بەسىكتى ماڭىنداعى بەزىمياننوە سۋ قويماسىندا 2 مامىر مەن 9 مامىر ارالىعىندا 6,8 توننا بالىق قىرىلىپ, 25 توننادان استامى قۇتقارىلدى. اقتوعاي اۋىلىنىڭ جانىنداعى باقساي كانالىندا 4,6 توننا قاراكوز قىرىلىپ, 8,1 تونناسى قۇتقارىلدى. قۇرمانعازى اۋدانىنداعى شارون وزەنىندە 700 كگ بالىق جويىلدى. وندا بالىق تۇگەل قىرىلدى.
اتىراۋ وبلىستىق بالىق شارۋاشىلىعى باسقارماسىنىڭ باسشىسى ارتۋر سادىبەك ۇلىنىڭ ايتۋىنشا, بالىقتىڭ قىرىلۋىنا سۋدىڭ تايازدىعى مەن وتتەگى جەتىسپەۋشىلىگى باستى سەبەپ بولعان.
بەزىمياننوە مەن باقسايدا بالىق شارۋاشىلىعى سۋبەكتىلەرى بالىقتى مەليوراتسيالىق اۋلاۋ جۇمىستارىن باستادى. سونداي-اق, بالىق سايعا تۇسپەۋ ءۇشىن تورلار ورناتىلادى.
«كوكتەم باستالعاندا وبلىستىڭ بالىقتىڭ قىرىلۋ قاۋپى بار 52 سۋ قويماسىندا بالىق ۋىلدىرىق شاشۋعا كەدەرگىسىز كىرۋ ءۇشىن ارنالار مەن وزەن تارامدارىن تازارتۋ جۇمىستارى جۇرگىزىلدى. ايتا كەتۋ كەرەك, بۇل جۇمىستارعا بيۋدجەتتەن اقشا بولىنبەيدى», دەدى ا.سادىبەك ۇلى.
باسقارما باسشىسى بالىقتىڭ قىرىلۋىنا قۇقىق قورعاۋ ورگاندارى زاڭدى باعا بەرۋى كەرەك ەكەنىن ايتىپ, ارنايى قۇرىلعان كوميسسيانىڭ زەرتتەۋ ناتيجەسى بويىنشا بۇل ءىس بويىنشا قىلمىستىق قۇرام جوقتىعىن جەتكىزدى.
