«مىندەتتى تۇردە ايتا كەتەتىن جايت, اۋكتسيون ارقىلى جەرگە مەنشىك قۇقىعى ەمەس, جەر قويناۋىن پايدالانۋ قۇقىعى بەرىلەدى. بۇل قۇقىق «جەر قويناۋى جانە جەر قويناۋىن پايدالانۋ» كودەكسىندە رەتتەلەدى. ۋچاسكەلەردەگى كەز كەلگەن تەحنولوگيالىق پروتسەستەر ەنەرگەتيكا مينيسترلىگى جانىنداعى بارلاۋ جانە يگەرۋ جونىندەگى ورتالىق كوميسسيادا قارالادى. جەر قويناۋىن پايدالانۋ قۇقىعىن العان ينۆەستور جەرگىلىكتى اتقارۋشى ورگانمەن جەردى جالداۋ تۋرالى شارتقا قول قويادى», دەگەن ۆەدومستۆو وكىلى.
سونىمەن قاتار ول اۋكتسيون جەڭىمپازدارى جوبالاۋ قۇجاتىن ازىرلەۋ الدىندا جەرگىلىكتى تۇرعىنداردىڭ قاتىسۋىمەن قوعامدىق تىڭداۋلار وتكىزۋگە مىندەتتى ەكەنىن ەسكەرتتى.
وسى شارادا ول ءساۋىر ايىندا وتكەن ونلاين اۋكتسيوندا مۇناي كەنىشتەرى باستاپقى باعاسىنان 13 ەسە قىمباتقا ساتىلعانىن ايتتى. ۆيتسە-ءمينيستردىڭ ايتۋىنشا, كەن ورىندارىن ونلاين اۋكتسيوندا ساتۋ تارتىبىنە وزگەرىستەر ەنگىزىلۋى مۇمكىن.
