تۋرنير قازاقستان تاۋەلسىزدىگىنىڭ 30 جىلدىعى اياسىندا ۇيىمداستىرىلدى. وبلىس ورتالىعىنداعى «مۇز ايدىنى» سپورت كەشەنىندە 29 ءساۋىر - 1 مامىر ارالىعىندا وتكەن جارىس بيىل بەسىنشى رەت جالاۋىن كوتەردى. رەسپۋبليكالىق تۋرنيرگە نۇر-سۇلتان, الماتى, شىمكەنت قالالارى جانە بىرقاتار وبلىستاردان 10 كوماندا قاتىستى. ءدۇبىرلى سايىستا 5-18 جاس ارالىعىنداعى سپورتشىلار قىسقا جəنە ەركىن باعدارلامالاردا ونەر كورسەتتى.
جارىس كارانتين تالاپتارىن ساقتاي وتىرىپ, كورەرمەندەرسىز وتكىزىلدى. «مەنىڭ اتىمدا مۇنداي جارىستىڭ بولۋى - ءوزىم ءۇشىن ۇلكەن ماقتانىش. تۋرنير جوعارى دەڭگەيدە ءوتتى. قاتىسۋشىلاردىڭ دايىندىعى دا, ويىن كورسەتۋى دە ۇنادى. ەڭ باستىسى, وسىنداي تۋرنيرلەر ارقىلى سپورتشىلار ءوزىن شىڭداپ, ەلىمىزدىڭ اتىن الەمگە ايگىلى ەتسە ەكەن دەيمىن. جالپى, وسى دودانىڭ وتۋىنە قولداۋ كورسەتكەن ءارى مەن ءۇشىن جانكۇيەر بولىپ جۇرەتىن جەرلەستەرىمە ايتار العىسىم شەكسىز», دەدى مانەرلەپ سىرعاناۋشى ەليزابەت تۇرسىنباەۆا.
قازىرگى تاڭدا قىزىلوردا وبلىسىندا 60-قا جۋىق بالا مانەرلەپ سىرعاناۋمەن اينالىسسا, بۇل تۋرنيرگە وڭىردەن ونعا جۋىق سپورتشى قاتىستى. «ايماقتا مانەرلەپ سىرعاناۋ سپورتى دامىپ كەلەدى. ال وعان ەليزابەت سەكىلدى ەل ماقتانىشى سۇبەلى ۇلەس قوسارى انىق. مەن كاسىپكەر رەتىندە مۇنداي تۋرنيرلەردى قولداۋعا دايىنمىن. سەبەبى الداعى ۋاقىتتا سىر جاستارى اراسىنان ەلىمىزدىڭ نامىسىن حالىقارالىق ارەنالاردا قورعايتىن دارىندى سپورتشىلار وسەدى دەپ سەنەمىن», دەدى وبلىستىق كونكي سپورتى فەدەراتسياسىنىڭ پرەزيدەنتى ماعجان ەراليەۆ.
