ۇلى جەڭىس كۇنى – 9 مامىردا كۇندىزگى 15:00-دە كورەرمەندەرگە «ەستەلىك ءارى داڭقتى اندەر» اتتى سىرلى سازعا تولى كونتسەرت وتەدى. وندا وپەرا سوليستەرى, حور ارتىستەرى مەن وركەستردىڭ ورىنداۋىندا قازاق, ورىس جانە باتىس ەۋروپالىق كلاسسيكانىڭ وزىق ۇلگىلەرى مەن سوعىس جىلدارىنداعى تانىمال اندەر ورىندالادى. ال 11 مامىردا ساعات 19:00-دە بىرەگەي ونەر ورداسىندا العاش رەت «موتسارت. كلاسسيكا سالتاناتى» دەگەن كەرەمەت كەشتە ۆولفگانگ امادەي موتسارتتىڭ كونتسەرتتىك سيمفونيالارى تەاتردىڭ اسپاپشى سوليستەرى مەن كامەرالىق وركەسترىنىڭ ورىنداۋىندا شىرقالادى.
سونداي-اق 14 مامىردا ساعات 19:00-دە Qazaq Quintet ۇرلەمەلى اعاش اسپاپتار كۆينتەتى مەن باسقا دا تانىمال قازاقستاندىق مۋزىكانتتار اسپاپتىق پرەمەرالار كەشىن ۇسىنادى. ونىڭ اياسىندا نەمىس كومپوزيتورلارىنىڭ ەكى ءىرى كامەرالىق شىعارماسى – ۆەنالىق كلاسسيك ليۋدۆيگ ۆان بەتحوۆەننىڭ كلارنەت, ۆالتورنا, فاگوت, سكريپكا, الت, ۆيولونچەل جانە كونتراباسقا ارنالعان سەپتەتى, مي-بەمول ماجور جانە ليۋدۆيگ تيۋيەنىڭ فورتەپيانو مەن سي-بەمول ماجور ورىندالادى. 15 مامىر كۇنى 18:00-دە «رومانس تاريحى» توپتاماسىنان «ۇدەرە كوشكەن اق بۇلتتار...» اتتى كەش بولادى.
19 مامىردا كەشكى 19:00-دە «استانا وپەرا» كامەرالىق حورى, وپەرا سوليستەرى مەن وركەستر ارتىستەرىنىڭ قاتىسۋىمەن كورنەكتى كومپوزيتور, ديريجەر, قازاق كسر ەڭبەك سىڭىرگەن ونەر قايراتكەرى قاپان ءمۋسيننىڭ 100 جىلدىق مەرەيتويىنا وراي «سايرا, بۇلبۇل» اتتى سازدى كەش وتەدى. سونىمەن بىرگە جۇرتشىلىق 23 مامىردا كۇندىزگى 15:00-دە «الاقاي, دەمالىس!» توپتاماسىنان «ونەرلى جاستار تارتۋى» مەن 27 مامىردا 19:00-دە Next Generation كونتسەرتىن كورەسىز. 28 مامىردا 19:00-دە «استانا وپەرا» وركەسترىنىڭ ارتىستەرى حح عاسىردىڭ ەڭ كورنەكتى كومپوزيتورلارىنىڭ ءبىرى س.پروكوفەۆتىڭ 130 جىلدىعىنا ارناپ «پروكوفەۆكە تارتۋ» كامەرالىق مۋزىكا كونتسەرتىن ۇسىنادى. ال 30 مامىردا ساعات 18:00-دە «مۋزىكا قۇدايى قونىستانعان opus...» اتتى مۋزىكالىق كەشتى تاماشالايسىز.
