فيلم جازۋشى, پروديۋسەر الەكس ءپيننىڭ قىلمىسكەرلەر توبى تۋرالى دراماسىنىڭ جەلىسى بويىنشا ءتۇسىرىلدى. يسپانيا قارجى سارايىن توناۋعا شەشىم قابىلداعان پروفەسسور اتانعان كوشباسشى مايدان قىل سۋىرعانداي بارلىعىن وي ەلەگىنەن وتكىزە وتىرىپ, توناۋعا ەبى بار, ەسەبى تۇگەل مامانداردى ءوز توبىنا جيناي باستايدى. سىرت كوزگە كوپ, سوزگە ساراڭ, ۇياڭ كورىنەتىن مومىن جىگىت پوليتسيانىڭ اتتاپ باسقان قادامىنا جوسپار قۇرا ءبىلدى. سۋىق اقىل مەن سەرگەك سانا قاشاندا ونىڭ باستى قارۋى بولاتىن. قان توگۋدى مۇرات تۇتپاعان, تەك كەرەگىن عانا الۋدى ماقسات ەتكەن ول مايدان دالاسىندا ءوزىن ءبىر ساتتە جوعالتىپ العان ەمەس. مۇنى سۋعا سالسا باتپايتىن, وتقا سالسا جانبايتىن الدەبىر ەرتەگى كەيىپكەرىمەن شاتاستىرماعان ءجون. مۇندا بارلىعى شىنايى. كورەرمەندى ءجىپسىز بايلاپ قويعان سيۋجەتتىك شيەلەنىستەر مەن توسىن شەشىمدەر كەيىپكەرلەر تاعدىرىنا ەرىكسىز يلاندىرعان ەدى.
انە-مىنە دەگەنشە جاڭا ماۋسىمى شىعىپ قالادى دەپ كۇتىپ وتىرعان سەريال تۇساكەسەرى اۋەلدە يسپانيادا ءوتتى. 2017 جىلى العاشقى سەرياسىن 4 ميلليوننان استام ادام تاماشالادى, بىراق ءار سەرياسى شىققان سايىن قارالىم سانى تومەندەي بەردى. تەلەشوۋ ۇجىمى ءفيلمدى ارمەن قاراي ءتۇسىرۋ, تۇسىرمەۋ كەرەكتىگىن بىلمەي ءارى-ءسارى كۇيدە وتىرعان-دى. «مەنىڭ الەۋمەتتىك جەلىدە ازداعان وقىرمانىم بار ەدى. ازداعان ساعاتتاردا-اق جازىلۋشىلاردىڭ سانى كۇرت ارتىپ, 8-9 ميلليون وقىرمانعا جەتتى. مۇنداي تانىمالدىقتى ەشكىم كۇتپەگەن ەدى. ءبارىمىز ءبىر-بىرىمىزگە قاراپ «بىردەڭە بولىپ جاتىر» دەپ تاڭعالدىق», دەيدى سەريالعا تۇسكەن اكتەرلەردىڭ ءبىرى البا فلورەس. ءيا, راسىمەن دە ۇلكەن جارىلىس بولعان ەدى. ويتكەنى سالۆادور داليدىڭ ماسكاسىمەن بەت-ءجۇزىن جاسىرىپ, قىزىل كومبينەزون كيگەن قاراقشىلار تۋرالى اڭگىمە ويلاماعان جەردەن Netflix نازارىنا ىلىگىپ قالادى. «ساتتىلىك ساتسىزدىكتىڭ ارعى بەتىندە» دەگەن وسى بولار, وسىدان سوڭ-اق سەريال تۇسىرۋشىلەردىڭ باعى جانىپ, ءاپ-ساتتە الەمگە تانىلىپ شىعا كەلگەن ەدى. ارنا شوۋ قۇقىعىن العاننان كەيىن, Casa de Papel اتتى ءتۇپ نۇسقا اتاۋىن Money Heist دەپ وزگەرتىپ, ەپيزودتاردىڭ ۇزاقتىعىن 70 مينۋتتان 45 مينۋتقا دەيىن قىسقارتىپ, سەريال سانىن ارتتىردى.
فيلمدەگى رەۆوليۋتسيالىق قوزعالىس ەكىنشى دۇنيەجۇزىلىك سوعىس كەزىندە يتاليالىق پارتيزانداردىڭ انتيفاشيستىك ءانۇرانى بولعان Bella Ciao انىمەن كومكەرىلگەن. 2018 جىلدىڭ جازىنداعى وسىناۋ شوۋدىڭ ارقاسىندا جەڭىس ءانى قايتادان جەر-جەردە شىرقالىپ جاتتى. سەريال شىققاننان كەيىن قىزىل كومبينەزون مەن دالي ماسكالارى كەشتەردە عانا تانىمال بولىپ قويماي, ۇرلىققا تۇسكەن كادىمگى توناۋشىلار دا كيە باستادى. وسىدان سوڭ قاۋىپسىزدىك ماقساتىندا كارناۆال كەزىندە مۇنداي كوستيۋمدەردى كيۋگە تىيىم سالعان جاعدايلار دا كەزدەستى. يسپانيانىڭ El Mundo گازەتى ءوز كەزەگىندە شوۋدىڭ ادامدارعا مۇنداي اسەرىن «قاراقشىلار يدەالدى انتيگەروي بولىپ كورىنەتىن جاھاندىق كوڭىلسىزدىك كورىنىسى» دەپ سيپاتتاسا, تۇرىك ءباسپاسوزى تەرروريزمدى قولداۋعا شاقىراتىن سيمۆولدىق كورىنىس دەپ شوۋعا تىيىم سالۋعا شاقىردى. وسىلايشا, فيلم تاريحتاعى ۇزدىك سەريالداردىڭ قاتارىنا ەنىپ, كوپتەگەن ماراپاتقا يە بولدى. 2018 جىلى بەدەلدى Emmy Awards سىيلىعىنىڭ ۇزدىك دراماسى اتاعىن الدى. سول جىلى New York Times گازەتىنىڭ نۇسقاسى بويىنشا ۇزدىك تەلەحيكايالار تىزىمىنە ەندى. تاعى ءبىر ايتا كەتەرلىگى, فيلمدە قازاقستان اتاۋى ءبىردى-ەكىلى جەردە اتالاتىن تۇستارى بار. كەيىپكەردىڭ ءبىرى ء«بىزدىڭ اقشامەن قازاقستاننان دا سپۋتنيك ساتىپ الۋعا بولادى», دەيدى. ارينە, مۇنىمەن ستسەناري اۆتورلارىنىڭ ناقتى نە ايتقىسى كەلگەنى بەيمالىم, دەسە دە وق پەن وتتىڭ ورتاسىنداعى مايدان دالاسىنان قازاقستان اتىن ەستىپ ەلەڭدەپ قالعانىمىز راس. ال ەڭ باستىسى حالىق سۇيىسپەنشىلىگىنە العاۋسىز بولەنگەن سەريالدىڭ جاڭا ماۋسىمىن جانكۇيەرلەر ارمياسى تاعاتسىزدانا كۇتىپ وتىر!
