مۇعالىمنىڭ ءرولى مەن ماقساتى ايرىقشا ماڭىزدى
تمد-عا مۇشە مەملەكەتتەردىڭ مۇعالىمدەرى مەن ءبىلىم قىزمەتكەرلەرىنىڭ ءى سەزىنە قاتىسۋشىلارعا
تمد-عا مۇشە مەملەكەتتەردىڭ مۇعالىمدەرى مەن ءبىلىم قىزمەتكەرلەرى ءى سەزىنىڭ دەلەگاتتارى مەن مەيماندارىن شىن جۇرەكتەن قۇتتىقتايمىن!
سىزدەردىڭ وكىلەتتى فورۋمدارىڭىز پوستكەڭەستىك كەڭىستىكتىڭ ۇزدىك پەداگوگتارى مەن ءبىلىم ۇيىتقىلارىن, بەلگىلى وقىمىستىلارى مەن ادىسكەرلەرىن جيناپ وتىر.
ءبىرىنشى سەزدىڭ بىزدە قازاقستاندا ءوتىپ جاتۋىنىڭ نىشاندىق ءمانى بار. جۋىردا بۋداپەشتە بولعان ەۋروپا ەلدەرى ءبىلىم مينيسترلەرىنىڭ ءىى فورۋمىندا ورتالىق ازيا مەلەكەتتەرىنەن ءبىرىنشى بولىپ قازاقستان بولون دەكلاراتسياسىنا قوسىلدى. قازاقستان رەسپۋبليكاسىنىڭ ەقىۇ-عا توراعالىعى جىلىندا الىنعان بۇل شەشىمدى ورتالىق ازيا وڭىرىندە تۇراقتىلىق ايماعىن قالىپتاستىرۋ جانە ادام كاپيتالىن دامىتۋ ءجونىندەگى ءبىزدىڭ كۇش-جىگەرىمىزگە كورسەتىلگەن قولداۋ دەپ قابىلدادىق.
قازاقستان رەسپۋبليكاسى تمد ەلدەرى اراسىندا تەك ساۋدا-ەكونوميكالىق سالادا عانا ەمەس, سونىمەن بىرگە ءبىلىم بەرۋ سالاسىنداعى, عىلىمي-اعارتۋ دەگدارلارىنىڭ بايلانىستارىن نىعايتۋداعى بارىنشا كەڭ ىنتىماقتاستىقتى جاقتايدى.
الەمدىك داعدارىس جاعدايىندا ءبىزدىڭ ەلدەرىمىزدىڭ الدىندا تۇبەگەيلى الەۋمەتتىك-ەكونوميكالىق جاڭارۋ مىندەتتەرى تۇر, سوندىقتان دا وسىناۋ ۇزاق مەرزىمدى ماقساتتارعا قول جەتكىزۋدە ءبىلىمنىڭ ءرولى قاي كەزدەگىدەن دە جوعارى. ءبىزدىڭ ەلدەرىمىزدە مۇعالىمنىڭ جانە ساپالى ءبىلىمنىڭ ءرولى مەن ماقساتىنىڭ زور ماڭىزدىلىعىن تۇسىنۋشىلىك بار ەكەنىن مەن قاناعات سەزىمىمەن اتاپ وتەمىن, ونىڭ دالەلى وسى سەزدىڭ وتكىزىلۋى بولىپ تابىلادى.
سىزدەردىڭ فورۋمدارىڭىزدىڭ جۇمىسىندا دوستاستىقتىڭ ءبىرتۇتاس ءبىلىم كەڭىستىگىنىڭ قالىپتاسۋىنا, ونىڭ ءتيىمدى قىزمەت ەتۋىنىڭ ناقتى تەتىكتەرىنىڭ جاسالۋىنا ايرىقشا كوڭىل ءبولىنۋى ءتيىس دەپ ەسەپتەيمىن.
ءاربىر مەكتەپ, جوو نەمەسە عىلىمي-زەرتتەۋ ينستيتۋتى, بۇكىل ءبىلىم بەرۋ جۇيەسى مەن تۇتاستاي عىلىم ءبىزدىڭ مەملەكەتتەرىمىزدىڭ ينتەللەكتۋالدىق جانە كاسىبي الەۋەتى تۇراقتى وسۋىنە جاعداي جاساۋى ءۇشىن بىزگە ءار مۇعالىمنىڭ, وقىتۋشى مەن عالىمنىڭ جۇمىسىندا بارىنشا تيىمدىلىك پەن جاۋاپكەرشىلىككە قول جەتكىزۋ قاجەت. وسى زامانعى مەكتەپ وقۋشىسى مەن ستۋدەنتتىڭ تولىقماندى جانە جاۋاپكەرشىلىكپەن وقۋعا دەگەن جەكە ۇمتىلىسىن تۋىنداتۋ مىندەتىنىڭ ماڭىزى بۇدان ەش كەم ەمەس.
قولعا الىنىپ جاتقان شارالار دوستاستىق ەلدەرىندەگى ءبىلىم ساپاسىنىڭ جانە ءبىزدىڭ وقۋ ورىندارى تۇلەكتەرىنىڭ حالىقارالىق دەڭگەيدەگى باسەكەگە قابىلەتتىلىگىنىڭ ارتۋىنا مىندەتتى تۇردە اسەر ەتەدى دەگەن سەنىمدەمىن. بۇل ورايدا ءبىلىم بەرۋ جانە عىلىم سالالارىن بەلسەندى دامىتىپ وتىرعان قازاقستاننىڭ ءتاجىريبەسى تمد بويىنشا بارلىق ءبىزدىڭ ارىپتەستەرىمىزگە پايدالى بولادى.
دوستاستىققا قاتىسۋشى مەملەكەتتەردىڭ مۇعالىمدەرى مەن ءبىلىم قىزمەتكەرلەرىنىڭ سەزى ءبىلىم بەرۋدى دامىتۋدىڭ شەشۋشى ماسەلەلەرى بويىنشا بەدەلدى پىكىرتالاس الاڭدارىنىڭ ءبىرى بولا الادى. سىزدەردىڭ فورۋمنىڭ جۇمىسى بارىسىندا سىندارلى پىكىر الماسۋ وتەدى, سونىڭ نەگىزىندە پراكتيكادا قاجەت ۇسىنىستار ازىرلەنەتىن بولادى دەپ ۇمىتتەنەمىن.
سەزدىڭ بارلىق قاتىسۋشىلارىنا جەمىستى پىكىرتالاس جانە تابىستى شىعارماشىلىق جۇمىس تىلەيمىن!
قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆ.
ەل تاۋەلسىزدىگىن العاننان كەيىن “وقۋسىز حالىق قانشا باي بولسا دا, ءبىراز جىلداردان كەيىن ونىڭ بايلىعى ونەرلى حالىقتاردىڭ قولىنا كوشپەكشى”, دەپ ۇلت ۇستازى احمەت بايتۇرسىن ۇلى ايتقانداي, ءبىلىم جارىسىنسىز وتانىمىزدى وركەندەتۋ استە مۇمكىن ەمەستىگىن ايقىن اڭعارعان. ەلباسى نۇرسۇلتان نازارباەۆ ءححى عاسىر ءبىلىم جانە عىلىم عاسىرى بولادى دەپ, جاستاردىڭ جان-جاقتى وقۋىنا بارلىق مۇمكىندىكتى جاساۋدا. جالپى, ءبىلىم بەرۋ مەن عىلىمدى وركەندەتۋدە وقشاۋلانۋدىڭ ناتيجە بەرمەيتىنى انىق. ءار مەملەكەت ءوزىنىڭ ۇلتتىق مەنتاليتەتىنە قاراي الەمدىك وركەنيەتتىڭ وزىعىن الىپ, توزىعىن ىسىرىپ تاستاپ وتىرسا, ۇتىلمايدى. جەتپىس جىلدان اسا بيلىك قۇرعان كەڭەستىك ءداۋىر كۇيرەگەننەن كەيىن تاۋەلسىز مەملەكەتتەر ءبىراز ۋاقىتقا دەيىن وزدەرىمەن ءوزدەرى بولىپ, وتان ىرگەسىن بەكىتۋ ىسىمەن اينالىسسا, ەندى الەمدىك ۇردىستەگى جەتىستىكتەردى ورتاق پايدالانا وتىرىپ, جەتىلدىرۋ جايى, اسىرەسە تمد مەملەكەتتەرىنىڭ اۋقىمىندا سوڭعى جىلدارى قولعا الىنا باستادى. سونىڭ ءبىرى تمد مەملەكەتتەرى ءبىلىم قىزمەتكەرلەرى مەن مۇعالىمدەرىنىڭ القالى جيىنىن وتكىزۋ ەدى. بۇل فورۋم تۋرالى يدەيا تۇڭعىش رەت 2008 جىلى تمد ەلدەرى ءبىلىم مينيسترلەرىنىڭ باسقوسۋىندا قوزعالىپ, ەكى جىلدان كەيىن قازاق ەلىنىڭ ەلورداسىندا وتكىزۋدى ءبىراۋىزدان ماقۇلداعان بولاتىن. سول يگىلىكتى ءىس, ياعني تمد ەلدەرى مۇعالىمدەرى مەن ءبىلىم قىزمەتكەرلەرىنىڭ ءبىرىنشى سەزى كەشە ەلوردامىزدا زامان تالابىنا ساي بوي كوتەرگەن كورمە زالىندا ءوز جۇمىسىن باستادى. بۇل قۇرىلتايعا ءبىزدىڭ وتانىمىزدىڭ ءبىلىم جانە عىلىم مينيسترلىگى, تمد-عا قاتىسۋشى ەلدەردىڭ گۋمانيتارلىق ىنتىماقتاستىق جونىندەگى كەڭەسى, مەملەكەتارالىق قور ۇيىتقى بولعانىن ايتا كەتسەك دەيمىز. القالى ءماجىلىستىڭ الدىندا سەزد دەلەگاتتارى مەن شاقىرىلعان قوناقتار وسى كۇنگى ءبىلىم بەرۋ جۇيەسىندەگى قول جەتكەن جەتىستىكتەردى دايەكتەيتىن كورمەنى ارالادى. كورمەگە ەلىمىزدىڭ ءىرى قالالارى مەن وبلىستارى, عىلىمي مەكەمەلەر, وقۋ ورتالىقتارى, كىتاپ شىعاراتىن باسپالار, ءار الۋان باسىلىمدار وزدەرىنىڭ زامان تالابىنا ساي جيناقتاعان تاحنيكالىق قۇرال-جابدىقتارىن, وقۋلىقتار مەن ادىستەمەلەرىن قويعان ەكەن. بۇل كورمە ءبىرىنشىدەن, كەلۋشىلەردى قىزىقتىرسا, ەكىنشىدەن, تاجىريبە الماسۋعا, وي ءبولىسىپ, پىكىر ۇشتاستىرۋعا مول مۇمكىندىك جاساعانىن ايتا كەتكەنىمىز ءجون. سەزدە قازاقستان پرەزيدەنتى نۇرسۇلتان نازارباەۆتىڭ ارنايى قۇتتىقتاۋى وقىلدى. (قۇتتىقتاۋ گازەتتە جاريالانىپ وتىر). سول سەكىلدى سەزگە ارنايى جولداعان رەسەي فەدەراتسياسىنىڭ پرەزيدەنتى دميتري مەدۆەدەۆتىڭ, بەلارۋس رەسپۋبليكاسىنىڭ پرەزيدەنتى الەكساندر لۋكاشەنكونىڭ, تاجىكستان رەسپۋبليكاسىنىڭ پرەزيدەنتى ەمومالي راحموننىڭ قۇتتىقتاۋ جەدەلحاتتارى سەزد دەلەگاتتارىنا تانىستىرىلدى. قازاقستان رەسپۋبليكاسى پارلامەنتى سەناتىنىڭ توراعاسى قاسىم-جومارت توقاەۆ سەزدە العاشقى ءسوز كەزەگىن الىپ, بۇل جيىننىڭ ءبىزدىڭ ەلىمىزدىڭ باستاماسى بويىنشا ءوتىپ وتىرعانىن, سەزد دوستاستىق اياسىنداعى ءبىلىم بەرۋ مەكەمەلەرىنىڭ ىنتىماقتاستىعىنا سەرپىن بەرەتىنىن اتاپ ءوتتى. پرەزيدەنت نۇرسۇلتان نازارباەۆتىڭ اركەز تمد مەملەكەتتەرىنىڭ اراسىندا ينتەگراتسيانى دامىتۋ, اسىرەسە ەكونوميكا, گۋمانيتارلىق سالالار, مادەني, جاڭا عىلىمي بايلانىستاردى دا ءوزارا تۇسىنىستىك پەن دوستىق نەگىزدە ودان ءارى نىعايتۋدى العا تارتىپ كەلە جاتقانىن ايتىپ, توراعا جاراستىلىستانۋ عىلىمدارى بويىنشا بىرىڭعاي ۇلگىدەگى وقۋلىقتار شىعارۋ, سونداي-اق وقۋ ۇدەرىستەرىن ءبىر دەڭگەيلەندىرۋ جونىندەگى بىرلەسكەن جۇمىستاردىڭ وزەكتىلىگىنە توقتالدى. ول سونىمەن بىرگە جاستاردى وتانشىلدىق رۋحتا تاربيەلەۋ تۋرالى وي وربىتە كەلە, قۇرىلتايدا ۇرپاققا ءبىلىم بەرىپ, تاربيە ۇيرەتۋگە ارقاۋ بولاتىن پاراساتتى ويلار قوزعالىپ, ول بىرتە-بىرتە جۇزەگە اساتىنىنا سەنىم ءبىلدىردى. بۇدان كەيىن ءسوز العان پرەمەر-مينيستردىڭ ورىنباسارى ەربول ورىنباەۆ: قىتاي ەلىندە ء“بىر جىلدىق جوسپار قۇرعان –كۇرىش ەگەر, ون جىلدىق جوسپار قۇرعان – اعاش وتىرعىزار, ومىرلىك جوسپار قۇرعان – ۇرپاعىن بىلىممەن سۋسىنداتار” – دەگەن ماتەل بار. شىنىندا دا بۇل ماتەلدىڭ شىنايى ماعىناسى ەلوردا تورىندە ەكى كۇن بويى وتەتىن وسى سەزدە ناقتى ايشىقتالا تۇسەتىنى اقيقات, دەدى. ول سونىمەن بىرگە, بۇگىن مەن ەرتەڭگى كۇننىڭ ءبىلىم كوكجيەگى, كەمەل بولاشاعى بيوتەحنولوگيا, ينفورماتيكا, نانوتەحنولوگيا جانە عىلىمنىڭ باسقا دا سالالارىنا نەگىزدەلگەن جاڭا اقپاراتتىق تولقىننان تۇراتىن باسەكەلى ءبىلىم جۇيەسى بولىپ تابىلاتىنىن, بۇل مەملەكەتتەر اراسىنداعى ءوزارا ىقپالداستىق پەن قارىم-قاتىناستىڭ قانات جايىپ دامۋىنا, تۇراقتى ەكونوميكالىق الەۋەتكە دە زور ىقپال جاسايتىنىن, ورتاق ماقساتقا ۇمتىلۋ – قازىرگى جانە بولاشاقتىڭ بەرىك نەگىزى – ەكەنىن ەسكە سالدى. حالىقارالىق ەكونوميكا رىنوگىندە باسەكەلەستىككە توتەپ بەرۋ, ونى جەتىلدىرۋ ءۇشىن جاڭا اقپاراتتىق تەحنولوگيانىڭ بەرەر كومەگى ۇشان-تەڭىز. سول سەبەپتى دە بىرلەسكەن ءبىلىم بەرۋ جۇيەسىن قالىپتاستىرۋدا وسى سالاعا وتە مۇقياتتىلىقپەن جانە زور ۇمىتپەن قاراعان ابزال, دەگەن ول 2015 جىلى الەمنىڭ ەكونوميكا جۇيەسىندە جاڭا تەحنولوگيا بازاسىنىڭ مىقتاپ شوعىرلانۋى ءتيىمدى جوبالاردى ىسكە اسىرۋعا وزىندىك كومەگىن تيگىزەتىندىگىن تىلگە تيەك ەتتى. سونىمەن قاتار, الداعى ونجىلدىقتا ادامزات كاپيتالىنىڭ دا ماڭىزى ارتا تۇسەتىندىگىنە ارنايى توقتالدى. ادامزات كاپيتالىنداعى ءبىلىمدى مامانعا, كاسىبي تۇعىرى جوعارى قىزمەتكەرلەرگە جاھاندىق ءباسەكەنىڭ جوعارىلايتىنىن, ءبىلىم بەرۋ كەڭىستىگىندەگى تاجىريبەلەر الماسۋ مەن ءوزارا سەرىكتەستىك تەك قانا ءبىلىم سالاسىن عانا ەمەس, سونداي-اق ينتەگراتسيالىق ۇدەرىستەردەگى جاڭا سەرپىلىستەرگە مۇمكىندىك بەرەتىنىن مەكتەپ پەن جوعارى وقۋ ورىندارىندا وقۋ ءۇردىسىن ساپالى دەڭگەيگە جەتكىزۋ كادر الەۋەتىن ارتتىراتىنى تۋرالى ءوز ويىن ورتاعا سالدى. باس پروكۋرور قايرات ءمامي, جوعارعى سوتتىڭ توراعاسى مۇسابەك الىمبەكوۆ بولسا, ءبىلىم قىزمەتكەرلەرىنىڭ بۇل قۇرىلتايى مەملەكەتتەر اراسىنداعى بەرىك دوستىققا دانەكەر بولاتىنىن العا تارتتى. جوعارىدا ايتىلعان پىكىرلەرگە تمد-عا قاتىسۋشى ەلدەردىڭ ءبىلىم سالاسىنداعى ىنتىماقتاستىعى جونىندەگى كەڭەسىنىڭ توراعاسى ۆاسيلي ستراجەۆ تا تولىعىمەن كەلىسە وتىرىپ, وزىندىك ويلارىن دا ورتاعا سالدى. “بۇگىنگى ءوتىپ جاتقان تمد ەلدەرىنىڭ ءبىلىم سالاسى قىزمەتكەرلەرىنىڭ ءى سەزى – بۇل تەك قانا وسى سالا قىزمەتكەرلەرىنىڭ باس قوسۋى عانا ەمەس, جالپى تمد ەلدەرىنىڭ اسا ماڭىزدى وقيعاسى بولىپ تاريحتا قالماق. وسى ارقىلى ءبىلىم سالاسىن جوعارى ءارى ساپالى دەڭگەيگە كوتەرىپ, جاڭاشا مازمۇنعا, سەرپىندى جەتىستىكتەرگە جەتەتىنىمىز انىق. الەمنىڭ ەكونوميكالىق-الەۋمەتتىك دامۋى ءۇشىن تەرەڭ ءبىلىم كەرەك دەگەن ويدى ەشكىم جوققا شىعارا المايدى. سول سەبەپتى جاھاندانۋ ۇدەرىسىندە ءبىلىم دەڭگەيىنىڭ وركەندەۋى, اقپاراتتىق تەحنولوگيالاردىڭ دامۋى, ءبىلىم بەرۋ كەڭىستىگىنىڭ مودەرنيزاتسيا قۇرالىنا اينالۋى ۇلتتىق ءبىلىم مەن عىلىم جۇيەسىن زور تابىستارعا, مىقتى باسەكەگە الىپ كەلەتىنىنە سەنىمىمىز مول. ءوزارا تاجىريبەلەر الماسۋ بارىسىندا ءبىز تەك قانا كاسىبي تۇرعىدا ءبىلىم بەرەتىن جوعارى وقۋ ورىندارىمەن عانا شەكتەلمەۋىمىز كەرەك. سونىمەن قاتار, تمد ەلدەرىنىڭ مەكتەپ وقۋشىلارى اراسىنداعى ىقپالداستىقتى ءتۇرلى حالىقارالىق دەڭگەيدەگى ءىس-شارالار, بايقاۋلار, وليمپيادالار ارقىلى جۇزەگە اسىرعانىمىز ءتيىمدى” – دەدى ۆاسيلي سراجەۆ. فورۋمعا ءازىربايجان, ارمەنيا, بەلارۋس, قازاقستان, قىرعىزستان, مولدوۆا, رەسەي, تاجىكستان ەلدەرىنەن كەلگەن 500-دەن استام دەلەگات قاتىستى. ولاردىڭ قاتارىندا گۋمانيتارلىق ىنتىماقتاستىق ءجونىندەگى مەملەكەتارالىق قوردىڭ اتقارۋشى ديرەكتورى ارمەن سمباتيان, رەسەي فەدەراتسياسىنىڭ ءبىلىم جانە عىلىم ءمينيسترى اندرەي فۋرسەنكو, تاجىكستان رەسپۋبليكاسىنىڭ ءبىلىم ءمينيسترى ابدۋجاببور راحمونوۆ, ارمەنيا رەسپۋبليكاسىنىڭ ءبىلىم جانە عىلىم ۆيتسە-ءمينيسترى مانۋك مكرتچيان, بەلورۋسسيا رەسپۋبليكاسىنىڭ ءبىلىم ۆيتسە-ءمينيسترى كازيمير فارينو, قىرعىز رەسپۋبليكاسىنىڭ ءبىلىم جانە عىلىم مينيسترلىگىنىڭ ستاتس-حاتشىسى اكۋنجان ابدراشەۆ, تاعى باسقالار بار. جيىندا ءبىلىم جانە عىلىم ءمينيسترى جانسەيىت تۇيمەباەۆ “قازاقستان ءبىلىم بەرۋ جۇيەسىن تمد-عا قاتىسۋشى ەلدەرمەن ىنتىماقتاستىق جاعدايىندا دامىتۋدىڭ بولاشاعى: ءوسۋ جانە جاناسۋ مۇمكىندىكتەرى” دەگەن تاقىرىپتا بايانداما جاسادى. تمد ەلدەرى شەڭبەرىندەگى ىنتىماقتاستىق تاجىريبەسى ءبىلىم سالاسىنداعى تەڭ قۇقىلى جانە ءوزارا ءتيىمدى ارىپتەستىكتى دامىتۋ ءۇشىن بارلىق مۇمكىندىك بار ەكەنىن كورسەتىپ بەردى. تۇڭعىش رەت ءوتىپ وتىرعان دوستاستىق ەلدەرى مۇعالىمدەرىنىڭ, پەداگوگتارىنىڭ, جالپى ءبىلىم بەرۋ سالاسى قىزمەتكەرلەرىنىڭ باسىن قوسىپ وتىرعان جيىن ءبىلىم بەرۋدى دامىتۋدىڭ بولاشاعىن, ينتەگراتسيالىق پروتسەستەردى تالقىلاۋدا ماڭىزدى ءرول اتقارادى. بۇل تۇرعىدان كەلگەندە دوستاقتىق ەلدەرى ءبىلىم قاۋىمداستىقتارى اراسىنداعى قارىم-قاتىناس جولدارى تۋرالى مازمۇندى پىكىر الماسۋ قاجەتتىلىگىنىڭ تۋعانىن ۋاقىت كورسەتىپ بەردى. فورۋمعا قاتىسۋشىلار مۇعالىم كاسىبىنىڭ مارتەبەسىن ارتتىرىپ, ۇلتتىق ءبىلىم جانە عىلىم جۇيەسىندەگى ىنتىماقتاستىقتىڭ جاڭا باعىتىن ايقىنداي وتىرىپ, ونى دامىتۋ جولدارىن تىلگە تيەك ەتتى. سونىمەن قاتار, تمد-عا قاتىسۋشى ەلدەر ىنتىماقتاستىعى اياسىندا قازىرگى زامانعى ءبىلىم ساپاسىن ارتتىرۋ جولىنداعى ىزدەنىستەرى, ۇلتتىق ءبىلىم جۇيەسىنىڭ ەرەكشەلىكتەرىن ەسكەرە وتىرىپ, دامىتۋ ماسەلەسى جان-جاقتى اڭگىمە ارقاۋىنا اينالدى. ءبىلىم ۇدەرىسىندەگى پەداگوگيكالىق عىلىمنىڭ نورماتيۆتىك, وقۋ-مەتوديكالىق سۇيەمەلدەۋگە قوسار ۇلەسى مەن پروبلەمالارى تالقىلاندى. ۋاقىت تالابىنا ساي جاڭا وقۋلىقتار ازىرلەۋ, ونىڭ پروبلەمالارى مەن بولاشاعى, مەكتەپتىك ءبىلىم بەرۋدى قامتۋداعى مۇعالىمنىڭ ءرولى, كاسىپتىك وقىتۋداعى مەكتەپتىك جانە جوعارى ءبىلىمنىڭ ءوزارا ساباقتاستىعى ماسەلەلەرى دە ءسوز بولدى. قۇرىلتايدان كەيىن تمد مەملەكەتتەرى ءبىلىم سالاسىنىڭ باسشىلارى اقپارات قۇرالدارىنىڭ وكىلدەرىمەن جۇزدەسىپ, سۇراقتارعا جان-جاقتى جاۋاپ بەردى. تمد-عا قاتىسۋشى ەلدەردىڭ ءبىلىم سالاسىنداعى ىنتىماقتاستىعى جونىندەگى كەڭەستىڭ توراعاسى ۆاسيلي سترياجەۆ ستۋدەنتتەر الماسۋ جونىندە قازىر جەتى مەملەكەتتىڭ ءوزارا ىنتىماقتاستىققا پەيىلدى ەكەنىن ايتىپ, بۇل سەزدە 20 جىلعا تاياۋ ۋاقىت ءىشىندە قول جەتكەن جەتىستىگىمىز قايسى, كەمشىلىگىمىز نەدە دەگەن سۇراققا جاۋاپ ىزدەيتىن بولدىق دەسە, گۋمانيتارلىق ىنتىماقتاستىق جونىندەگى مەمەلەكەتارالىق قوردىڭ اتقارۋشى ديرەكتورى ارمەن سمباتيان قازاقستان پرەزيدەنتى نۇرسۇلتان نازارباەۆتىڭ ءبىلىم ەكونوميكاسى جونىندەگى يدەياسىن قولدايتىنىن, ءبىلىم بەرۋدەگى شەبەرلىكتى ارتتىرۋ, عىلىم يننوۆاتسياسىن جەتىلدىرە بەرۋ جايىن قوزعاپ, ءومىر بويعى وقۋدىڭ بەرەتىن پايداسى تۋرالى دالەلدى دايەكتەر كەلتىردى. ال, تمد مەملەكەتتەرى اۋماعىندا كۇن كەشىپ جاتقان قانداستارىمىزدىڭ جايى تۋرالى قويعان سۇراقتارعا ەلىمىزدىڭ ءبىلىم جانە عىلىم ءمينيسترى ج.تۇيمەباەۆ جاۋاپ بەردى. ونىڭ ايتۋىنشا, وسى سەزدە كوتەرىلەتىن ءبىر ماسەلە – جاقىن شەتەلدەردە تۇرىپ جاتقان باۋىرلارىمىزدىڭ انا ءتىلىن ۇمىتپاۋعا جاعداي جاساۋ, ەڭ باستىسى فاكۋلتاتيۆتىك ساباقتاردى وقىتا وتىرىپ, مەكتەپتەر اشۋ ماسەلەسى قوزعالماق. وقۋلىقپەن قامتاماسىز ەتۋ جاعى ءبىزدىڭ ەلىمىزدىڭ قاتىسۋىمەن شەشىلگەنى دە وڭ بولماق. سول سەكىلدى وسى باسقوسۋدا يگىلىكتى ءىستى ۇيلەستىرىپ وتىراتىن يننوۆاتسيالىق مەكتەپتەر وداعى, بولماسا بىرلەستىك قۇرۋ جاعى دا قاراستىرىلماق ەكەن. تاجىكستاننىڭ ءبىلىم ءمينيسترى ا.راحمونوۆ بولسا قازاق ەلىندە ءوز مەملەكەتىنەن كەلىپ جۇزدەگەن ستۋدەنتتىڭ وقىپ جاتقانىن تىلگە تيەك ەتە كەلىپ, مەكتەپ وقۋشىلارىنىڭ ۇلتتىق بىرىڭعاي تەست تاپسىراتىن قازاقستاندىق ۇلگىگە ەرەكشە ىلتيپاتپەن قارايتىنىن العا تارتتى. ءباسپاسوز ءماسليحاتىنا قاتىسۋشى قوناقتار تمد مەملەكەتتەرىن ءبىلىم سالاسى بويىنشا ىنتىماقتاستىققا شاقىرىپ وتىرعان قازاقستاننىڭ پرەزيدەنتىنە, وزگە دە ازاماتتارىنا شىنايى ريزاشىلىعىن ءبىلدىردى. ەكى كۇنگە جوسپارلانعان قۇرىلتاي ءوز جۇمىسىن بۇگىن اياقتايدى. سۇلەيمەن مامەت, قاراشاش توقسانباي, اراي ۇيرەنىشبەكقىزى.
