«قازگيدرومەت» رمم اگرومەتەورولوگيالىق مونيتورينگ جانە بولجاۋ دەپارتامەنتىنىڭ ديرەكتورى نوننا لوەنكونىڭ ايتۋىنشا, كوكتەمگى ەگۋ جۇمىستارىنىڭ الدىندا بىرقاتار وڭىردە ونىمدىك ىلعال قورى جەتكىلىكتى بولادى دەپ كۇتىلۋدە.
«اتاپ ايتقاندا, اقمولا وبلىسىنىڭ استراحان, اتباسار, ەگىندىكول, زەرەندى, تسەلينوگراد اۋداندارىندا, قوستاناي وبلىسىنىڭ بەيىمبەت مايلين, سارىكول, قوستاناي اۋداندارىندا, سولتۇستىك قازاقستان وبلىسىنىڭ شال اقىن اۋدانى مەن جۇماباەۆ, تيميريازەۆ, جامبىل اۋداندارىنىڭ كەي جەرلەرىندە, قاراعاندى وبلىسىنىڭ بۇقار جىراۋ, نۇرا اۋداندارىنىڭ كەيبىر تۇستارىندا, شىعىس قازاقستان وبلىسىنىڭ گلۋبوكوە جانە التاي اۋداندارىندا توپىراقتىڭ ىلعالدىعى قاناعاتتانارلىق دەڭگەيدە», دەدى سپيكەر.
ونىڭ سوزىنشە, وسى جانە وزگە دە مالىمەتتەر بيىل قازاندا كاسىپورىن دايىنداپ ىسكە قوسقان «AgroData» ۆەب-قوسىمشاسىنا ورنالاستىرىلعان.
«ەكولوگيا ءمينيسترىنىڭ تاپسىرماسىمەن ءبىز فەرمەرلەرگە ارنالعان ۆەب-قوسىمشانى ازىرلەدىك. قازىر ونىڭ ءموبيلدى نۇسقاسىن جاساپ جاتىرمىز. دەگەنمەن قازىردىڭ وزىندە براۋزەر ارقىلى ۇيالى تەلەفونمەن قوسىمشاداعى اقپاراتتى الۋعا بولادى. بۇل جەردە قازگديرومەتتىڭ تەك اۋا رايىن بولجاۋمەن اينالىسپايتىنىن اتاپ ءوتۋىمىز كەرەك. مۇندا حالىقتىڭ قاۋىپسىزدىگىن, ونىڭ ىشىندە ازىق-ت ۇلىك قاۋىپسىزدىگىن قامتاماسىز ەتۋگە باعىتتالعان ونىمدەردىڭ تولىق سپەكترى دايىندالادى», دەپ اتاپ ءوتتى نوننا لوەنكو.
دەپارتامەنت ديرەكتورى «AgroData» جۇيەسىندەگى اقپاراتتىڭ كوبى بۇرىن دا بولعانىن, بىراق ولاردىڭ ءارتۇرلى پلاتفورمالاردا ورنالاسقانىن ايتادى. ال جاڭا قوسىمشا فەرمەرلەرگە قاجەتتى بارلىق اقپاراتتى ءبىر جەردەن الۋعا مۇمكىندىك تۋعىزىپ وتىر.
«بۇل مالىمەتتەرگە قولجەتىمدىلىكتى جەڭىلدەتىپ, ونى تيىمدىرەك قولدانۋعا مۇمكىندىك بەرەدى. قوسىمشانى نەعۇرلىم تۇسىنىكتى, قولدانۋعا جەڭىل ەتىپ جاساۋعا تىرىستىق. قازگيدرومەت ازىرلەي الاتىن فەرمەرگە قاجەتتى اقپاراتتى بەلگىلى ءبىر شارۋاشىلىققا بەيىمدەلگەن ەسەپكە جۇگىنبەي-اق ءموبيلدى قوسىمشادان كورۋگە بولادى. بۇعان 3 ساعات جاڭارىپ وتىراتىن اۋا رايى, سينوپتيكالىق جانە اگرومەتەورولوگيالىق بولجامدار مەن ناقتى دەرەكتەر كىرەدى», دەيدى نوننا لوەنكو.
بۇدان بولەك, سۋارۋ ماۋسىمىندا مەملەكەتتىك باقىلاۋ جەلىلەرىنىڭ پۋنكتتەرى بويىنشا بەلسەندى جانە ءتيىمدى تەمپەراتۋرالاردىڭ ولشەمى مەن توپىراق ىلعالدىلىعىنىڭ قورى, ال كۇن سۋىق كەزدە قاردىڭ بيىكتىگى, توڭنىڭ تەرەڭدىگى بويىنشا اقپارات بەرىلەدى.
«AgroData»-دا سونىمەن قاتار بۇرىن بولماعان ءار ون كۇندىككە ارنالعان ناقتى مالىمەتتەر دە بار. وسىلايشا, الىنعان اقپارات بويىنشا اگروتەحنولوگيالاردى ۋاقتىلى جانە ءتيىمدى قولدانۋ ەگىن ناۋقانىن دۇرىس جوسپارلاۋعا, وسىمدىكتەردىڭ سولىپ قالۋىنىڭ الدىن الۋعا مۇمكىندىك بەرەدى.
«ىلعال قورى تۋرالى مالىمەت كوكتەمگى ەگىن ناۋقانىندا ءتيىمدى ەگىس نورماسىن انىقتاۋدا, تۇقىمدى تاستايتىن تەرەڭدىكتى تاڭداۋدا, تىڭايتقىش قولدانۋدا ۇلكەن ءرول اتقارادى. مۇنىڭ بارلىعى ءونىمنىڭ كولەمىنە اسەرىن تيگىزەدى», دەيدى ول.
