ايماقتار • 05 مامىر، 2021

قاراعاندى وبلىسىندا 123 671 تۇرعىن ەكپە سالدىردى

27 رەت كورسەتىلدى

پاندەميا باستالعاننان بەرى قاراعاندى وبلىسىندا 24 مىڭنان استام ادام كوروناۆيرۋس ينفەكتسياسىمەن اۋىرعان ەكەن. قاراپ تۇرساڭىز جاعداي ءالى دە وزگەرە قويماعان: ايماقتا كۇن سايىن كوروناۆيرۋس ينفەكتسياسىن جۇقتىرۋدىڭ 200-دەن 250-گە دەيىن وقيعاسى تىركەلەتىن كورىنەدى، دەپ حابارلايدى Egemen.kz.

بۇل تۋراسىندا جانە وڭىردەگى ەپيدەميولوگيالىق جاعدايدىڭ جالپى سيپاتى جايىندا جەرگىلىكتى كوممۋنيكاتسيالار قىزمەتى الاڭىندا وتكەن بريفينگتە وبلىستىق دەنساۋلىق ساقتاۋ باسقارماسىنىڭ باسشىسى گامال توقسامباەۆ ءمالىم ەتتى.

وڭىردەگى باس دارىگەردىڭ ايتۋىنشا، قاراعاندى وبلىسىندا ەكپە سالدىرۋ ءىسى ەكپىندى تۇردە جۇرگىزىلىپ كەلەدى ەكەن. ناقتىراق ايتقاندا، وتكەن كۇنى جەتكەن مالىمەت بويىنشا وبلىستا 123 671 ادام «جامان تۇماۋعا» قارسى ۆاكتسينانىڭ العاشقى كومپونەنتىن العان. ال ءوڭىردىڭ 21 904 تۇرعىنىنا ەكىنشى كومپونەنت ەگىلىپتى. دەگەنمەن وسى شارالارعا قاراماستان، قاراعاندى وبلىسى بۇرىنعىسىنشا «قىزىل ايماق» شەڭگەلىنەن شىعا الماي وتىر.

وبلىستىڭ باس دارىگەرى  وڭىردە 288 ءموبيلدى بريگادانىڭ قىزمەتكەرلەرى پاتسيەنتتەردىڭ جاعدايىن باقىلاۋمەن بىرگە العاشقى مەديتسينالىق-سانيتارلىق كومەك كورسەتىپ جۇرگەنىن دە اتاپ ءوتتى. ماسەلەن ءۇي وشاقتارىندا ينفەكتسيا تارالۋىنىڭ الدىن الۋ ءۇشىن بارلىق جۇقتىرعان پاتسيەنتتەر تاۋلىك بويى باقىلاۋعا الىنادى. ولاردىڭ اراسىندا اسيمپتوماتيكالىق جانە اۋرۋدىڭ جەڭىل اعىمى بار ادامدار دا بار.

گامال توقسامباەۆ بۇگىندە وبلىستا 4819 توسەك-ورىننىڭ كونسەرۆاتسيالانعانىن اتاپ ءوتتى. ال جانساقتاۋ بولىمشەلەرىندە جاتقانداردىڭ كوبىسىنىڭ جاسى 65-تەن اسقاندار ەكەن. قازىرگى ۋاقىتتا ولاردىڭ سانى 72 ادامعا جەتكەن.

وبلىستىڭ باس دارىگەرى بۇگىندە العاشقى مەديتسينالىق-سانيتارلىق كومەك كورسەتەتىن ۇيىمدار قىزمەتىنىڭ كۇشەيگەنىن ايتتى.

– پتر-تەست ينفەكتسيا جۇقتىرعانىن انىقتاپ، ۇيىندە كارانتين جاعدايىندا وتىرعان  پاتسيەنتتەر ءبىزدىڭ مامانداردىڭ ءجىتى باقىلاۋىندا. ولاردىڭ جاعدايى اۋىرلاماس ءۇشىن الدىن الا ەمدەۋ شارالارى تاعايىندالادى. بۇل شارۋانى ىسكە اسىرۋ ءۇشىن 208 ءموبيلدى بريگادا جۇمىس ىستەپ ءجۇر. جالپى، ەپيەدميولوگيالىق جاعداي اۋىرلاپ كەتەر بولسا، ونىڭ الدىن الۋ ماقساتىنداعى جۇمىستار جان-جاقتى قاراستىرىلعان. مىسالى وبلىستا ءدارى-دارمەكتىڭ ءۇش ايعا جەتەتىن قورى بار، – دەپ مالىمدەدى گ.توقسامباەۆ.

ەسكە سالا كەتسەك، وبلىستا ۆاكتسينالاۋ ناۋقانى بيىلعى 1 اقپاننان باستالعان بولاتىن. قازىرگى تاڭدا وڭىردەگى بارلىق قالالار مەن اۋدانداردا 115 يممۋنداۋ كابينەتى جۇمىس ىستەيدى. جۇمىس كۇندەرى سەگىز ءىرى ساۋدا ورتالىعىندا ەگۋ كابينەتتەرى اشىلعانىن دا ايتا كەتۋ كەرەك.

بريفينگ بارىسىندا وبلىستىڭ باس دارىگەرى ءوڭىر تۇرعىندارىنىڭ قاراعاندى قالاسىنداعى فارماتسەۆتيكالىق زاۋىتتا رەسەيلىك تەحنولوگيا بويىنشا وندىرىلەتىن «سپۋتنيك V» جانە وتاندىق QazVac ەكپەسىن الىپ جاتقانىن اتاپ ءوتتى. سونىمەن بىرگە ول وبلىسقا قىتايدىڭ Sinopharm ۆاكتسيناسىنىڭ جەتكىزىلگەنىن دە ءمالىم ەتتى.

سوڭعى جاڭالىقتار

شىمكەنتتە كارانتين كۇشەيتىلەدى

ايماقتار • بۇگىن، 15:47

اتوم كولگە ساپار

ايماقتار • بۇگىن، 15:37

قازاقستاندا جاڭا تەلەارنا اشىلدى

قازاقستان • بۇگىن، 11:55

ۇقساس جاڭالىقتار