«تۇرعىندارعا قالادا قولايلى ءومىر ءسۇرۋ ءۇشىن جاعداي جاساۋداعى باسىمدىقتاردىڭ ءبىرى - جولداردى سالۋ جانە جوندەۋ, قوعامدىق كولىككە ارنالعان Bus Lane جەلىسىن كەڭەيتۋ, ۆەلوجول قۇرۋ.
ەلورداداعى كليماتتىق جاعدايعا بايلانىستى اباتتاندىرۋ مەن جول جۇمىستارىن جۇرگىزۋ ماۋسىمى قىسقا. جىلىتۋ ماۋسىمى 7 ايعا دەيىن سوزىلادى. دەگەنمەن قولايلى جاعدايلار تۋىنداعاننان كەيىن قالادا جولداردى جوندەۋ جانە اۋدانداردى اباتتاندىرۋ بويىنشا اۋقىمدى جۇمىستار جۇرگىزىلۋدە. بيىل 100-دەن استام كوشەنى سالىپ, جوندەيمىز.
وتكەن جىلداعىداي, قالانىڭ ەسكى بولىگى مەن ەلدى مەكەندەرگە باسا نازار اۋدارامىز. بۇگىن بىرقاتار كوشەلەردەگى جول جۇمىستارىنىڭ بارىسىمەن تانىستىم. مىسالى, يۋ.مالاحوۆ كوشەسىندە (ر.دۇيسەنباەۆ كوشەسىنەن سۋسامىر كوشەسىنە دەيىن), كوسموناۆتوۆ كوشەسىندە (قابانباي باتىر داڭعىلىنان اراي كوشەسىنە دەيىن), م.تولەباەۆ كوشەسىندە (ب.مومىش ۇلى داڭعىلىنان ر.قوشقارباەۆ داڭعىلىنا دەيىن), م.گوركي كوشەسىندە (ج.جاباەۆ كوشەسىنەن ت.مۇساباەۆ كوشەسىنە دەيىن) جانە ت. ب. اعىمداعى جوندەۋ جۇمىستارى جۇرگىزىلىپ جاتىر. سونىمەن قاتار تاعى 37 كوشەدە اعىمداعى جوندەۋ جۇمىستارى جۇرگىزىلدى. تسيرك عيماراتىنىڭ اينالاسىندا جولدىڭ ورتاشا جوندەۋى اياقتالدى. ول بويىنشا بىرنەشە رەت وتىنىشتەر كەلىپ ءتۇستى. سونىمەن قاتار تۇركىستان كوشەسىنىڭ بويىنداعى ( ۇلى دالا داڭعىلىنان كەرەي, جانىبەك حاندار كوشەسىنە دەيىن) ءبولۋ جولاعىن قايتا جوندەۋ جۇمىستارىن جۇرگىزەمىز. بۇل جولدى ءۇش جولاقتان التى جولاققا دەيىن, ياعني ەكى ەسە كەڭەيتۋگە مۇمكىندىك بەرەدى. جازدا Bus Lane جولاعىن ىسكە قوسامىز. سونداي-اق سول ۋچاسكەدە ساياباق پايدا بولادى. وتكەن جىلى, مىسالى, ءبولۋ جولاعى ماڭگىلىك ەل داڭعىلى بويىنشا بولشەكتەلدى. بۇل ماشينالار اعىنىن ازايتۋعا مۇمكىندىك بەردى.
ساپاسىز جوندەلگەن جانە سالىنعان جولداردى قابىلدامايمىز. مەردىگەر ءوز ەسەبىنەن قالپىنا كەلتىرەدى, ال جۇمىسىنا نەمقۇرايلى قارايتىن كومپانيالارمەن كەلىسىمشارتتاردى توقتاتامىز. وتكەن جىلى 173-تەن استام كوشەنى, سونىڭ ىشىندە قالانىڭ ەلدى مەكەندەرىندەگى كوشەلەردى جوندەدىك. «جۇمىسپەن قامتۋدىڭ جول كارتاسى» باعدارلاماسى بويىنشا جوندەۋ جۇمىستارىن جۇرگىزۋ سالاسىندا 4 مىڭنان استام جۇمىسشى ورنى قۇرىلدى», دەپ جازدى قالا اكىمى التاي كولگىنوۆ.
