ الۋ, اۋىل شارۋاشىلىعى جانە ۆەتەريناريا, جۇمىسپەن قامتۋ جانە الەۋمەتتىك قورعاۋ, تۇرعىن ءۇي, دەنە شىنىقتىرۋ جانە سپورت, مادەنيەت, تىلدەردى دامىتۋ جانە ارحيۆتەر باسقارماسىنىڭ جۇمىسى جوعارى باعالانىپتى. ءبىر سوزبەن ايتقاندا, جۇمىس ونىمدىلىگىن باعالاۋدىڭ بۇل ءادىسى مەملەكەتتىك مەكەمەلەر اراسىندا ءادىل باسەكەلەستىك قالىپتاستىرىپ, حالىق ۇنىنە قۇلاق اسۋعا سەپتەسە ءتۇستى.
شىمكەنت
