سۋرەتشى كەنەبىندە تاۋەلسىزدىك جەتىستىكتەرى, قالا مەن اۋىل ءومىرى, تۋعان ولكە تابيعاتى, قازاق ولكەسىنەن تابىلعان تاڭعاجايىپ جادىگەرلەر بەينەلەنگەن. اتالعان كورمە «قازاقستان رەسپۋبليكاسى تاۋەلسىزدىگىنىڭ 30 جىلدىعى: وتكەنگە قاراپ بولاشاققا سەنىمدى قادام باسۋ» تاقىرىبىمەن وربىگەن رەسپۋبليكالىق دوڭگەلەك ۇستەل اياسىندا تانىستىرىلدى. كارانتين تالاپتارىن ساقتاۋ ماقساتىندا ءىس-شاراعا ۇلتتىق ارحيۆ, قاراعاندى وبلىسىنىڭ جانە نۇر-Cۇلتان, الماتى قالاسى مەملەكەتتىك ءارحيۆىنىڭ ماماندارى, عالىمدار مەن تاريحشىلار, ماگيسترانتتار ونلاين-وفلاين ارالاس فورماتىندا قاتىستى. جيىندى اشقان ارحيۆ ديرەكتورى بايان جۇماتاەۆا تاۋەلسىزدىكتىڭ 30 جىلدىعى بولاشاققا تىڭ سەرپىنمەن قادام باسۋ ءۇشىن وتكەنگە تاعى ءبىر مارتە ورالا وتىرىپ, جەتىستىكتەرىمىز بەن ارمان-ماقساتتارىمىزدى ايقىندايتىن كەزەڭ دەپ اتاپ ءوتتى.
«تاۋەلسىزدىك جىلدارىندا قازاقستاندا قوعامنىڭ مادەني ومىرىندە, تاريحي سانانى جاڭعىرتۋ جولىندا كوپتەگەن ەلەۋلى ءىس-شارالار اتقارىلدى. اسىرەسە ءتول تاريحىمىزعا قاتىستى رۋحاني مۇرالارىمىزدى جيناستىرۋ مەن زەردەلەۋدە وتاندىق ارحيۆتەر ءبىرتالاي جەتىستىكتەرگە قول جەتكىزدى. الىس-جاقىن شەتەلدىك ارحيۆتەردەن قازاق تاريحىنا قاتىستى قۇجاتتاردى ەلگە اكەلۋ جۇمىستارى «ارحيۆ – 2025» باعدارلاماسى اياسىندا ءالى دە ءوز جالعاسىن تابۋدا. قۇجاتتاردى تسيفرلى فورماتقا كوشىرۋ جۇمىستارى دا كۇن تارتىبىنەن تۇسكەن جوق. شىعارماشىل تۇلعالار, سونىڭ ىشىندە قىلقالام شەبەرلەرى تاۋەلسىزدىك تاقىرىبىن تەبىرەنە جىرلادى. ەلدىك رۋحتىڭ ءۇنىن جەتكىزەتىن تۋىندىلار حالىقتىق مۇراعا اينالدى. كونفەرەنتسيا بارىسىندا تۇساۋى كەسىلىپ وتىرعان سۋرەت كورمەسى ءجۇمادىلحان كەرىمبەكتىڭ شىعارماشىلىق الەمىنەن عانا ەمەس, تاۋەلسىزدىك يگىلىكتەرىنەن دە سىر شەرتەدى», دەيدى ورتالىق مەملەكەتتىك عىلىمي-تەحنيكالىق قۇجاتتاما ءارحيۆىنىڭ ديرەكتورى بايان جۇماتاەۆا.
دوڭگەلەك ۇستەل اياسىندا شىمىلدىعىن تۇرگەن كورمەگە قاتىسۋشىلار رەسپۋبليكاداعى ارحيۆ ءىسىنىڭ جەتىستىكتەرى, پەرسپەكتيۆالارى مەن وزەكتى ماسەلەلەرى, تاريحي سانانى جاڭعىرتۋ جولىنداعى ەل ارحيۆتەرىنىڭ ءرولى تۋرالى باياندامالار وقىپ, وي-پىكىرلەرىن ورتاعا سالدى. ءىس-شارا اياسىندا كوپشىلىك نازارىنا «تاۋەلسىزدىك – تۇعىرىم» تاقىرىبىندا ارحيۆ قۇجاتتارى نەگىزىندە دايىندالعان بەينەلەۋ ونەر مۇرالارى ۇسىنىلدى.
الماتى
