دانيال «جاساندى ينتەللەكت» ارنايى بەيىنى بويىنشا «حالىقتار دوستىعى» اتالىمىندا ءبىرىنشى ورىندى يەلەندى.
وليمپيادانى ۇيىمداستىرۋشىلاردىڭ قاتارىندا «ۇيىرمە قوزعالىسى» جانە ۇتب «پلاتفورماسى», رەسەيدىڭ عىلىم جانە جوعارى ءبىلىم, وقۋ-اعارتۋ مينيسترلىگى, سونداي-اق ستراتەگيالىق باستامالار اگەنتتىگى مەن ۆەنچۋرلىق كومپانيا بار. جاساندى ينتەللەكت سالاسىنداعى ۇزدىك وقۋشىلاردى قۇتتىقتاعان سبەربانك پرەزيدەنتى-باسقارما توراعاسى گەرمان گرەفتىڭ ايتۋىنشا, بۇدان بەس جىل بۇرىن AI جايىندا سيرەك قوزعالعان تاقىرىپ بولاتىن. ال بۇگىندە AI قايتا ورلەۋ, جاندانۋ كەزەڭىمەن بايلانىستى. گەرمان گرەف قاتىسۋشىلارعا ءسات-ساپار تىلەپ, ولاردىڭ كاسىبي الاڭداردا مول تاجىريبە جيناقتايتىندىقتارىنا سەنىم ارتتى.
بيىلعى جىلعى وليمپيادا جاڭا رەكورد ورناتتى. ويتكەنى, بارلىق ترەكتەر بويىنشا رەسەيدىڭ 85 ءوڭىرى مەن شەتەلدەردەن 100 مىڭنان استام ءوتىنىش كەلىپ تۇسكەن. وسى ورايدا بەس مىڭنان استام وقۋشى وسى الاڭدا جاساندى ينتەللەكت پەن سۋ استى روبوتوتەحنيكاسىنان باستاپ گەنومدىق وڭدەۋ, VR تەحنولوگياسىنا دەيىنگى وتىزعا جۋىق تەحنولوگيالىق باعىتتى قامتۋ مۇمكىندىگىنە يە بولدى. ال «اقپاراتتىق قاۋىپسىزدىك», «جاساندى ينتەللەكت», «بيزنەس پروتسەستەردى اۆتوماتتاندىرۋ» ەڭ تانىمال دەگەن IT پروفيلدەر قاتارىن تولىقتىردى.
ۇتب «جاس ماماندار» باعىتى ديرەكتورىنىڭ ورىنباسارى يۋليا حانجينا «فينالدا قاتىسۋشىلار تەك تەحنولوگيالىق تاپسىرمالاردى عانا شەشىپ قويعان جوق. وقۋشىلار الدىندا جاساندى ينتەللەكت, روبوتوتەحنيكا, عارىش يندۋسترياسى سالاسىنداعى جەتەكشى كومپانيالاردا جۇمىس ىستەيتىن ماماندار اينالىساتىن جاڭا سىن-قاتەرلەر تۇردى. جوعارى سىنىپ وقۋشىلارى ەرەسەك ارىپتەستەرىن باسىپ وزاتىنداي قىزىقتى شەشىمدەردى ۇسىنا ءبىلدى, – دەپ اتاپ وتسە, «ۇيىرمە قوزعالىسى» جۇمىس توبىنىڭ جەتەكشىسى دميتري زەمتسوۆتىڭ ايتۋىنشا, «جاساندى ينتەللەكت» بەيىنىنىڭ فينالىندا ورىسشا ماتىندەردى ماشينالىق ءتۇسىنۋ سالاسى ەرەكشە نازار اۋدارادى. وقۋشىلار ءبىر جىل بويى وسىنداي تاپسىرمامەن جۇمىس ىستەگەن رەسەيلىك data-science قوعامداستىعى قول جەتكىزە الماعان ناتيجەنى كورسەتتى». ال دانيال جاساندى ينتەللەكتىڭ بولاشاقپەن بايلانىستى, جاڭا زامان سۇرانىسىنان تۋىنداعان قاجەتتىلىك ەكەندىگىن جەتكىزدى. ونىڭ ايتۋىنشا, ترەندتە بولۋ, وقۋ, ىزدەنۋدە وليمپيادا ۇلكەن الەمگە جول اشادى.
بيىلعى جىلى فيناليستەر جاساندى ينتەللەكت, ماشينالىق وقىتۋ, ۆيرتۋالدى الەم, گەنومدىق وڭدەۋ سياقتى سۇرانىسقا يە تەحنولوگيالارمەن بايلانىستى ماسەلەلەرگە نازار اۋداردى. قورىتىندى سايىسقا جۇزدەن استام وقۋشى قاتىسىپ, ولاردىڭ الدىندا ارنايى الگوريتم قۇرۋ مىندەتى تۇرسا, سوڭعى سىناقتا قاتىسۋشىلارعا «كريستوفاري» سۋپەركومپيۋتەرىمەن جۇمىس ىستەۋ مۇمكىندىگى تۋدى.
