«ەگەر وسى ءىس تولىقتاي قولعا الىنسا, الداعى بەس جىلدا بۇل ماماندىق يەلەرىنە دەگەن سۇرانىس ازايادى. الايدا ول ءۇشىن ەڭ ءبىرىنشى اكىمدىكتەردىڭ قولداۋى قاجەت ءارى جەرگىلىكتى بيۋدجەتتەردىڭ مۇمكىندىكتەرىنە دە قارايمىز», دەيدى مينيسترلىك وكىلى.
قازىرگى تاڭدا ەلىمىز بويىنشا 3 مىڭعا جۋىق ۋچاسكەلىك پوليتسيا بەكەتى جۇمىس ىستەيتىن بولسا, ونىڭ 700-گە جۋىعى قالالاردا, ال 2 مىڭنان استامى اۋىل-ايماقتاردا ورنالاسقان. مينيسترلىكتىڭ جوسپارى بويىنشا جىلىنا 35 ارنايى ءموبيلدى بەكەت اشۋ دا قولعا الىنعان ۇلكەن باستامانىڭ ءبىرى. «بۇل ماقساتتا ءىىم ءاربىر وڭىرلىك اكىممەن ىنتىماقتاستىق تۋرالى ءتيىستى مەموراندۋم جاساسىپ, بىرقاتار ايماقتا بۇل جوسپار ناقتى جۇزەگە اسىرىلىپ تا كەلەدى. ماسەلەن بيىل اقتوبە وڭىرىندە – 5, سولتۇستىك قازاقستان وبلىسىندا 2 ستاتسيونارلىق پوليتسيا بەكەتى پايدالانۋعا بەرىلدى», دەيدى بۇل جونىندە ا.ميليۋك.
پوليتسيانىڭ سەرۆيستىك مودەلىن ەنگىزۋدىڭ باستى ەرەكشەلىگى شتات پەن پوليتسيا قۇرىلىمىن وڭتايلاندىرۋعا قاتىستى. ءتارتىپ ساقشىلارىنىڭ الەۋمەتتىك جاعدايىن جاقسارتۋ, پوليتسيا قىزمەتىن باعالاۋدىڭ جاڭا كريتەريلەرىن ەنگىزۋ جانە ۆەدومستۆولىق ءبىلىم بەرۋدى جاڭعىرتۋ – مىنە, حالىقپەن جۇمىس ىستەۋدىڭ جاڭا فورماتتارىن تالاپ ەتەتىن مودەلدىڭ باستى كوزدەگەنى وسىلار. «ال ۇلتتىق سەرۆيستىك مودەلدى دامىتۋداعى ءۇش نەگىزگى باعىتتى ءبولىپ كورسەتۋگە بولادى, دەيدى ۆەدومستۆو قىزمەتكەرى. – ءبىرىنشىسى – قاراپايىم حالىق پەن پوليتسيانىڭ بايلانىسىن بارىنشا جەڭىلدەتۋ, ازاماتتاردىڭ حابارلامالارىنا جەدەل ارەكەت ەتۋگە باعىتتالعان قادامدىق قولجەتىمدىلىك. ەكىنشىسى – قاۋىپ-قاتەرلەردى ۋاقتىلى جويۋ, قۇقىق بۇزۋشىلىقتاردىڭ الدىن الۋ. ءۇشىنشىسى – حالىقپەن تىعىز سەرىكتەستىك ورناتۋ. سەبەبى قاۋىپسىزدىكتى قامتاماسىز ەتۋ ماسەلەلەرى كوبىنە-كوپ وڭىرلەردە وزەكتىلىگىن جويماي كەلەدى».
الايدا ءبىر جايتتى ايتا كەتۋىمىز كەرەك. ەلوردادا قاناتقاقتى جوبانى جۇزەگە اسىرۋ اياسىندا 2 مىڭنان استام تۇرعىن اراسىندا الەۋمەتتىك ساۋالداما جۇرگىزىلگەن. ساۋالداما كەزىندە سۇراقتارعا جاۋاپ بەرگەن نۇرسۇلتاندىقتاردىڭ جارتىسىنا جۋىعى, ياعني 46 پايىزى وزدەرىنىڭ ۋچاسكەلىك پوليتسيا ينسپەكتورلارىن تانىمايتىن بولىپ شىققان. رەسپوندەنتتەردىڭ تەك 2 پايىزى ۋچاسكەلىك بەكەتتىڭ نەمەسە پوليتسيا ءبولىمىنىڭ ورنالاسقان جەرى تۋرالى بىلسە, قالا تۇرعىندارىنىڭ جارتىسىنان استامى كەز كەلگەن قۇقىق بۇزۋشىلىق كەزىندە بۇرىنعىداي 102 ءنومىرىن تەرەتىندىكتەرىن جاسىرماعان.
ء«دال وسى جاعداي ەكىنشى ءبىر ماسەلەنى تۋىنداتىپ وتىر», دەيدى ا.ميليۋك. ونىڭ مالىمدەۋىنشە, قازىرگى تاڭدا پوليتسيا دەپارتامەنتتەرىندەگى جەدەل باسقارۋ ورتالىقتارىنىڭ جۇكتەمەسى شامادان تىس اسىپ كەتكەن. ماسەلەن, استانالىق جبو وپەراتورلارى كۇنىنە 2,5 مىڭعا دەيىن قوڭىراۋ قابىلدايتىن بولسا, بۇل حابارلامالاردىڭ شامامەن 40 پايىزى پوليتسيانىڭ قۇزىرەتىنە جاتپايتىن وتىنىشتەر. «ەگەر ءاربىر ۋچاسكەلىك پوليتسيا قىزمەتكەرى وزىنە تيەسىلى اۋماقتاعى تۇرعىندارىمەن تىعىز قارىم-قاتىناستا بولسا, جەدەل باسقارۋ ورتالىقتارىنىڭ جۇكتەمەسىن كەم دەگەندە ەكى ەسەگە ازايتۋعا بولار ەدى», دەگەن سپيكەر ۋچاسكەلىك پوليتسيا قىزمەتكەرلەرىنە پيك چاتتارى ارقىلى تىكەلەي بايلانىسقا شىعۋعا بولاتىنىن دا ەسكەرتىپ ءوتتى. ساۋالداما قورىتىندىسى بويىنشا 49 پايىز حالىق پوليتسيا قىزمەتكەرلەرىنىڭ جۇمىسىنا كوڭىلى تولمايتىندىقتارىن ايتسا, 51-ءى كاسىبيلىكتەرىن جوعارى باعالاعان.
«سەرۆيستىك مودەل – بۇل قوعامدىق قاۋىپسىزدىكتى قامتاماسىز ەتۋگە قاتىستى ماسەلەلەردى شەشۋدە پوليتسيا مەن قوعامنىڭ تىزە قوسىپ قىزمەت جاساۋى دەگەن ءسوز. الايدا شەتەلدىك تاجىريبە بۇل مودەلدىڭ بارلىق مەملەكەتتەرگە كەلە بەرمەيتىنىن كورسەتىپ وتىر. سول سەبەپتى ءبىز پوليتسيانىڭ سەرۆيستىك مودەلىن ءوز ەلىمىزدە ەنگىزۋ بارىسىندا ۇلتتىق مادەنيەت پەن مەنتاليتەتتى, زاڭنامانى, گەوگرافيا مەن رەسۋرستىق مۇمكىندىكتەردى ەسكەرەتىن بولامىز», دەپ اتاپ ءوتتى ا.ميليۋك.
