قازاق دەرماتولوگيا جانە ينفەكتسيالىق اۋرۋلار عىلىمي ورتالىعىنىڭ مالىمەتتەرى بويىنشا ەلىمىزدە اعزانىڭ يممۋن تاپشىلىعى ۆيرۋسىنا شالدىققان 500-دەن استام بالا مەن ءجاسوسپىرىم تىركەلگەن. ايتۆ-مەن ءومىر سۇرەتىندەرگە قاتىستى كەمسىتۋشىلىكتىڭ كوپتەپ كەزدەسۋىنە بايلانىستى بىلتىرعى جىلدان باستاپ ەڭبەك جانە حالىقتى الەۋمەتتىك قورعاۋ مينيسترلىگى, دەنساۋلىق ساقتاۋ مينيسترلىگى مەن يۋنيسەف ماماندارى التى وڭىرلىك مەكتەپتە پسيحوالەۋمەتتىك قولداۋدىڭ ۇلتتىق ستاندارتتارىن ەنگىزۋدىڭ قاناتقاقتى جوباسىن جۇزەگە اسىرعان بولاتىن. وسى ورايدا ساراپشىلار مەكتەپتەردە, ينتەرناتتاردا, مەكتەپكە دەيىنگى جانە مەديتسينالىق مەكەمەلەردە كەمسىتۋشىلىك جاعدايلاردىڭ كوپ كەزدەسەتىندىگىن انىقتاعان.
بۇۇ بالالار قورىنىڭ (يۋنيسەف) قازاقستانداعى وكىلدىگى ەڭبەك جانە حالىقتى الەۋمەتتىك قورعاۋ مينيسترلىگى, س.اسفەندياروۆ اتىنداعى قازاق ۇلتتىق مەديتسينا ۋنيۆەرسيتەتى جانە «ايتۆ-مەن ءومىر سۇرەتىن ادامداردىڭ ورتالىق-ازيالىق قاۋىمداستىعى» بىرلەسىپ ۇيىمداستىرعان ايتۆ جانە باسقا دا سوزىلمالى اۋرۋلارمەن ءومىر سۇرەتىن بالالار مەن جاسوسپىرىمدەردى قولداۋعا باعىتتالعان اقپاراتتىق ناۋقان ەندىگى كەزەكتە الماتى, شىعىس قازاقستان, قاراعاندى, تۇركىستان وبلىستارى جانە الماتى, شىمكەنت قالالارىنداعى 30 مەكتەپتە ءساۋىر, مامىر ايلارىندا جالعاسىن تاباتىن بولادى.
ەڭبەك جانە حالىقتى الەۋمەتتىك قورعاۋ ۆيتسە-ءمينيسترى ەرلان اۋكەنوۆ اتاپ وتكەندەي, اتالعان شارا ايتۆ-مەن جانە وزگە دە سوزىلمالى اۋرۋلارمەن ءومىر سۇرەتىن بالالار مەن جاسوسپىرىمدەرگە جاعىمسىز كۇيزەلىستەرگە بوي الدىرماي, دەنساۋلىعىن ساقتاۋعا باعىتتالعان.
«ايتۆ-مەن ءومىر سۇرەتىن ادامداردىڭ ورتالىق ازيا قاۋىمداستىعى» زتب پرەزيدەنتى ءنۇرالى امانجولوۆتىڭ ايتۋىنشا, بالالار مەن جاسوسپىرىمدەردىڭ مۇددەسى ءۇشىن مەكتەپ قىزمەتكەرلەرىنىڭ ايتۆ, ونىڭ بەرىلۋ جولدارى مەن الدىن الۋ تۋرالى تولىق ءبىلىمى بولۋى ماڭىزدى. ايتۆ بالانىڭ باسقالارعا ەشقانداي قاۋىپ توندىرمەيتىنىن, ال مەكتەپ – كەمسىتۋشىلىكتەن قورىقپاي, اركىم قولداۋ تابا الاتىن ورىن ەكەنىن ءتۇسىنۋى ءتيىس. اتالعان قور تاراپىنان «ستيگما يندەكسى» بويىنشا زەرتتەۋ جۇرگىزىلگەن. زەرتتەۋ ناتيجەسى كورسەتكەندەي, بۇل اۋرۋعا شالدىققانداردىڭ باسىم كوپشىلىگى كەمسىتۋشىلىككە مەديتسينالىق ۇيىمداردا تاپ بولادى ەكەن. اتالعان قور ونى بولدىرماۋدىڭ جولدارىن قاراستىرا وتىرىپ, ءدارى-دارمەك باعاسىن ارزانداتۋعا, ەمدەۋ حاتتاماسىن جاقسارتۋدى جەتىلدىرىپ كەلەدى. قازاقستانداعى يۋنيسەف وكىلى ارتۋر ۆان ديزەن اتاپ وتكەندەي, ءار بالانىڭ كەمسىتۋسىز جانە قۇقىقتارى مەن مۇددەلەرى بۇزىلماي ءومىر سۇرۋگە قۇقىعى بار. سوندىقتان دا وسال توپقا جاتاتىن بالالارعا ەرەكشە نازار اۋدارۋ كەرەك. مەكتەپتەردە قولداۋ كورسەتىپ, تۇسىنىستىكپەن قاراۋ كەرەك. وسىنداي ورتالاردا عانا وزدەرىن جايلى سەزىنە الاتىن ايتۆ-مەن ءومىر سۇرەتىن بالالار ءۇشىن مەكتەپ وقۋشىلارى مەن قىزمەتكەرلەرىنىڭ دوستىق پەيىلى جانە قولداۋ كورسەتۋى اسا ماڭىزدى.
