بۇعان دەيىن كوكتال اۋىلىنىڭ تۇرعىندارى وزەننەن قاۋىپسىز ءوتۋ ءۇشىن ءوز كۇشتەرىمەن كوپىر سالىپ العانى تۋرالى اقپارات تاراعان بولاتىن. احات راقىشەۆ يگى ءىستىڭ باسىن باستاپ, قولعابىس ەتكەندىكتەن «قازاقستاننىڭ 100 جاڭا ەسىمى» جوباسىندا جەڭىمپاز اتانىپ وتىر. ال احات بۇل جەڭىسى تۋعان اۋىلىنىڭ ورتاق تابىسى ەكەنىن ايتادى.
«نەگىزگى ماماندىعىم – مۇعالىم. اۋىلعا كوپىر سالۋ كەرەكتىگى كوپتەن بەرى ايتىلىپ جۇرگەن. سودان سىنىپتاستارىمىزبەن مەكتەپ بىتىرگەنىمىزگە 20 جىل بولعانىن ەرەكشە ءبىر ىسپەن ەستە قالدىرساق دەپ كەلىستىك. 30 جىل بۇرىنعى تۇلەكتەر دە وسى يدەياعا اتسالىستى. كوپىر قۇرىلىسىنا نەگىزگى قاراجاتتى وسى ەكى توپ شىعاردى. حالىق تا قولىندا بارىمەن ءبولىستى. ال مەن بالالارعا سىزۋ پانىنەن ساباق بەرەتىن بولعاندىقتان, كوپىردىڭ سىزباسىن جوبالاۋ ماعان جۇكتەلدى», دەيدى احات راقىشەۆ.
ونىڭ ايتۋىنشا, كوپىر سالۋ ارقىلى اۋىلدىڭ ءبىر ماسەلەسى شەشىلگەن.
«بۇل ىستە ءوزىمىزدىڭ اۋىلدىڭ اكىمى جاقسى قولداۋ ءبىلدىردى. قازىر كوپىر ەل يگىلىگىنە جۇمىس ىستەپ تۇر. ەندى سونىڭ قۇجاتىن زاڭداستىرىپ, قاۋىپسىز قىزمەت كورسەتۋىن پىسىقتاپ جاتىرمىز. بۇل جوباعا اتسالىسقان ءاربىر اۋىلداسىم «100 جاڭا ەسىم» جەڭىمپازى اتانۋعا لايىق. بۇل بايقاۋداعى مەنىڭ جەڭىسىم – بۇكىل اۋىلىمنىڭ جەڭىسى», دەيدى احات راقىشەۆ.
