قوستاناي وبلىسى قاراسۋ اۋىلىنىڭ اكىمى عاسىرسەيىت قورجىنباەۆقا قىلمىسكەردى ۇستاۋعا كومەكتەسكەنى ءۇشىن ءىىم لوگوتيپى بار ساعات سىيلاپ, گراموتامەن ماراپاتتاعان.
ەسكە سالايىق, ادام ءولتىرۋ وقيعاسى قوستاناي وبلىسى امانگەلدى اۋدانى قاراسۋ اۋىلىندا بولعان. «102» پۋلتىنە پوليتسيا قىزمەتكەرلەرىن جىبەرۋ تۋرالى وتىنىشپەن جاسىرىن حابارلاما تۇسكەن. شاقىرتۋعا بارعان ۋچاسكەلىك پوليتسەي زورلىق-زومبىلىق بەلگىلەرى بار 55 جاستاعى اۋىل تۇرعىنىنىڭ ءمايىتىن تاپقان. سونداي-اق, پىشاق جاراقاتى سالدارىنان ەگدە جاستاعى ايەل اۋرۋحاناعا ءتۇستى. قىلمىس ورنىنا كەلگەن ۋچاسكەلىك پوليتسيا قىزمەتكەرى مەن اۋىلدىق وكرۋگ اكىمى كۇدىكتىنى ىزدەۋگە شىققان. كۋاگەرلەردىڭ ايتۋىنشا, كۇدىكتى تاسجولعا قاراي بەت العان.
اكىم ادام ولتىرگەن كۇدىكتىنى ۋچاسكەلىك پوليتسيا قىزمەتكەرىمەن بىرگە ۇستاعان. پوليتسيا وكىلدەرى تۇتقىنداۋ پروتسەسى قالاي وتكەنىن ايتىپ بەردى.
«47 جاستاعى ەر ادامنىڭ ىزىنە (كۇدىكتى) ۋچاسكەلىك پوليتسەي مەن اۋىل اكىمى تۇسكەن. اكىم كۇدىكتىنى بايقاپ, كومەك شاقىرعان. الايدا ەر ادام وزىنە جاراقات سالىپ ۇلگەرگەن. ول اۋداندىق اۋرۋحاناعا جاتقىزىلدى», دەدى قوستاناي وبلىستىق پوليتسيا دەپارتامەنتى وكىلدەرى.
