وسى ورايدا جاسىل جەلەكتى القاپتار كولەمىن ارتتىرۋ ماقساتىندا Siberian Wellness كومپانياسىنىڭ وكىلدىكتەرى ورنالاسقان ەلدەردە 25 گەكتار القاپقا اعاش وتىرعىزۋ جوسپارلانىپ وتىر. بۇل باستاماعا قازىرگى ۋاقىتتا بەلارۋس, قىرعىزستان, وزبەكستان جانە مولدوۆا قوسىلعان. وسى ورايدا كومپانيانىڭ قازاقستاندىق بولىمشەسى دە الماتىدا اعاش وتىرعىزۋدى قولعا الدى.
بۇگىندە الماتىدا 2,2 ملن-عا جۋىق جاسىل جەلەك, 1 427 گەكتار جاسىل القاپ بار. ماماندار ءبىر ادامدى وتتەگىمەن قامتاماسىز ەتۋ ءۇشىن 1,54 اعاشتىڭ قاجەت ەكەنىن ايتادى. ال ءبىر ءتۇپ اعاش ءبىر كولىكتەن شىققان ۋلى گازدى بويىنا ءسىڭىرىپ, 80 كگ زياندى زاتتار مەن 20 كگ شاڭدى بەيتاراپتاندىراتىن كورىنەدى. وسى ورايدا Siberian Wellness كومپانياسىنىڭ وكىلدەرى قازاقستاندا «25 گا» ناۋقانىنىڭ اياسىندا كادىمگى شاعاننىڭ 50 ءتۇبىن وتىرعىزدى.
«اعاش وتىرعىزۋعا قولايلى اۋماق رەتىندە نۇركەنت شاعىن اۋدانىنداعى «الماتى ارەنا» مۇز سارايىنىڭ ماڭىنداعى گۇلزار تاڭدالعان. بۇگىندە الاتاۋ اۋدانىندا 250 مىڭعا جۋىق ادام تۇراتىن بولسا, نۇركەنت شاعىن اۋدانىندا تۇراتىنداردىڭ باسىم كوپشىلىگىن جاستار قۇرايدى. كولىك بايلانىسىنىڭ تىعىزدىعىنا قاراماستان, بۇل اۋداندا پاركتەر مەن جاسىل جەلەكتەر سانى از ەكەن», دەپ اتاپ ءوتتى Siberian Wellness (قازاقستان) كومپانياسىنىڭ مەنەدجەرى اليا راپتاەۆا.
اتالعان شاعىن اۋدان ارقىلى رايىمبەك جانە رىسقۇلوۆ داڭعىلدارىمەن كولىك ءدالىزى وتەدى. رايىمبەك داڭعىلى الماتى-بىشكەك كولىك جولىنا ۇلاسىپ جاتسا, رىسقۇلوۆ داڭعىلى 2030 جىلعا قاراي ۇلكەن الماتى اينالما جولىمەن قوسىلادى. قالاعا كىرەتىن جۇك كولىكتەرىنىڭ سالماعى نەگىزىنەن وسى ەكى كوشەگە تۇسەدى. ال قالالار مەن وبلىستار اراسىن جالعاپ جاتقان كولىك دالىزىنەن قالاعا تارايتىن زياندى قالدىقتاردى جول جيەكتەرىندەگى جاسىل جەلەكتەر عانا ۇستاپ قالاتىنى انىق.
وڭتۇستىك استانادا جاڭادان وتىرعىزىلعان كوشەتتەر كوكتەپ كەتكەنشە, ولاردى كۇتىپ-باپتاپ, اپتاسىنا ەكى رەت سۋعارىپ وتىرۋ قاجەت. ال ءاربىر اعاشقا كۇتىم جاساۋ ءۇشىن جىلىنا 5 مىڭنان 20 مىڭ تەڭگەگە دەيىن قاراجات كەتەدى ەكەن. وسى ورايدا وتىرعىزىلعان اعاشتارعا كۇتىم جاساۋدى «الماتى-ارەنا» سارايىنىڭ ماماندارى ءوز جاۋاپكەرشىلىگىنە الىپ وتىر.
الماتى
