قارجى • 12 مامىر، 2021

بيىل مەديتسينالىق كومەك كورسەتۋگە 1،8 ترلن تەڭگە بولىنەدى – امسق باسشىسى

23 رەت كورسەتىلدى

2021 جىلعا ارنالعان ساتىپ الۋ جوسپارى بويىنشا حالىققا مەديتسينالىق كومەك كورسەتۋگە 1،8 ترلن تەڭگە، ونىڭ ىشىندە تمككك – 1،1 ترلن تەڭگە، ءمامس – 700 ملرد تەڭگە قاراستىرىلعان. بۇل تۋرالى وكق وتكەن بريفينگتە الەۋمەتتىك مەديتسينالىق ساقتاندىرۋ قورىنىڭ باسقارما توراعاسى بولات توكەجانوۆ حابارلادى، دەپ جازادى Egemen.kz.

«بيىل ءبىز ساقتاندىرۋ قاراجاتى تۇسىمدەرىنىڭ بولجامىن 150 ملرد تەڭگەگە ۇلعايتامىز. بۇل اقشانى قايدا جۇمساۋ ماڭىزدى؟ پاتسيەنت مەديتسينالىق ساقتاندىرۋ قورىمەن كەلىسىمشارت جاساسقان كەز كەلگەن كلينيكادا، ونىڭ قاي جەردە ورنالاسقانىنا جانە مەنشىك نىسانىنا قاراماستان، ساپالى مەديتسينالىق كومەك الۋى ءتيىس. 1 ساۋىردەگى جاعداي بويىنشا قور 1 363 مەديتسينالىق قىزمەت جەتكىزۋشىمەن شارت جاسادى، ونىڭ ىشىندە 688-ءى جەكە مەنشىكتى كلينيكالار، وتكەن جىلى ولاردىڭ سانى 635 بولدى. حالىققا مەديتسينالىق قىزمەت كورسەتۋ ءۇشىن تارتىلاتىن جەكە مەنشىك جەتكىزۋشىلەردىڭ ءوسۋ ءۇردىسى ساقتالۋدا. بۇل پاتسيەنتتىڭ ەڭ جاقسى كلينيكانى تاڭداۋ مۇمكىندىگى. مەديتسينالىق قىزمەتتەردى جەتكىزۋشىلەردىڭ ءتىزىمى قوردىڭ Fms.kz سايتىندا جاريالانعان»،  دەپ اتاپ ءوتتى بولات توكەجانوۆ. 

اۋىلدىق جەرلەردە مەديتسينالىق قىزمەتتەردىڭ قولجەتىمدىلىگىن ارتتىرۋ ءۇشىن وتكەن جىلى 100 جىلجىمالى مەديتسينالىق كەشەن ساتىپ الىندى، بيىلعى جىلى بارلىق اۋىل تۇرعىندارىنا 149 جمك قىزمەت كورسەتەدى، ولاردىڭ ىشىندە بەيىندى مامانداردىڭ كونسۋلتاتسيالارىن الۋعا، سكرينينگتەردى قوسا العاندا، دياگنوستيكادان وتۋگە، زەرتحانالىق تالداۋلار تاپسىرۋعا، ۆاكتسيناتسيا جاساۋعا، اۋرۋحاناعا جاتقىزۋعا جولداما الۋعا جانە مەديتسينالىق كومەكتىڭ بىرقاتار باسقا دا تۇرلەرىن الۋعا بولادى. ءبىرىنشى توقساندا «جىلجىمالى ەمحانالار» دەپ اتالاتىن ءموبيلدى مەديتسينالىق كەشەندەر ارقىلى اۋىل تۇرعىندارىنا 231،9 ملن تەڭگەگە 120 مىڭ مەديتسينالىق قىزمەت كورسەتىلدى.

بولات توكەجانوۆتىڭ ايتۋىنشا، ماقساتتى توپتاعى پاتسيەنتتەردى ءدارى-دارمەكپەن قامتاماسىز ەتۋگە ەرەكشە كوڭىل بولىنەدى. 2021 جىلى امبۋلاتوريالىق ءدارى-دارمەكپەن قامتاماسىز ەتۋگە 152،4 ملرد تەڭگە ءبولىندى، ونىڭ ىشىندە تمككك شەڭبەرىندە – 122،3 ملرد تەڭگە، ءمامس-30،1 ملرد تەڭگە. 

قور قاجەتتى ءدارى-دارمەك ساتىپ الۋداعى كىدىرىستەرگە جول بەرمەۋ ءۇشىن الدىن الا اۆانستىق تولەمدەر تۇرىندە ءدارى-دارمەكتەردى ساتىپ الۋعا قاراجات باعىتتايتىنى تۋرالى ايتا كەتكەن ءجون.

 

سوڭعى جاڭالىقتار

ۇقساس جاڭالىقتار