زەرتحانا شىمىلدىعى تەاتردىڭ جاس اكتەرى ءبازىل سۇلتانعازى رەجيسسەرلىك ەتكەن ورالحان بوكەيدىڭ «ۇيقىم كەلمەيدى» دراماسىمەن سالتاناتتى تۇردە اشىلدى.
لابوراتوريانىڭ ماقساتى – شىعارماشىل جاندار ءۇشىن بايلانىس ورتاسىن قۇرۋ جانە ونەرگە وزگەشە كوزقاراس جاساپ, تىڭ دۇنيەلەردى ساحنالاۋ. سونداي-اق, شەتەلدىك ماماندارمەن شەبەرلىك ساباقتارىن ۇيىمداستىرۋ, جازۋشى-دراماتۋرگتەرمەن كەزدەسۋ, پەسا تالقىلاۋ, جاڭا رەجيسسەرلەرمەن بايلانىس ورناتۋ سىندى كوپتەگەن شارا جوسپارلانعان.
«وسى تەاترعا باسشىلىققا كەلگەندە جاڭا عيماراتتى ارالادىم. سوندا وسى زالدى كورىپ, كوز الدىما سپەكتاكل ويناعانى ەلەستەدى. سودان كەيىن ءبازىلدىڭ ءوزى بالالاردى جيناپ الىپ, جاڭا قويىلىمدارعا دايىندالىپ ءجۇر ەكەن. «بولام دەگەن بالانىڭ بەتىنە قاقپا, بەلىن بۋ» دەيدى. سول جاستارعا مۇمكىندىك بەرۋ ءۇشىن ەكسپەريمەنتالدى زەرتحانا اشىپ جاتىرمىز. بۇل عيماراتتاعى نەگىزگى ەكى زالىمىزدان كەيىنگى ءۇشىنشى ساحنا بولىپ وتىر. ارينە, مۇنداي جوبالار جەر-جەردە اشىلىپ جاتىر. بىراق ۇلكەن مەملەكەتتىك تەاتر ىشىنەن لابوراتوريا ءبىرىنشى رەت قولعا الىنۋدا. مۇنى كوپفۋنكتسيالى زال دەپ اتاۋعا بولادى. قالاي ەركىڭە باعىندىرىپ, قانداي فورماتتا قويىلىم قويۋدى ءوزىڭ شەشەسىڭ», دەدى تەاتردىڭ كوركەمدىك جەتەكشىسى, قازاقستاننىڭ ەڭبەك سىڭىرگەن قايراتكەرى قۋاندىق قىستىقباي جۋرناليستەرگە ارنالعان ءباسپاسوز كونفەرەنتسياسىندا.
تاعى ءبىر ەرەكشەلىگى, Qalleki لابوراتورياسى – ەلوردالىقتارعا ارنالعان العاشقى كەشكى تەاتر. بۇل دا جاستاردىڭ كەشكى ۋاقىتىن تەاتردا وتكىزۋى ءۇشىن جاسالعان ارەكەت. مۇندا تەك قويىلىمدار عانا ەمەس, دراماتۋرگتەردىڭ پەسالارىن تالقىلاۋ, اقىندار كەشى, اۆتورلىق اندەر كەشى سىندى ءتۇرلى شارالاردى وتكىزۋگە بولادى. بيلەتتەرى ونلاين ساتىلادى.
«قوعامدىق ورىنداردا ءوز زامانداستارىممەن سويلەسكەندە, «تەاترعا نەگە كەلمەيسىڭ؟» دەگەن سۇراققا «ماعان قىزىق ەمەس» دەگەن جاۋاپتار ەستيتىنمىن. سوندىقتان, بۇگىنگى قويىلىمدا دا ءوز زامانداستارىمىزدىڭ پروبلەماسىن قوزعاۋعا تىرىستىق. سپەكتاكلدە 9 اكتەر وينايدى. بارلىعى – قاللەكي تەاترىنىڭ جاستارى. وندا العاشقى ماحاببات, ادام بويىنداعى سەزىمدەر تۋرالى ايتىلادى», دەيدى اكتەر, رەجيسسەر ءبازىل سۇلتانعازى.
