قازاق ء«ۇش كۇننەن كەيىن توزاققا دا ۇيرەنەدى» دەپ بەكەر ايتپاسا كەرەك. ىندەت قۇرساۋعا سالدى دەپ تىرشىلىك توقتاپ قالا ما؟ كارانتين, كومەندانتتىق ساعات, دۇكەندەردىڭ بەلگىلى ءبىر ساعاتتاردا جۇمىس ىستەۋىنە قوسا, قاۋىپسىزدىگىن ويلاپ, كوپشىلىك جەرگە بارۋدان قاشقاقتاعان جاندار ساۋداسىن ەلەكتروندى تۇردە جاساۋعا كىرىستى. ينتەرنەت ارقىلى قىزمەت كورسەتۋدىڭ دە ءتۇر-ءتۇرى كۇننەن-كۇنگە ارتىپ بارادى. وندا نە جوق دەيسىز, بالالارعا قوسىمشا ساباق ۇيرەتەسىز بە, اس الدىرىپ ىشەسىز بە, ازىق-ت ۇلىك قاجەت پە, كيىم كەرەك پە, الدە كەڭەسكە ءزارۋسىز بە, تولىپ جاتقان قىزمەت كورسەتۋشىنىڭ ىشىنەن ىزدەگەنىڭىزدى ماڭدايىنان شەرتىپ تۇرىپ تاڭداۋ جاسايسىز.
بۇۇ –نىڭ ساۋدا جانە دامۋ جايىنداعى جاڭا بايانداماسىندا بىلتىردىڭ وزىندە ۆيرتۋالەمدەگى ساۋدا بارلىق بولشەك ساۋدانىڭ بەس بولىگىن قۇراسا, بيىل كورسەتكىش جوعارىلاپ 16 پايىزدان 19 پايىزعا كوتەرىلگەنى ايتىلعان. ساراپشىلار پاندەمياعا دەيىن اق ەلەكتروندى ساۋدانىڭ قارقىندى دامىپ جاتقانىن, 2019 جىلى ونىڭ 26,6 تريلليون دوللارعا جەتىپ, ءىجو 30 پايىزىن قۇراعانىن العا تارتادى. ال ىندەت ونى ودان دا ۇدەتە تۇسكەن.
ونلاين ساۋدانى ەڭ كوپ جاسايتىن قاي ەلدىڭ تۇرعىندارى ەكەن؟ سويتسە ەلەكتوندى ساۋدا قىزىعىنىڭ ءدامى تاڭدايلارىنا تاتىعانداردىڭ كوشىن وڭتۇستىك كورەي ەلىنىڭ حالقى باستاپتى. بۇل ەلدە بولشەك ساۋدادا ينتەرنەت ارقىلى الدىرۋ بىلتىردىڭ وزىندە 26 پايىزدى قۇراعان ەكەن, ەكىنشى ورىندا–قىتاي, ۇشىنشىدە– ۇلىبريتانيا ازاماتتارى. ال ينتەرنەت يگىلىگىن ءتيىمدى پايدالانعان كومپانيالار ىشىندە كانادالىق ونلاين-پلاتفورما Shopify العا شىعىپ, ونىڭ ساۋداسى ءبىر جىلدا 95 پايىزعا ارتقان. امەريكالىق Walmart جەلىسى ساۋدا اينالىمىن 72 پايىزعا جەتكىزسە, قىتايلىق Pinduoduo تۇتىنۋشىلارعا 66 پايىزعا تاۋار جەتكىزىپ بەرىپ, شىلقىمايعا باتقان. دەگەنمەن ونلاين قىزمەت كورسەتۋشىلەر اراسىندا ىندەتتەن تۇرالاپ قالعاندار دا جەتەرلىك دەيدى ساراپشىلار. اسىرەسە ول تۋريستەرگە ونلاين قىزمەت كورسەتەتىن كومپانيالارعا اۋىر تيگەن. مىسالى تۋريستەرگە اۆيابيلەتتەر الۋعا, مەيرامحانا, قوناقۇيلەرگە تاپسىرىس الاتىن جانە اۆتوموبيلدەردى جالعا بەرۋدى قامتاماسىز ەتەتىن Expedia توبى اۋىر شىعىنعا ۇشىراعان. ءسويتىپ ولاردىڭ تابىسى جىل ىشىندە 66 پايىزعا تومەندەسە, پاتەرلەردى جالعا تاپسىرۋ سەرۆيسى جونىنەن الەمگە ايان Airbnb 37 پايىزعا دەيىن تاپسىرىس جوعالتىپتى.
