ايماقتار • 11 مامىر، 2021

كاسىپورىنداردا ەكپە الۋ باسەڭ

15 رەت كورسەتىلدى

بۇل ماسەلە ىندەت تارالماۋىنا وراي قۇرىلعان ءىس-قيمىل جونىندەگى وڭىرلىك شتابتىڭ وتىرىسىندا ايتىلدى. شتاب وتىرىسىندا جاريالانعان مالى­مەتتەرگە سايكەس، وبلىستاعى ءىرى كاسىپورىنداردا ۆاكتسينالاۋ وزگە مەكەمە، باسقارمالارمەن سالىستىرعاندا تومەن دەڭگەيدە جۇرگىزىلىپ جاتىر.

ال ەپيدەميالىق جاعدايدى باعالاۋ ماتريتساسىنا سايكەس، پاۆلودار وبلىسى 26 ساۋىردەن باستاپ «قىزىل ايماق» قاتارىنا قوسىلدى. وبلىس اۋماعىندا ىندەت تارالۋىنىڭ وسۋىنە بايلانىس­تى باس سانيتارلىق دارىگەردىڭ جاڭا قاۋلىسى 3 مامىردان باستاپ كۇشىنە ەندى.

دەنساۋلىق ساقتاۋ باسقارماسىنىڭ باسشىسى ايدار سەيىتقازينوۆتىڭ ايتۋىنشا، ۆاكتسينانىڭ ءبىرىنشى كوم­پونەنتىن وبلىستا 54 مىڭنان استام، ال ەكىنشى كومپونەنتىن – 16 مىڭ­نان استام ادام قابىلداعان. شتاب وتى­رىسىنا قاتىسقان ءىرى كومپانيا­لاردىڭ وكىلدەرىنە مەديتسينا قىز­مەت­كەرلەرىنىڭ ۆاكتسينالاۋ ءۇشىن ءوندى­رىس ورىندارىنا بارۋعا دايىن ەكەنى، ەرىكتىلەردىڭ ءتىزىمىن جاساپ، دارى­گەر­لەردى شاقىرتۋ جايلى ەسكەرتىلدى.

وڭىردەگى ءىرى كاسىپورىنداردا، اتاپ ايتقاندا «قازاقستان اليۋميني» اق، «قازاقستان ەلەكتروليز زاۋىتى» اق، اقسۋ، ەكىباستۇز قالالارىنداعى بىرنەشە ءىرى كاسىپورىننىڭ ارقايسى­سىندا كەمىندە 6-7 مىڭ ادام ەڭبەك ەتەتىنىن ەسكەرسەك، ۇجىمدىق قاۋىپ­سىزدىك ۇجىمدىق يممۋنيتەتتى قالىپ­تاستىرۋدان باستالاتىنى تۇسىنىكتى.

«KAZ Minerals» توبىنىڭ وكىلدەرى ەكىباستۇزداعى بوزشاكول كەن ورنىندا ىندەتكە قارسى ۆاكتسينا سالۋ ۋاقىتى باستالعانى تۋرالى حابارلادى. كاسىپورىنداعى كەزەڭ-كەزەڭ­مەن ۆاكتسينالاۋدى دەنساۋلىق ساقتاۋ باس­قارماسىنىڭ قولداۋىمەن ەكىباس­تۇز قالاسىنىڭ ەمحاناسى جۇرگىزەدى. ءبىرىنشى كەزەڭدە «KAZ Minerals Bozshakol»-ءدىڭ 200 قىزمەتكەرى مەن مەر­دى­گەرىن ۆاكتسينالاۋ جوسپارلانعان. كەلەسى ۆاكتسينالاۋدىڭ ۋاقىتى ۆاكتسينالاردى جەتكىزۋگە بايلانىستى وتەدى.

ال 2016 جىلى جۇمىسىن باستاعان بوزشاكول كەن ورنى – حالىقارا­لىق مىس ءوندىرۋشى كاسىپورىنداردىڭ ءبى­رى. بوزشاكول دالاسى التىن، كۇمىسكە باي. جالپى كەن وڭدەۋ قۋاتى جىلىنا 30 ملن توننا كەندى قۇرايدى. ءوندىرىس كولەمى العاشقى 10 جىلدا جىل سايىن 100 مىڭ توننا مىستى جانە 120 مىڭ ۋنتسيا كونتسەنتراتتاعى التىندى قۇرايدى. كەن ورنىندا قان­شا جۇمىسشى، قىزمەتكەرلەر توبى جۇمىس جاسايتىنىن دا جوعارىداعى مالىمەتتەردەن باعامداۋعا بولار.

– ارينە، ەلىمىزدەگى زاڭناما تالاپتارىنا سايكەس كاسىپورىنداردا ەكپە الۋ ەرىكتى تۇردە جۇرگىزىلەدى. ءبىز ۇجىمدا وزدەرىن جانە جاقىندارىن قورعاۋدى قولداپ، ەكپە العىسى كە­لە­تىن ارىپتەستەرىمىزدىڭ بار ەكە­نىنە قۋانىشتىمىز. باسقا دا ارىپ­تەستەرىمىزدى وسى ءۇردىستى قولداۋعا شا­قىرامىز. ۇجىمدىق ۆاكتسينالاۋ جانە ىندەتكا قارسى باسقا دا شارالار بۇل وندىرىستەگى ۆاحتالىق ءادىس كەس­تەلەرىن قالىپتى ومىرگە ورالتۋعا مۇمكىندىك بەرەدى دەپ سەنەمىز، – دەيدى «KAZ Minerals Management» جشس باسقارما توراعاسى ەلدار مامەدوۆ.

ءىرى كاسىپورىندار ءۇشىن ەڭبەك ادامىنىڭ دەنساۋلىعىن ساقتاۋ ما­ڭىزدى. ىندەت كەزىندەگى باستى شارت – قاۋىپسىزدىك. كومپانيا قىزمەتكەر­لەرى مەن مەردىگەرلەردىڭ قاۋىپسىزدى­گىن، دەنساۋلىعىن ساقتاۋعا باسىمدىق بەرۋى كەرەك. ەڭبەك ادامدارىن قور­عاۋ ءۇشىن جانە جۇمىستاعى كىدىرىستەر قاۋپىن ازايتۋ ءۇشىن ىندەتكە قارسى تەستىلەۋ مەن وقشاۋلاۋدى قوسا العان­دا، كەشەندى شارالار ءالى دە قابىل­دانۋدا.

ەندى ۇجىم قىزمەتكەرلەرى مەن جۇمىسشىلارى Sputnik V ۆاكتسينا­سىنىڭ ەكىنشى كومپونەنتىن ۆاحتالىق قالاشىقتا 21 كۇننەن كەيىن الادى. ۆاكتسينالاۋ دەنساۋلىق ساقتاۋ مي­نيسترلىگىنىڭ سانيتارلىق نورمالارىنا، تالاپتارىنا سايكەس جۇرگىزىلەدى. قازىر ەكپە الۋعا ارنالعان ءۇي-جايلار سانيتارلىق-ەپيدەميالىق تالاپتارعا ساي.

كەن ورنىنداعى ۆاكتسينالاۋ تۋرالى بارلىق دەرەك دەنساۋلىق ساقتاۋ مينيسترلىگىنىڭ ەلەكتروندى بازالا­رىنا ەنگىزىلەدى جانە ەكىنشى كوم­­پو­نەنت سالىنعاننان كەيىن بوزشاكول­دىڭ ۆاكتسينا العان قىزمەتكەرلەرىنە E-Gov Mobile قوسىمشاسىنىڭ «تسيفر­لى قۇجاتتار» بولىمىندە ءۇش تىلدە قول­جەتىمدى بولادى.

كاسىپورىننىڭ كورپوراتيۆتىك باي­لانىستار دەپارتامەنتىنىڭ باسشىسى ماقسۇت جاپاباەۆتىڭ ايتۋىنشا، الداعى ۋاقىتتا ۆاكتسينالاۋدى تىكەلەي كەن ورنىنداعى مەردىگەر ۇيىم­داردىڭ ارنايى وقىتۋدان وتكەن مەديتسينالىق قىزمەتكەرلەرى جۇرگىزۋى مۇمكىن. «KAZ Minerals Bozshakol» جشس قىزمەتكەرلەرى دە، مەردىگەرلەر دە ۆاكتسينا سالدىرا الادى. سەبەبى بۇل ۇجىمدىق قاۋىپسىزدىك ءۇشىن ماڭىزدى.

ال قازىرگى كەزدە وڭىرلىك سانيتار­لىق-ەپيدەميولوگيالىق باقىلاۋ دە­پارتا­مەنتىنىڭ مالىمەتىنشە، ىندەت جۇقتىرۋشىلار كوبەيگەن. وڭىرىمىزدە وسى ۋاقىتقا دەيىن 20 225 ادامنان ىندەت جۇقتىرعانى انىقتالعان.

ءىرى ءوندىرىس ورىندارمەن قاتار، اۋىل تۇرعىندارىنىڭ دا ەكپە سالۋ ماسەلەسى دە ويلانتۋدا. ياعني ءار اۋداندا ەكپە سالۋ بارىسى دۇرىس ۇيىمداستىرىلعان جاعدايدا مامىر ايىنىڭ سوڭىنا قاراي 5-تەن 15 مىڭعا دەيىن ادامعا ۆاكتسينالاۋعا بولار ەدى. سوندىقتان وبلىس اكىمدىگى تۇرعىندار اراسىندا دۇربەلەڭ تۋىنداماس ءۇشىن، ولار ەكپەنى قايدان الاتىنى تۋرالى اقپاراتتان حاباردار بولۋى ءتيىس. قالالار مەن اۋدانداردىڭ اكىمدەرىنە بارلىق ەگۋ پۋنكتتەرىن ارالاپ، ولاردىڭ جۇمىسىن ۇزدىكسىز باقىلايتىن تۇراقتى توپتار قۇرۋدى تاپسىرۋدا.

– ۆاكتسينالاۋدىڭ ىندەتپەن كۇ­رەسۋدىڭ جالعىز ءتيىمدى ءادىسى ەكەنىن ءتۇ­سىنۋىمىز كەرەك. قازىرگى «قىزىل ايماق­تاعى» شەكتەۋ شارالارى تەك ۇجىمدىق يممۋنيتەت قالىپتاسقان جاعدايدا عانا الىنادى، – دەدى ءوڭىر باسشىسى ابىلقايىر سقاقوۆ.

وبلىس اكىمدىگى قالالار مەن اۋدانداردا ەكپە ەگىلەتىن جەرلەردىڭ ءتىزىمىن تۇرعىندارعا حابارلاپ، اقپاراتتىق جۇمىستاردى جالعاستىرۋدا. قازىر 135 ەگۋ ورنى دايىندالعان. ارنايى ورىندارعا بارىپ ەكپە جاسايتىن 37 توپ تا بار.

الداعى كۇندەرى وڭىردەگى باسقارما ۇجىمدارىندا قىزمەتكەرلەردىڭ تۇ­راقتى يممۋنيتەتىن قالىپتاستىرۋ ءۇشىن 450 مىڭ ادامعا ۆاكتسينا سالىنادى. وبلىس تۇرعىندارى وتاندىق QazVac ۆاكتسيناسىنىڭ ءبىرىنشى كوم­پونەنتىن قابىلداي باستادى. ەكىنشى كومپونەنتى 21 كۇننەن سوڭ سالىنادى.

ايدار سەيىتقازينوۆتىڭ ايتۋىنشا، قازىرگى ۋاقىتتا ينفەكتسيالىق ستاتسيونارلاردىڭ جۇكتەمەسى 30 پايىز نەمەسە 630 توسەكتىك ورىندى قۇرايدى. جانساقتاۋ بولىمىندە 29 ناۋقاس بار، ونىڭ 11-ءى وكپەنى جاساندى جەلدەتۋ اپپاراتىنا قوسىلعان. بۇگىندە ەمحانالار جانىندا 175 ءموبيلدى بريگادا جۇمىس ىستەيدى. ستاتسيونارلاردا 45 كۇنگە جەتەتىن دارىلىك زاتتار قورى بار، پتر تەستىلەۋ جۇرگىزەتىن 6 زەرتحانا جۇ­مىس جاساۋدا.

 

پاۆلودار وبلىسى

 

سوڭعى جاڭالىقتار

دوللار قىمباتتادى

قارجى • كەشە

ۇقساس جاڭالىقتار