«ىشكى ىستەر ورگاندارىن جاڭعىرتۋ جول كارتاسى اياسىندا ۆەدومستۆولىق ءبىلىم بەرۋدىڭ ىرىكتەۋ, وقىتۋ, بىلىكتىلىگىن ارتتىرۋ جانە قايتا دايارلاۋ ماسەلەلەرىن جۇزەگە اسىرۋ بولىگى جاڭعىرتىلىپ جاتىر. قازىر ۆەدومستۆولىق ءبىلىم بەرۋ وڭتايلاندىرىلعان, وقۋ ورىندارى ولاردىڭ ماماندانۋىنا قاراي قالدىرىلدى. قاراعاندى اكادەمياسى تەرگەۋشىلەر مەن كريميناليستەردى, الماتى اكادەمياسى – جەدەل جانە تەحنيكالىق قىزمەتكەرلەردى, قوستاناي اكادەمياسى – اكىمشىلىك پوليتسيا جانە قىلمىستىق-اتقارۋ جۇيەسى قىزمەتكەرلەرىن, اقتوبە ينستيتۋتى – اكىمشىلىك پوليتسيا قىزمەتكەرلەرىن, شىمكەنت وقۋ ورتالىعى – مامانداندىرىلعان كۇزەت قىزمەتىن دايارلايدى», دەدى ا.نۇرىشەۆ مينيسترلىكتىڭ اپتالىق بريفينگتىندە.
سپيكەردىڭ ايتۋىنشا, جاڭعىرتۋ اياسىندا وقىتۋ تاسىلدەرى ايتارلىقتاي وزگەرگەن, ارنايى پوليتسيا تاكتيكاسى, ىشكى ىستەر قىزمەتكەرلەرىن پسيحولوگيالىق دايارلاۋ, اقپاراتتىق-كوممۋنيكاتسيالىق تەحنولوگيالار سىندى جاڭا ارنايى كۋرستار مەن پاندەر ەنگىزىلگەن. كادرلاردىڭ بىلىكتىلىگىن ارتتىرۋ جانە قايتا دايارلاۋ بولىگىندە قازىر بارلىق وقۋ ورىندارىندا ىشكى ىستەر ورگاندارىنىڭ قىزمەتكەرلەرىن پسيحولوگيالىق دايارلاۋ, حالىقپەن جۇمىستىڭ سەرۆيستىك فورماتى بويىنشا كۋرستار جۇرگىزىلەدى.
«باكالاۆريات باعىتى بويىنشا جوو-عا تۇسكىسى كەلەتىن تالاپكەر مىندەتتى تۇردە اۋماقتىق ىشكى ىستەر ورگاندارىنىڭ كادر قىزمەتتەرى ارقىلى نەمەسە تىكەلەي وقۋ ورىندارىنا ءوتىنىم بەرەدى. سونداي-اق ءوتىنىمدى ەلەكتروندى تۇردە بەرۋگە بولادى, وعان جەكە كۋالىكتىڭ كوشىرمەسى, فوتوسۋرەتتەر, ءومىربايان, ءبىلىمى تۋرالى قۇجاتتىڭ كوشىرمەسى قوسا بەرىلەدى. اۋماقتىق ىشكى ىستەر ورگانىنىڭ جانە وقۋ ورىندارىنىڭ كادر قىزمەتتەرى وقۋ كانديداتتارىن قاراستىرادى, مەديتسينالىق كۋالاندىرۋعا جىبەرەدى, ارنايى تەكسەرۋ جۇرگىزەدى جانە جەكە ىستەرىن 1 شىلدەگە دەيىن ءىىم-ءنىڭ ءتيىستى جوعارى وقۋ ورىندارىنا جىبەرەدى», دەيدى ا. نۇرىشەۆ.
وقۋعا ۇمىتكەرلەر ۇبت-نى 5 شىلدەگە دەيىن تاپسىرادى. ۇبت قازاقستان تاريحى, ماتەماتيكالىق ساۋاتتىلىق, وقۋ ساۋاتتىلىعى جانە ەكى بەيىندى ءپان بويىنشا وتكىزىلەدى. جاڭاشىلدىقتاردىڭ ءبىرى – قاراعاندى اكادەمياسىنا تۇسكىسى كەلەتىندەر كەز كەلگەن ەكى بەيىندىك ءپاندى تاڭداي الادى. ۇبت قورىتىندىسى بويىنشا كەمىندە 50 بالل, ونىڭ ىشىندە ءاربىر ءپان بويىنشا – كەمىندە 5 بالل جيناۋ قاجەت.
ۇبت تاپسىرعان سوڭ تالاپكەرلەر بەلگىلەنگەن مەرزىمگە سايكەس وقۋ ورنىنا كەلەدى. وقۋعا قابىلداۋدى جوو-نىڭ قابىلداۋ كوميسسياسى ءۇش كەزەڭدە ۇيىمداستىرادى: تۇپكىلىكتى مەديتسينالىق كۋالاندىرۋ, تالاپكەرلەردىڭ دەنە دايىندىعىن تەكسەرۋ, ۇلدار مەن قىزدار ءۇشىن: 100 جانە 1000 مەترگە جۇگىرۋ. ۇلدار بيىك بەلتەمىرگە تارتىلادى, ال قىزدار – 1 مينۋت بويى ارقادا جاتىپ دەنەنى كوتەرەدى. ءۇشىنشى كەزەڭ – مەديتسينالىق كورسەتكىشتەر مەن دەنە شىنىقتىرۋ دايىندىعىنىڭ ناتيجەلەرى بويىنشا ىرىكتەۋدى ەسكەرىپ, ۇبت قورىتىندىسىنا سايكەس تالاپكەرلەردى قابىلداۋ.
كانديداتتى قىزمەتكە جارامدىلىعىن انىقتاۋ ءۇشىن مەديتسينالىق جانە پسيحوفيزيولوگيالىق تەكسەرۋ, سونداي-اق كانديداتتى ارنايى ەسەپكە الۋ بازالارى بويىنشا تەكسەرۋ جۇرگىزىلەدى.
وقۋ ورىندارىنا ىرىكتەۋ دالالىق وقۋ لاگەرلەرىندە وتەدى. دەنە شىنىقتىرۋ دايارلىعى سىناقتارىنىڭ ناتيجەسىمەن كەلىسپەگەن كانديدات اپەللياتسياعا ءوتىنىش بەرۋگە قۇقىلى. اپەللياتسيالىق كوميسسيانى ءتيىستى وقۋ ورنىنىڭ باستىعى قۇرادى. ءوتىنىش ناتيجە جاريالانعاننان كەيىنگى كۇنى ساعات 13.00-گە دەيىن بەرىلەدى. ءوتىنىش تاۋلىك ىشىندە قارالادى. ءوتىنىش بەرگەن ءاربىر كانديدات ءبىر فيزيكالىق سىناقتى قايتا تاپسىرۋعا قۇقىلى.
