سەنات قابىرعاسىندا قابىلدانعان زاڭدار مەن پارلامەنتتىك تىڭداۋلار تۋرالى جۋرناليستەرگە ايتىپ بەردى. ۇلتتىق قۇندىلىقتار ماسەلەسىنىڭ دە باستى نازاردا ەكەنىن جەتكىزدى.
سەناتور نۇرتورە ءجۇسىپ: «سەنات قابىرعاسىندا ۇلتتىق قۇندىلىقتاردى ۇلىقتايتىن پارلامەنتتىك تىڭداۋ ءوتتى. قازاق قوعامىنىڭ نەگىزگى ۇيىتقىسى ۇلتتىق تاربيە, قازاقى قالىبىمىزدى ساقتاۋ, جاھاندانۋ جاعدايىندا ءتىلىمىزدىڭ قولدانىس اياسىن كەڭىتۋ, ءدىنىمىز, مادەنيەتىمىز, ادەبيەتىمىز سەكىلدى وزەكتى ماسەلەلەردىڭ بارلىعى تالقىلانادى. سونىڭ ىشىندە مەملەكەت باسشىسى قاسىم-جومارت توقاەۆ كوتەرگەن ماسەلەگە دە ەرەكشە كوڭىل ءبولىندى. قوعامداعى وزەكتى ماسەلەنىڭ ءبىرى مەملەكەتتىك ءتىل تۋرالى زاڭ جوباسىن جاساۋ جونىندە نۇسقاۋ بەرىلدى.
قازىر ءداستۇرلى بۇقارالىق اقپارات قۇرالدارى ۇلتتىق قۇندىلىقتاردى ۇلىقتاۋدىڭ ۇياسى بولىپ تۇر. قازاق ءتىلى, ءدىلى, مادەنيەتى, ادەبيەتى, تاريحى, بۇگىنى مەن ەرتەڭىنە قاتىستى ماسەلەنىڭ بارلىعىنا رەسپۋبليكالىق, اۋداندىق گازەتتەرگە دەيىن شىرىلداپ, جاناشىرلىقپەن ماسەلە كوتەرەدى. سونىڭ ىشىندە بىرنەشە باسىلىمدى باۋىرىنا باسىپ وتىرعان «قازاق گازەتتەرى» جشس-نىڭ ۇلتتىق قۇندىلىقتاردى ۇلىقتاۋداعى ءرولى زور. قوعامدا كۇن تارتىبىنەن تۇسپەي كەلە جاتقان نەگىزگى ماسەلەنىڭ بارلىعى وزدەرىڭىزگە دە بەلگىلى. ايتىلىپ تا, جازىلىپ تا, كوتەرىلىپ تە كەلەدى. پارلامەنتتىك جۇمىس توبى قازاقتىلدى باسىلىمداردا نە جازىلىپ, قانداي وتكىر ماسەلە كوتەرىلىپ جۇرگەنىن, ونىڭ ىشىندە شەشىلمەي تۇرعان ماسەلە قايسىسى – وسىنىڭ بارىنە مونيتورينگ جاسالىپ, ۇكىمەتتىڭ قۇرىلىمدىق بولىمدەرىنە ءبولىپ-ءبولىپ, قوردالانعان ماسەلەلەردى كەزەڭ-كەزەڭىمەن شەشىپ وتىرۋى كەرەگىن دە ايتقانبىز.
وكىنىشكە قاراي, «ەستيتىن مەملەكەت قاعيداسى» دەگەنىمىزبەن, ءداستۇرلى باق-تىڭ جازعانىنا نازار اۋدارىلماي تۇر. پاندەميا جاعدايىندا دارىگەرلەر, مۇعالىمدەر الدىڭعى شەپتە. ولارعا الەۋمەتتىك جاعىنان قانشاما كومەك كورسەتىلىپ, قارجىلاي قولداۋ بەرىلدى. الەۋمەتتىك پاكەت ماسەلەلەرى قوزعالىپ جاتىر. ال جۋرناليستەر شە؟ باسىن قاتەرگە تىگىپ, الدىڭعى شەپتە ءجۇرىپ, اقپارات تاراتىپ, ىندەت وشاعىندا جۇمىس ىستەدى. مىسالى, بىلتىر پاندەميانىڭ العاشقى تولقىنىندا قانشاما مىقتى جۋرناليست, قالامگەر ازاماتتاردان ايرىلىپ قالدىق. ولاردىڭ قاتارى سيرەپ جاتقان تۇستا «رۋحانياتتىڭ جوقشىسى كىم بولادى؟» دەگەن سۇراق ويلاندىرادى», دەپ پىكىرىن ءبىلدىردى.
سەنات دەپۋتاتتارى نۇرتورە ءجۇسىپ, ءلاززات سۇلەيمەن, دينار نوكەتاەۆا, سۇلتانبەك ماكەجانوۆ ۇلتتىق باسپاسوزدە كوتەرىلىپ جاتقان ماسەلەنىڭ بارلىعىنا بىردەي مۇمكىندىگىنشە نازار اۋدارىلاتىنىنا سەندىردى. ۇلتتىق تاربيە, جەر ماسەلەسى, ۇلتتىق بىرەگەيلىك پەن جاھاندانۋ جاعدايىندا ءتىل, ءدىل تازالىعىن ساقتاپ قالۋ, اسىرەسە بالالار باسىلىمىنىڭ جاي-كۇيى, جالپى باسپاسوزگە جازىلۋ, باسىلىمداردى تاراتۋ ىسىندە كەزدەسىپ وتىراتىن كەدەرگىلەر تۋرالى گازەت-جۋرنالداردىڭ باس رەداكتورلارى مەن سەناتورلار دوڭگەلەك ۇستەل سيپاتىنداعى وتىرىستا جان-جاقتى تالقىلادى.
ۇلتتىق قۇندىلىقتاردى سىڭىرۋدەگى ۇلتتىق ءباسپاسوزدىڭ قاراشاڭىراعىنا اينالىپ وتىرعان ۇجىمعا العىس ايتقان سەناتورلار توبى الداعى ۋاقىتتا دا وسىنداي كەلەلى ماسەلەلەردى بىرلەسە تالقىلاۋدى ۇسىندى.
