مەملەكەت باسشىسى قاسىم-جومارت توقاەۆ جىل باسىندا وتكەن ۇكىمەتتىڭ كەڭەيتىلگەن وتىرىسىندا: «...مەكتەپكە دەيىنگى ۇيىمدارعا كەزەك ماسەلەسى دە شەشىلگەن جوق. 1 جاستان 3 جاسقا دەيىنگى بالالاردى قامتۋ كورسەتكىشى تومەن, نەبارى 48 پايىزدى قۇرايدى. ۇكىمەتكە اكىمدەرمەن بىرگە وسى ماسەلەلەردى شەشۋدىڭ كەشەندى جوسپارىن ازىرلەۋدى تاپسىرامىن. وندا بالالاردى ەرتە دامىتۋ جۇيەسىن قۇرۋ, مەكتەپكە دەيىنگى ءبىلىم بەرۋدىڭ بالامالى تۇرلەرى, ۆاۋچەرلىك جۇيە جانە باسقا دا ماسەلەلەر كىرۋى كەرەك», دەگەن ەدى.
پرەزيدەنت تاپسىرماسى ورىندالار-اۋ. سودان بالالار بالاباقشاعا ەرتە جاستان بارۋعا كوبىرەك مۇمكىندىك الاتىن دا شىعار. بىراق ءبىزدى, ناقتىراق ايتقاندا مەكتەپكە دەيىنگى تاربيە مەن وقىتۋ سالاسىنىڭ پەداگوگى رەتىندە مەنى بالالاردىڭ تاربيەسى, دۇرىس دامۋى الاڭداتادى. ەلىمىزدە تاربيەشىلەردىڭ باسىم بولىگى 3 پەن 6 جاستاعى بالالارمەن جۇمىس ىستەۋگە داعدىلانعان. ال 1,5-2 جاستاعى بالدىرعانداردى تاربيەلەۋ مەن دامىتۋدىڭ ءوز ەرەكشەلىگى بار. دەمەك سوعان ساي باعدارلاما, ءادىس, تەحنولوگيا, جۇمىس قاجەت. بۇل بىزدە بار ما؟
ەلباسى نۇرسۇلتان نازارباەۆ 2018 جىلعى ء«تورتىنشى ونەركاسىپتىك رەۆوليۋتسيا جاعدايىنداعى دامۋدىڭ جاڭا مۇمكىندىكتەرى» اتتى جولداۋىندا 2019 جىلدىڭ 1 قىركۇيەگىنەن مەكتەپكە دەيىنگى ءبىلىم بەرۋ ىسىندە بالالاردىڭ ەرتە دامۋى ءۇشىن ءوز بەتىنشە وقۋ ماشىعى مەن الەۋمەتتىك داعدىسىن دامىتاتىن باعدارلامالاردىڭ بىرىڭعاي ستاندارتىن ەنگىزۋدى تاپسىرعان بولاتىن. مىنە, وسى تاپسىرمانى ورىنداۋ ماقساتىندا ءبىلىم جانە عىلىم مينيسترلىگى بالالاردىڭ ەرتە جاستان دامۋى ءۇشىن ولاردىڭ الەۋمەتتىك داعدىلارىن جانە ءوز بەتىنشە وقۋ داعدىلارىن دامىتاتىن باعدارلاما ازىرلەدى. تاربيەشىلەرگە ءدارىس وقىپ, سەمينار وتكىزۋ كەزىندە اتالعان باعدارلامادان حابارسىز ەكەنىن بايقايمىن. البەتتە ولارعا دا رەنجي المايسىڭ, سەبەبى 1-2 جاستاعى بالالار قابىلدايتىن بالاباقشالار كوپ بولماعاندىقتان, قۇجاتتىڭ قولدانىلۋ اياسى كەڭەيگەن جوق. سوزدەن ىسكە كوشەتىن كەز كەلدى. بۇل ءۇشىن, ارينە بالالار بالاباقشاعا ەرتە جاستان بارۋى كەرەك.
جاڭارتىلعان ءبىلىم باعدارلاماسىنىڭ باسىم باعىتتارى – جاڭا بۋىندى قانداي تاربيەنىڭ ۇلگىسىمەن دامىتۋ كەرەكتىگىن بىلۋگە بولاتىن جاقسى نۇسقاۋلىق. ماسەلەن, كۇندەلىكتى پراكتيكانى ويعا الايىقشى. سمارتفونعا بايلانعان بالانى الاقانداي عانا تەحنيكانىڭ ىشىنەن الىپ شىعۋ قيىن. تىيىمدى تۇسىنبەيتىن سابيلەردىڭ قولىنان تەلەفوندى الىپ قويساق, جىلايدى. ويتكەنى ول ىشكى قاجەتتىلىكتەرىن سول سمارتفون ارقىلى قاناعاتتاندىرادى. سوندىقتان دا وعان تاۋەلدىلىك پايدا بولادى. كوپ اتا-انا, جالپى ەرەسەك قاۋىم بايقاي بەرمەيتىن ءبىر نارسە بار, بالا ءوزىن, سونداي-اق ءوزى تىڭداي الاتىن ادامدى قالايدى. قۋىرشاققا, پوني نەمەسە ورمەكشى ادامعا اڭگىمەسىن ايتادى. بولماسا فوتولار, بەينەلەر ارقىلى قالاعانىن تاۋىپ الىپ, سمارتفونداعى «جاساندى ادامداردى» تىڭدايدى. ءسابيدى قاناعاتتاندىراتىنى جانە وعان ۇنايتىنى – ويىنشىق تا, ەكراننىڭ ارعى جاعىنداعى جاساندى ادامدار دا ونىڭ قاتەلىگىن تۇزەتپەيتىنى, تىيىپ تاستامايتىنى. جاڭارتىلعان ءبىلىم باعدارلاماسى بويىنشا تاربيەشى الدىنداعى تاربيەلەنۋشىنى قاتە سويلەسە دە سوڭىنا دەيىن تىڭداپ, سوڭىندا عانا ونى تۇزەتۋى ءتيىس. بالا نەعۇرلىم قارىم-قاتىناسقا ءجيى ءتۇسىپ, ويىن مەيلىنشە كوبىرەك جەتكىزسە, ول سوعۇرلىم تەزىرەك ورتاعا بەيىمدەلەدى, سمارتفونمەن وقشاۋلانبايدى.
بىراق بالالار ءبارىبىر تەلەفونعا ۇمتىلادى. وسى رەتتە جاڭا ۇرپاقتى قازاق تىلىندە, ۇلتتىق قۇندىلىقتارمەن قىزىقتىرا وتىرىپ تاربيەلەۋ ءۇشىن پەداگوگتار مەن رەجيسسەرلەر, انيماتورلار بىرگە جۇمىس ىستەۋى كەرەك. ەرتە دامىتۋدى ەرتەرەك قولعا الماساق, «z ۇرپاق» وزىنشە وسەدى. بۇل بولاشاققا قاۋىپ ءتوندىرۋى مۇمكىن. سول ءۇشىن ازىردەن ارەكەت ەتۋگە ءتيىسپىز.
گۇلزات دوسىموۆا,
№32 «قىزعالداق» بوبەكجاي-باقشاسىنىڭ ادىسكەرى
قىزىلوردا
