پارلامەنت • 09 مامىر، 2021

سوعىس جانە ەڭبەك ارداگەرلەرىنىڭ ەرلىكتەرىن ەشقاشان ۇمىتپايمىز - ماۋلەن اشىمباەۆ

17 رەت كورسەتىلدى

ۇلى جەڭىس كۇنى – ەلگە مۇرا، ۇرپاققا ۇران بولعان وشپەس ەرلىكتىڭ مەرەكەسى. بۇل تۋرالى قر پارلامەنتى سەناتىنىڭ توراعاسى ماۋلەن اشىمباەۆ Facebook پاراقشاسىندا جازدى، دەپ حابارلايدى Egemen.kz

«بارشاڭىزدى ۇلى جەڭىس كۇنىمەن شىن جۇرەكتەن قۇتتىقتايمىن!

بۇل – ەلگە مۇرا، ۇرپاققا ۇران بولعان وشپەس ەرلىكتىڭ مەرەكەسى. وتان ءۇشىن وت كەشكەن اتالارىمىزدىڭ باتىرلىعى مەن جانقيارلىعىنىڭ جارقىن ۇلگىسى.

پرەزيدەنتىمىز اتاپ وتكەندەي، حالقىمىز ءۇشىن جەڭىس كۇنىنىڭ قاشاندا ورنى بولەك. ويتكەنى ەلىمىزدەگى ءار وتباسى سۇم سوعىستىڭ ازابىن تارتىپ، زاردابىن سەزىندى. مايدانعا اتتانعان ازاماتتارىمىزدىڭ جارتىسى ەلگە قايتىپ ورالمادى. ۇرىس دالاسىندا قايسارلىعىمەن كوزگە تۇسكەن 500-دەن استام قازاقستاندىق كەڭەس وداعىنىڭ باتىرى اتاندى. تىلدا قالعاندار دا كۇندىز-ءتۇنى ەڭبەك ەتىپ، جەڭىسكە جەتۋگە زور ۇلەس قوستى. سوندىقتان ءفاشيزمدى كۇيرەتۋگە تىكەلەي اتسالىسقان سوعىس جانە ەڭبەك ارداگەرلەرىنىڭ ەرلىكتەرىن ەشقاشان ۇمىتپايمىز.

اتالارىمىزدىڭ جانكەشتىلىگى مەن اجەلەرىمىزدىڭ توزىمدىلىگىن كەڭىنەن دارىپتەۋ، ارامىزدا جۇرگەن مايدانگەرلەرىمىزگە قۇرمەت كورسەتۋ، ومىردەن وتكەندەرىنىڭ رۋحىنا تاعزىم ەتۋ – ءبىزدىڭ پەرزەنتتىك پارىزىمىز. سول ارقىلى ءبىز بەيبىتشىلىك پەن تىنىشتىقتىڭ قادىرىن تۇسىنەمىز. وسكەلەڭ ۇرپاقتىڭ پاتريوت بولىپ قالىپتاسۋىنا جول اشامىز. مۇنىڭ قازىرگىدەي سىن-قاتەرلەر زامانىندا ماڭىزى اسا زور.

جەڭىس كۇنىمەن قۇتتىقتاي وتىرىپ، ارداگەرلەرىمىزگە مىقتى دەنساۋلىق جانە اماندىق تىلەيمىن! ەلىمىز امان، جۇرتىمىز تىنىش بولسىن!»، دەدى سەنات توراعاسى.

سوڭعى جاڭالىقتار

بيىل 755 اۋىل اكىمى سايلانادى

قوعام • بۇگىن، 12:15

ۇقساس جاڭالىقتار