مەديتسينا • 08 مامىر، 2021

دارىلىك پرەپاراتتاردىڭ ساپاسىن باقىلاۋ ءۇشىن نارىقتاعى ۇلگىلەر الىنادى

21 رەت كورسەتىلدى

وسى جىلدان باستاپ دارىلىك زاتتار مەن مەديتسينالىق بۇيىمدار ساپاسىن انىقتاۋ ءونىمدى دەكلاراتسيالاۋ ارقىلى ساراپتاما جۇرگىزۋ جانە قاۋىپتىلىگىن انىقتاۋ نارىقتان ىرىكتەلگەن ۇلگىلەردى زەرتحانالىق سىناقتان وتكىزۋگە بايلانىستى بولىپ وتىر. وسى شارالار مەملەكەتتىك تىركەۋدەن كەيىنگى كەزەڭدە فارماتسەۆتيكالىق ءونىمنىڭ ساپاسىن قامتاماسىز ەتىپ، قازاقستان اۋماعىندا فالسيفيكاتتار اينالىمىن بولدىرماۋعا باعىتتالادى، دەپ حابارلادى Egemen.kz.

پرەپاراتتار مەن بۇيىمدار ساپاسىن باعالاۋ مەرزىمى ءوتىنىم قابىلدانعان كۇننەن باستاپ كۇنتىزبەلىك 10 كۇننەن 5 جۇمىس كۇنىنە دەيىن قىسقارتىلدى. ال سانيتارلىق-ەپيدەميالوگيالىق جانە سانيتارلىق-پروفيلاكتيكالىق ءىس-شارالار وتكىزگەندە جانە وسىعان وراي شەكتەۋلەر قويىلعاندا باعالاۋ ءوتىنىم قابىلدانعان كۇننەن باستاپ 3 جۇمىس كۇنى ىشىندە جۇرگىزىلەدى. وسى ۋاقىت ارالىعىندا دارىلىك زاتتار مەن مەديتسينالىق بۇيىمداردى ساراپتاۋ ۇلتتىق ورتالىعىنىڭ (دزسۇو) ماماندارى ۇسىنىلعان قۇجاتتاردى، بارىنەن بۇرىن، فارماتسەۆتيكالىق ءونىمنىڭ ساپاسى مەن ءوندىرىسىن، ونىڭ  اناليتيكالىق نورماتيۆتىك قۇجاتتارعا، دارىلىك زاتتار مەن مەديتسينالىق بۇيىمداردىڭ مەملەكەتتىك تىزىلىمىنە سايكەستىگىن ساراپتامادان وتكىزەدى. ەسكەرتۋلەر بولماعان جاعدايدا ءوتىنىم بەرۋشىگە سايكەستىك سەرتيفيكاتى بەرىلەدى.

دەكلاراتسيالاۋ جولىمەن الىنعان سايكەستىك سەرتيفيكاتىن قولدانۋ كەزەڭىندە دزسۇو جىل سايىن ءونىم ۇلگىلەرىنىڭ ساپاسىن راستاۋ جانە زەرتحانالىق سىناقتار وتكىزۋ ماقساتىندا نارىقتان ىرىكتەپ الادى. بۇرىن وسىنداي ءراسىم ءونىمنىڭ ءار  سەرياسىن، ونىڭ ىشىندە ءوندىرىستى باعالاۋ ءۇشىن جىلىنا ەكى رەت جۇرگىزىلىپ كەلدى.

دزسۇو قاۋىپسىزدىك پەن ساپانى باعالاۋ دەپارتامەنتىنىڭ ديرەكتورى ايسۇلۋ احيموۆانىڭ دەرەكتەرىنشە، بىلتىرعى جىلى ديستريبيۋتور قويمالارىنان جانە ءدارىحانالاردان 895 ءارتۇرلى پرەپاراتتار مەن بۇيىمداردىڭ ىرىكتەپ الىنعان. وتكەن جىلى دارىلەر مەن مەديتسينالىق بۇيىمداردىڭ قاۋىپسىزدىگى مەن ساپاسى تۋرالى بارلىعى 100 014 قورىتىندى جاسالسا، ونىڭ 1866 جاعدايىندا وڭ ناتيجەلى قورىتىندى  بەرىلمەگەن.

ۇلگىلەردى ىرىكتەۋ جوسپارىنا ايرىقشا ساقتاۋ شارتتارىن تالاپ ەتەتىن، قازاقستاندا تۇڭعىش رەت تىركەلگەن ستەريلدى دارىلىك زاتتار جانە پارەنتەرالدى ەنگىزىلەتىن دارىلەر، سونداي-اق تەگىن مەديتسينالىق كومەكتىڭ كەپىلدىك بەرىلگەن كولەمى (تمككك) شەڭبەرىندەگى جانە مىندەتتى الەۋمەتتىك مەديتسينالىق ساقتاندىرۋ ء(مامس) جۇيەسىندە ساتىپ الىنعان پرەپاراتتار قامتىلادى. مەديتسينالىق بۇيىمداردى تەكسەرۋدە ستەريلدى مەديتسينالىق بۇيىمدار جانە جەكە قورعانىس قۇرالدارى تاڭدالادى. يمپلانتاتسيالاۋعا جانە in vitro دياگنوستيكاسىنا ارنالعان مەديتسينالىق بۇيىمدار، سونداي-اق مەديتسينالىق تەحنيكالار بۇل تىزىمگە كىرمەيدى.

جوسپار مىندەتتى تۇردە وندىرۋشىلەرمەن كەلىسىلىپ جاسالدى. ۇلگىلەر پرەپاراتتار مەن بۇيىمداردى وندىرەتىن ۇيىمداردا دا، كوتەرمە جانە بولشەك ساۋدادا وتكىزۋ ورىندارىندا، سونىمەن بىرگە دەنساۋلىق ساقتاۋ ۇيىمدارىندا ءوندىرۋشى تاراپتىڭ قاتىسۋىمەن الىنادى. ونىڭ بارىسىندا ۋلى، جارىلعىش قاۋىپتىلىگى، ءورت قاۋپى، گيگروسكوپيالىعى نازارعا الىنادى.  الدىن الا ساقتانۋ مەن لاستانۋدان ساقتاندىرۋ شارالارىن قاداعالاي وتىرىپ، پرەپاراتتىڭ حيميالىق قۇرامى تەكسەرۋ بارىسىندا وزگەرىسكە تۇسپەگەۋىنە كەپىلدىك بەرىلەدى.

سوڭعى جاڭالىقتار

بيىل 755 اۋىل اكىمى سايلانادى

قوعام • بۇگىن، 12:15

ۇقساس جاڭالىقتار