يزرايل دەنساۋلىق ساقتاۋ مينيسترلىگى جاپا شەككەن 150-دەن استام ادامعا كومەك كورسەتىلگەنىن مالىمدەدى. اۋىر حالدە جاتقان ناۋقاستاردىڭ دا سانى ءوسىپ جاتىر.
پرەمەر-مينيستر بينيامين نەتانياحۋ وقيعانى «ۇلكەن اپات» دەپ اتاپ, قاتتى الاڭداتقانىن, جارالىلاردىڭ تەزىرەك ساۋىعۋىن تىلەيتىنىن جەتكىزدى.
ماسەلەنىڭ مانىسىنە ورالساق, قاسيەتتى مەرەكەنى اتاپ وتۋگە ءيزرايلدىڭ تۇكپىر-تۇكپىرىنەن ون مىڭداعان ادام جينالعان. اتاۋلى ءىس-شارا كەزىندە بورەنەلەردىڭ ءبىرى قۇلاپ, ادامدار ءبىرىن-ءبىرى يتەرمەلەي باستاپتى. كەيبىر باق وقيعا ورنىندا ادامداردىڭ دەنەسى جاتقانىن جازادى. الايدا يزرايل ۇكىمەتى بۇعان قاتىستى رەسمي مالىمدەمە بەرمەدى. اۋىر جاراقات العانداردى تىكۇشاقپەن تاسىمالداعان. تاۋ باسىندا ۇيالى بايلانىس ناشار بولسا كەرەك, ۇرەيلەنگەن ادامدار جاقىندارىمەن بايلانىسا الماعان.
قۇقىق قورعاۋ ورگاندارىنىڭ وكىلدەرى جينالعانداردىڭ ءبىرى ءسۇرىنىپ كەتىپ, ادامدارعا كەلەڭسىزدىك تۋعىزدى, ودان جينالعان جۇرت ءبىرىن-ءبىرى يتەرمەلەپ, سوڭىندا ونداعان ادام قۇلادى دەيدى. ال جينالعاندار بولسا وقيعانىڭ ناقتى قالاي باستالعانىن بىلمەيتىنىن ايتادى. الايدا ۇلكەن اپاتتىڭ بولعانىن جاسىرمايدى.
بۇل اپات جاقىندا عانا قاتاڭ كارانتيندىك تالاپتاردان باس تارتىپ, قالىپتى ومىرگە قايتا ورالا باستاعان يزرايل ءۇشىن ۇلكەن سوققى بولىپ وتىر. بيلىكتەگىلەر دە بۇل كەلەڭسىزدىكتىڭ كۇتپەگەن جەردەن كەلگەنىن ايتۋدا. «ەندى عانا بۇرىنعى قالپىمىزعا كەلىپ مەرەكە تويلاۋعا شىعىپ ەدىك. بەيبىت كۇندە ونداعان ادام قازا تاپتى. بۇل – ۇلكەن اپات», دەيدى حالىق.
جينالعان حالىقتىڭ كوبى – ورتودوكس ەۆرەيلەر. ولار جىل سايىن الدىن الا بەلگىلەنگەن كۇنى مەرون تاۋىنىڭ باسىنا ءداستۇرلى تۇردە جينالادى. بۇگىنگە دەيىن جەتكەن دەرەكتەر بويىنشا بەلگىلى دانىشپان راببي شيمون ءدال وسى تاۋدا جەرلەنگەن. حالىق ويشىلدىڭ باسىنا ءتاۋ ەتىپ, قۇلشىلىق جاساۋعا جينالادى. بيىل قاسيەتتى ورىنعا 100 000-نان استام ادام كەلگەن. بۇل ءىس-شارا ەۆرەيلەر ءۇشىن قاجىلىق ىسپەتتەس. تاۋ باسىنا بارۋدى ۇيىمداستىراتىن ارنايى كومپانيالار دا قاراستىرىلعان. ماسەلەن, بيىل ەلدىڭ تۇكپىر-تۇكپىرىنەن كەلەتىن حالىققا 650 اۆتوبۋس دايىندالعان.
«حاتتسالا» قۇتقارۋ قىزمەتىنىڭ ديرەكتورى ەلي بير بيىلعى ءىس-شاراعا ادامدار كۇتكەندەگىدەن كوپ كەلگەنىن ايتادى. باسشىنىڭ مالىمدەۋىنشە, الاڭ ودان ەداۋىر از ادامعا دايىندالعان. ادامداردىڭ ارتىق قوزعالىسىنىڭ قيىندىق تۋدىرۋى دا سودان ەكەن. اپات سالدارىن جويۋ مەن قۇتقارۋ جۇمىستارى ءۇشىن 5 مىڭ پوليتسيا قىزمەتكەرى جۇمىلدىرىلعان.
ەلدەگى مەديتسينا قىزمەتكەرلەرى كوروناۆيرۋس پاندەمياسىنا قاتىستى قاتاڭ شەكتەۋلەر الىنعانىمەن, كوپشىلىك جەردە جينالۋ ءالى دە قاۋىپتى ەكەنىن الدىن الا ەسكەرتكەن. وقيعا ورنىندا بولعاندار اپات ادامدارعا قولايسىزدىقتان تۋدى دەگەنگە سەنەر ەمەس. تەلەارنالارعا بەرگەن سۇحباتتارىندا كۋاگەرلەر باسىندا بومبا جارىلدى دەپ ويلاعانىن ايتىپتى.
دەگەنمەن, كوپشىلىك بۇل وقيعانى بەلگى دەپ قابىلداۋدا. «راببي شيموننىڭ ءوزى مەن بارلىعىنىڭ كۇناسىن كەشىرەمىن» دەدى. ال ءدال راببي شيموننىڭ جەرلەنگەن جەرىندە وسىنداي اپات بولىپ جاتسا, وندا جەردەگى قاۋىم ءوز ارەكەتىن سارالاپ, ءوزىن ءوزى تەرگەۋگە الۋى ءتيىس. بۇل – بەلگى», دەيدى حالىق.
قۇتقارۋ قىزمەتىمەن قاتار, ەرىكتىلەر دە جۇمىسقا تارتىلدى. ولار «قانشا اپاتتى جاعدايدا جۇمىس ىستەسەك تە مىناداي اپاتتى ءبىرىنشى رەت كورىپ وتىرمىز. ەشقانداي كۇشتىڭ ارالاسۋىنسىز, تابيعي فاكتورلارسىز ادامداردىڭ قايتىس بولعانى تاڭعالدىرادى. جەدەل جاردەممەن تالاي جىل جۇمىس ىستەدىم, دەگەنمەن ءدال وسى سىندى وقيعاعا العاش رەت تاپ بولىپ تۇرمىن», دەيدى لازار حيمان ەسىمدى ەرىكتى.
بىلتىر كوروناۆيرۋس پاندەمياسىنا بايلانىستى تاۋ باسىنا جينالۋعا تىيىم سالىنعان. بيىل ءيزرايلدىڭ ۆاكتسينالاۋ باعدارلاماسى وڭ ناتيجە بەرىپ, حالىقتىڭ 54 پايىزى ەكپە سالدىرعاننان كەيىن ۇكىمەت قاتاڭ شەكتەۋلەردى الىپ تاستاعان. بۇل اپات ۇكىمەتتى جاڭا شەكتەۋلەر قويۋعا ماجبۇرلەۋى مۇمكىن.
