ايماقتار • 12 مامىر، 2021

باتىس قازاقستاندا كيىكتىڭ كەسىرىنەن شارۋالار شىعىنعا باتىپ وتىر

18 رەت كورسەتىلدى

باتىس قازاقستاندا شارۋالار كيىكتىڭ كەسىرىنەن شىعىنعا باتۋدا. «جەرىمىزدى وتاپ، ءشوبىمىزدى تاپتاپ جاتىر» دەپ شۋ كوتەرگەن شارۋالار اقبوكەندەردى كوشىرۋدى نەمەسە رەزەرۆات قۇرىپ، كيىك سانىن شەكتەۋدى ۇسىندى. سەبەبى، كيىك سانى وبلىستىڭ سىيىمدىلىق دەڭگەيىنەن الدەقاشان اسىپ كەتكەن، دەپ حابارلايدى Egemen.kz Qazaqstan ارناسىنا سىلتەمە جاساپ.

باتىس قازاقستان وبلىسىنىڭ جانىبەك اۋدانىنى اۋماعىنداعى شارۋالار كيىكتىڭ كوپتىگىنەن زارداپ شەگىپ وتىرعان كورىنەدى.

بىلتىر پاندەميانىڭ كەسىرىنەن كيىك ساناعى جۇرگىزىلمەدى. 2019 جىلعى رەسمي دەرەك بويىنشا، ەلىمىزدە 334 مىڭ بوكەن بار. سونىڭ 80 پايىزى باتىستى مەكەندەيدى. سوڭعى 5 جىلدا دالا ەركەسىنىڭ سانى 10 ەسەگە ارتقان.

اشىنعان شارۋالار رەسمي دەرەكپەن كەلىسپەيدى. ولاردىڭ ايتۋىنشا بوكەننىڭ باسى جارتى ميلليوننان اسقان. كيىكتىڭ كوبەيگەنى كەسىر بولدى دەيدى ولار. مىڭداعان بوكەن ءجۇرىپ وتكەندە جايىلىم جەرلەردى جاپپاي وتاپ، ءشوپتى تاپتاپ كەتەدى، اقىرىندا شارۋالار مال باعا الماي وتىر.

«تابيعاتقا قارسى ەمەسپىز، كيىكتەر بولسىن. ءار زات مولشەرىنەن كوبەيسە، ءبارى دە زيان. بىلتىر قۋاڭشىلىققا قوسا، وسى كيىك بولدى، ءشوپ جيناي الماي وتىرمىز. بىزگە ۇكىمەت وسىعان كومەكتەسە مە، كيىكتەن كەلگەن زارداپتارىمىزدى سۋبسيديالاي ما؟»،  دەيدى جەرگىلىكتى شارۋا قوجالىعىنىڭ باسشىسى اليك دوسقاليەۆ.

اۋىل شارۋاشىلىعى مينيسترلىگىنىڭ مالىمەتىنشە، زاڭدا سۋبسيديا قاراستىرلماعان. كيىكتى كوشىرۋ دە مۇمكىن ەمەس. ايداعاننىڭ وزىندە وسى مەكەنگە قايتا ورالادى. ال باسىن شەكتەۋ ءۇشىن حالىقارالىق كەلىسىم كەرەك ەكەن.

«حالىقارالىق CITIS كونۆەنتسياسىنا سايكەس، قازاقستان كيىكتى زاڭدى تۇردە بولسا دا اتىپ، ونىڭ ءمۇيىزىن، ەتىن وندىرىسكە قولدانا المايدى. سەبەبى بىزدە نولدىك كۆوتا بەرىلگەن. 2022 جىلى ەۋروپادا CITIS جينالىسى وتەدى. سوندا قازاقستان ۇكىمەتى مەملەكەتتىك رەتتەۋگە كۆوتا بەكىتىپ الۋى كەرەك»، دەيدى ەكولوگ ساكەن دىلداحمەت.

قۇزىرلى ورگان كيىكتىڭ وبلىستىڭ سىيىمدىلىق دەڭگەيىنەن اسىپ وتىرعانىن راستاعان. وسىعان بايلانىستى، 7 جىل بۇرىن «بوكەيوردا» مەملەكەتتىك تابيعي رەزەرۆاتىن جانە «اششىوزەك» تابيعي قورىعىن قۇرۋ جوسپارلانعان ەدى، بىراق ماسەلە قاعاز كۇيىندە قالعان.

 

سوڭعى جاڭالىقتار

ستۋدەنتتەردىڭ ستيپەندياسى كوبەيەدى

ايماقتار • 11 ماۋسىم، 2021

ۇقساس جاڭالىقتار