جىل باسىنان بەرى ەلىمىزدە ءۇش بۋىندى مودەل بويىنشا قىلمىستىق پروتسەستەر نەگىزگى قۇجاتتاردى پروكۋرورمەن ونلاين فورماتتا كەلىسۋ ارقىلى جۇزەگە اسىرىلىپ كەلەدى. قىلمىستىق ءىس جۇرگىزۋ كودەكسىنە ەنگىزىلگەن وزگەرىستەرگە سايكەس قولعا الىنعان بۇل جاڭاشىلدىق ەكى جاق ءۇشىن دە وڭاي ءارى قولايلى. ويتكەنى پروتسەسسۋالدىق شەشىمدەردى ەلەكتروندى فورماتتا كەلىسۋ كەزىندە تەرگەۋشى مەن پروكۋروردىڭ ءوزارا ءىس-قيمىلى بارىنشا وڭتايلاندىرىلعان.
سوتقا دەيىنگى تەرگەۋدىڭ بىرىڭعاي ءتىزىلىمىنىڭ جاڭا ءمودۋلىن تانىستىرعان ەلوردالىق سىبايلاس جەمقورلىققا قارسى قىزمەت دەپارتامەنتىنىڭ باسشىسى شىڭعىس قابدۋلا زاماناۋي تسيفرلى تەحنولوگيالاردى ەنگىزۋ جەدەل تەرگەۋ جۇمىسىنىڭ ساپاسىن ارتتىرىپ قانا قويماي, ۋاقىتتان دا ۇتاتىنىن ايتىپ ءوتتى. بۇرىندارى كۇدىكتىگە قاتىستى قانداي دا ءبىر اقپاراتتى الۋ ءۇشىن, مىسالى, ونىڭ پسيحيكالىق اۋرۋ نەمەسە ناشاقور رەتىندە ەسەپتە تۇرعان-تۇرماعانىن انىقتاۋ ءۇشىن ءبىراز ۋاقىتتى ولتىرۋگە تۋرا كەلەتىن. ال جاڭا جۇيەگە ەنگىزىلگەن بازادا مۇنداي مالىمەتتەردىڭ بارلىعى تولىقتاي جۇكتەلگەن.
بۇل جۇيەنىڭ وتكەن جىلدىڭ 31 جەلتوقسانىنان باستاپ ىسكە اسىرىلىپ كەلە جاتقانىن مالىمدەگەن نۇر-سۇلتان قالاسى پروكۋرورىنىڭ ورىنباسارى ەلدوس قيلىمجانوۆ جاڭا فورمات ەنگىزىلگەلى بەرى كونستيتۋتسيالىق قۇقىق بۇزۋشىلىق دەرەكتەرىنىڭ ءبىرشاما تومەندەگەنىن دە ايتىپ ءوتتى. «سالىستىرمالى تۇردە الىپ قارايتىن بولساق, وتكەن جىلدىڭ ءبىرىنشى توقسانىندا نۇر-سۇلتان قالاسىنداعى قۇقىق قورعاۋ ورگاندارىندا ادام قۇقىن بۇزۋعا قاتىستى 20 دەرەك انىقتالعان بولسا, 2021 جىل باستالعالى بەرى نەبارى 3 فاكتى انىقتالعان. ال بيىل ەلوردالىق سىبايلاس جەمقورلىققا قارسى قىزمەت دەپارتامەنتىندە ادام قۇقىن بۇزۋعا قاتىستى بىردە-ءبىر دەرەك تىركەلمەگەن, بىردە-ءبىر قىلمىستىق ءىس قايتا تەرگەۋگە جولدانباعان. بۇل – تەرگەۋ ورگاندارى مەن پروكۋراتۋرانىڭ ءوزارا تىعىز قارىم-قاتىناستا جۇمىس ىستەپ جاتقانىن اڭعارتادى. ال مۇنداعى باستى ماقسات – ادام قۇقىن بۇزباۋ», دەيدى ە.قيلىمجانوۆ.
باق وكىلدەرىنىڭ سۇراقتارىنا ارنايى جاۋاپ بەرگەن سىبايلاس جەمقورلىققا قارسى ءىس-قيمىل اگەنتتىگىنىڭ توراعاسى مارات احمەتجانوۆ قىلمىستىق پروتسەستىڭ بۇل جاڭا فورماتى مەملەكەت باسشىسىنىڭ بيىلعى جولداۋىندا قۇقىق قورعاۋ ورگاندارىنىڭ الدىنا قويعان جاڭا تالابىنان تۋىنداپ وتىرعانىن ايتىپ ءوتتى.
«پرەزيدەنت قۇقىق قورعاۋ ورگاندارىنىڭ جۇمىسى ءالى دە بۇرىنعىشا اق پەن قارانى انىقتاۋدان بۇرىن, ايىپتاۋعا جاقىن ەكەنىن اشىق جەتكىزگەن بولاتىن. سول سەبەپتى دە ازاماتتاردىڭ قىلمىستىق جاۋاپكەرشىلىككە ەش نەگىزسىز تارتىلۋىن بولدىرتپاۋ ءۇشىن ءۇش بۋىندى مودەل قۇرۋدى تاپسىردى. ال ءبىز قولعا الىپ وتىرعان تەرگەۋ ورگاندارى مەن پروكۋراتۋرانىڭ ونلاين فورماتتاعى جۇمىس ءتاسىلى ازاماتتاردىڭ قۇقىن زاماناۋي تۇرعىدان قورعاۋعا مۇمكىندىك بەرەدى», دەيدى اگەنتتىك توراعاسى. ول ءۇش بۋىندى مودەلدى تولىققاندى ەنگىزۋ جۇمىستاعى بىرجاقتى ايىپتاۋ باعىتىن جويۋعا, تەرگەۋشىلەردىڭ ءىس جۇرگىزۋ كەزىندە ءجيى جىبەرەتىن قاتەلىكتەرىن بولدىرماۋعا جانە جازانىڭ بۇلتارتپاستىعى قاعيداتىن ساقتاۋدى قامتاماسىز ەتۋگە مۇمكىندىك بەرەتىنىن دە اتاپ ءوتتى.
قىلمىستىق پروتسەستىڭ جاڭا فورماتى قۇقىق قورعاۋ ورگاندارىنىڭ جۇمىسىنداعى ايىپتاۋ باعىتىن جويۋعا مۇمكىندىك بەرەتىنىنە سەنىم بىلدىرگەن م.احمەتجانوۆ: «ەڭ الدىمەن قىلمىس قۇرامىنىڭ بار-جوعى ايقىندالادى. كۇدىكتىگە قاتىستى دالەلدەردىڭ زاڭعا سايكەس جانە تولىققاندى جينالۋى قاتاڭ قاداعالانادى. تەرگەۋشى وسىنىڭ بارلىعىن تالداپ, جان-جاقتى قاراۋى قاجەت. بۇل – ءبىرىنشى سۇزگى. ءۇش بۋىندى مودەل جۇيەسىندە پروكۋرور ول – ەكىنشى سۇزگى. ول قىلمىستىق پروتسەستىڭ ءار ساتىسىنا قانداي دا ءبىر باعا بەرۋدە ەشكىمگە تاۋەلدى ەمەس. اگەنتتىك قىزمەتكەرلەرى جيناعان بارلىق ماتەريالداردى ەلەكتەن وتكىزەدى, جان-جاقتى قاراستىرادى جانە كەلىسكەن جاعدايدا راستايدى. تەك وسىدان كەيىن عانا پروتسەسسۋالدىق شەشىم زاڭدى كۇشىنە ەنەدى. قازىردىڭ وزىندە مۇنداي كەلىسپەۋشىلىك دەرەكتەرى وتە كوپ. مىسالى, ءبىر عانا نۇر-سۇلتان قالاسىندا پروكۋرورلار كەلىسپەگەن جەتى فاكت بار. بۇل مەحانيزمنىڭ ناقتى جۇمىس ىستەيتىنىن بىلدىرەدى. ال جاڭا فورمات اگەنتتىكتىڭ تەرگەۋ ورگاندارىن جاۋاپتى بولۋعا يتەرمەلەيدى», دەيدى.
سونىمەن قاتار م.احمەتجانوۆ سىبايلاس جەمقورلىققا قارسى قىزمەت سالاسىندا جۇمىس ىستەيتىندەردىڭ نازارىن قىلمىستىق ءىس جۇرگىزۋ كودەكسىنىڭ تالاپتارىن تولىقتاي ساقتاپ, ازاماتتاردىڭ كونستيتۋتسيالىق قۇقىقتارىن بۇزۋعا جول بەرمەۋ قاجەتتىگىنە اۋداردى.
اگەنتتىك قىزمەتكەرلەرى مەن پروكۋرورلاردىڭ ەلەكتروندى فورماتتا پروتسەسسۋالدىق شەشىمدەردى كەلىسۋدەگى ءوزارا ءىس-قيمىلىمەن تانىسقان عيزات نۇرداۋلەتوۆ جۇمىستىڭ جاڭا فورماتىنا تولىق كوشۋ كەزىندە كەزدەسەتىن تەحنيكالىق قاتەلىكتەردىڭ الدىن الۋدى تاپسىردى. زاڭدىلىقتى قامتاماسىز ەتۋ ءۇشىن ەنگىزىلگەن وزگەرىستەردىڭ باستى ەرەكشەلىكتەرىنە توقتالعان ەلىمىزدىڭ باس پروكۋرورى سونىمەن قاتار تەرگەۋ ساپاسىن ارتتىرۋ مەن جينالاتىن ماتەريالداردىڭ تولىقتىعىن قامتاماسىز ەتۋ بويىنشا جۇمىستى ودان ءارى جەتىلدىرۋدىڭ ماڭىزدىلىعىن اتاپ ءوتتى.
