ادەبي ساۋالدامامىزدىڭ كەزەكتى اۆتورى – حالىقارالىق «الاش» ادەبي سىيلىعىنىڭ لاۋرەاتى مارحابات بايعۇت.
– جازۋ جاعى جۇدەۋلى. جاداۋلى. بۇرناعى جىلى اجەپتەۋىر ەڭبەكتەنىپ ەدىك. ءبىر جىل بويى تىنىم تاپپاعانبىز. ۇيقى-كۇلكى كورمەگەنبىز. ء«بىر بەلدەۋ, ءبىر جول» حالىقارالىق ىنتىماقتاستىق باعدارلاماسى اياسىندا, قىتاي حالىق رەسپۋبليكاسىنىڭ «جىبەك جولى بويىنداعى ءجۇز قالا» جوباسى بويىنشا جانە قازاقستاننىڭ «رۋحاني جاڭعىرۋ» باعدارىنا سايكەس, قازجازوداق تاپسىرىسىمەن, ۇلى جىبەك جولىنىڭ تاريحي ءھام زاماناۋي جاۋھارى, شۋاقتى شاھارى جانە وزگەشە ءۋالايات حاقىندا «تۇركىلەر ءتورى تۇركىستان» اتتى كىتاپ جازعانبىز. تاريحي-كوركەم ەسسەلەر جيناعى. قازىر قىتايدا ءتارجىمالانىپ جاتسا كەرەك.
بىلتىر دا تۇركىستان قالاسى مەن وبلىسىن ناسيحاتتاۋعا پۋبليتسيستيكالىق دۇنيەلەرىمىز ارقىلى ءبىرشاما ۇلەس قوستىق-اۋ. 2005-2010 جىلدارى استاناعا ەكى-ءۇش اي بارماساق, تانىماي تاڭىرقاۋشى ەدىك قوي. بۇگىندە تۇركىستانىمىز تاپ سونداي جاعدايدا. قايناپ جاتقان قۇرىلىسىنا قاتىسپاساق تا, قالامىمىزبەن دەمەسەك دەيمىز.
ال ەندى «جازۋ جاعى جۇدەۋلى, جاداۋلى» دەپ مەڭزەپ, كەي-كەيدە مەڭ-زەڭ بولاتىنىمىزدىڭ سەبەبىنە كەلەيىك. شىنىمىزدى ايتساق, ءبىز پاقىرىڭىز تەك اۋليە جانر اڭگىمە جازعاندا عانا قاناعات تاپقانداي كۇي كەشەمىز. كوركەم اڭگىمە دەيتۇعىن ءدۇرري-گاۋھار دۇنيەنى جوندەپ جاراتا الماي, قينالىپ جۇرگەن كۇندەرىمىز كوبەيدى. بيىل ەڭ كەمى ەكى اڭگىمە جازارمىز دەپ ويعا سالعانبىز. ازىرشە وي-قيالداعى كۇيىندە.
ءابۋ ناسىر ءال-فارابي بابامىز: «اقشاعا قۇنىقپا, مانساپقا قۇنىقپا, ايەلگە قۇنىقپا», دەگەن عوي. «الايدا, قۇنىقپا دەگەنىمىز قىزىقپا دەگەنىمىز ەمەس», دەپ ءپالساپالاتىپ جالعاستىرادى. وسى قۇنىعۋ مەن قىزىعۋ تۋرالى ءبىر پەسا باستاپ ەدىك, جارتىسىنا جاقىنداعاندا, جىرتىپ تاستادىق. كەيدە قاعاز جىرتۋدىڭ ءوزى جۇيكە تىنىشتاندىراتىن سەكىلدى.
ەڭ نەگىزگى نيەتىمىز, باستى تىلەگىمىز – تۋعان ەلدىڭ, تۇتاس ادامزاتتىڭ اماندىعى. مىنا پالەكەت ىندەتتەن, ىندەت ارتقان مىندەتتەن ەرتەرەك ارىلتسا ەكەن. ەرتەرەكتە ءبىر ادەبي باسىلىمنان وقىعان مىناداي ءتامسىل ويعا ورالادى وسىندايدا. ءبىر ساليقالى پروزاشى مەن قىزبالاۋ اقىن بيىك تاۋدىڭ باسىندا تۇرىپتى. تومەندەگى تۋعان ەلگە, تۋعان جەرگە قاراپ, تولعانىپتى دەسەدى. ارقالى اقىنىڭىز:
– اي, اينالايىن, ەسىل ەلىم-اي! ەندى ءجۇز جىل وتكەندە مىنا مەندەي اسىل اقىندارىڭنىڭ اسىل ولەڭدەرىن وقىماي قور قىلاسىڭدار عوي, – دەپتى.
ال پروزاشى كۇرسىنىپ:
– اقىن باۋىرىم, مىنا بىزدەي جامان جازۋشى پەرزەنتتەرىنىڭ شىعارمالارىن وقىماسا دا, ءجۇز جىلدان كەيىن دە قايران جۇرتىمىز, ەسىل ەلىمىز ەسەن-امان بولسا ەكەن, – دەگەن.
اسقار سۇلەيمەنوۆ اعامىز: ء«ومىر – ءتان, ونەر – جان. ءتان تۇنشىققاندا – جان شىڭعىرادى», دەيدى.
ءتان تۇنشىعۋلى, جان شىڭعىرۋلى.
شىعارماشىلىق قۇپياڭىزبەن بولىسكەنىڭىزگە راحمەت.
