بۇل جارىستى 2007 جىلدان بەرى تۇركيا مەملەكەتى ۇيىمداستىرىپ كەلەدى. ورالدىق جاس زەرتتەۋشىلەر تابيعي قوردى ساقتاۋ, قالدىقتى قايتا وڭدەۋ ماقساتىندا جىلقى كوڭىنەن قاعاز الۋ جولىن ۇسىندى. جاس عالىمدار جىلقى كوڭىنىڭ نەگىزىنەن اعاش قۇرامىندا كەزدەسەتىن تسەلليۋلوزادان تۇراتىنىنا نازار اۋدارعان. بۇل باعالى جانە سۇرانىسقا يە ماتەريالداردى سينتەزدەۋ ءۇشىن جانۋاردىڭ قيى, قاجەتتى اعاش ماسساسىن ءبولىپ الۋ ءۇشىن بىرنەشە حيميالىق زات قانا كەرەك ەكەن.
اۆتورلاردىڭ ايتۋىنشا, قالا تۇرعىندارى اراسىندا ساۋالناما جۇرگىزىلىپ, جوبانىڭ تەوريالىق جانە ەكسپەريمەنتتىك باعىتى تالدانعان.
زەرتتەۋ جۇمىسى قازىلار القاسى مۇشەلەرىنىڭ ەرەكشە قىزىعۋشىلىعىن تۋدىرعان. ويتكەنى بۇل جوبا قاعاز جاساۋ تەحنولوگياسى, ونىڭ ورمان قورىنا اسەرى, بالامالى شيكىزاتتى قولدانۋ مۇمكىندىگى جانە قاعازدى ۇنەمدەۋ ماسەلەلەرى تۋرالى ءبىلىمدى بىرىكتىرەدى. وسىعان وراي بايقاۋدىڭ قازىلار القاسى ءاديا مەن اسەمگە ارنايى سىيلىق – MILSET حالىقارالىق ءىس-شاراسىنا شاقىرۋ بەرگەن.
– قاعاز ۇلگىلەرىن الۋدا مەحانيكالىق ادىستەر قولدانىلدى, سوندىقتان ارنايى قاعازدى باستىرۋ قۇرالدارى مەن جەلىم, قوسپانىڭ كومەگىمەن ساپاسىن ءالى دە جاقسارتۋعا بولادى. ال مىنا ۇلگىنىڭ ساپاسى مايلىق پەن دارەتحانا قاعازدارى سيپاتتامالارى بويىنشا قاناعاتتانارلىق,– دەيدى ءاديا.
الداعى ۋاقىتتى جىلقى كوڭىنەن قاعازدى الۋ كەزەڭدەرىندە تولىقتىرعىشتار, جەلىمدەر ارقىلى ونىڭ قاسيەتتەرىن جاقسارتۋ, جىرتىلۋعا توزىمدىلىگى, ىلعالدى ورتادا ءىسىنۋى, وپتيكالىق قاسيەتتەرىن ستاندارتتى سىنامالار ارقىلى تەكسەرۋدى كوزدەپ وتىر. سونىمەن قاتار جىلقى كوڭىنەن الىنعان تسەلليۋلوزانى ىدىراتۋ ارقىلى بيوگاز الۋ جولىن زەرتتەۋ جانە ونىڭ ەكونوميكالىق ەسەبىن شىعارۋ دا الداعى كۇننىڭ ەنشىسىندە.
باتىس قازاقستان وبلىسى
