پرەزيدەنت بولىپ سايلانعانىنا 100 كۇن تولۋ قارسانىندا دجو بايدەن جالپى سوماسى 4 ملرد اقش دوللارى بولاتىن جوسپار ۇسىندى. ساراپشىلار مۇنداي كولەمدى ءارى قوماقتى قارجى تالاپ ەتەتىن جوسپار 1960-جىلداردان بەرى بولماعانىن ايتادى.
بايدەننىڭ ءوزى مۇنى «امەريكا ۇرپاعىنا جۇمسالاتىن ينۆەستيتسيا» دەپ اتادى. دەگەنمەن, بۇل زاڭدى كۇشىنە ەنبەس بۇرىن كونگرەستە قىزۋ تالقىلانباق. ويتكەنى پالاتاداعى رەسپۋبليكاشىلار سالىقتىڭ ءوسۋى مەن مەملەكەتتىك شىعىندى كوبەيتۋ ماسەلەسىن قولداۋى ەكىتالاي.
سونىمەن, دجو بايدەننىڭ ۇسىنىسى قانداي؟ پرەزيدەنت ءوز سوزىندە «امەريكا ءۇشىن كۇش بىرىكتىرەتىن جانە ەلدەگى 1 پايىزداردىڭ ءوز تابىسىن جاسىرماي, ورتاعا سالاتىن كەزى كەلدى», دەدى. جاڭا جوسپار قوعامدىق كولىككە دە ينۆەستيتسيا تارتۋدى قاراستىرادى. وسىلايشا ۇلكەن اۆتوجولدار مەن كوپىرلەردى جاقسارتۋ قاراستىرىلماق.
بايدەن ودان ءارى جاھاندىق كليمات ماسەلەسىنىڭ دە نازاردان تىس قالماعانىن ايتتى. ول توقپەن جۇرەتىن كولىكتەر شىعارۋدا اقش-تىڭ نەگە كەنجە قالعانىن تۇسىنبەيتىنىن ءبىلدىردى.
اقش وتباسى جوسپارىنا 1,8 ترلن دوللار جۇمساماق. ونىڭ شەڭبەرىندە 3 پەن 4 جاس ارالىعىنداعى بالالاردىڭ وقۋىن تەگىن ەتۋ, وتباسى مۇشەلەرىنىڭ تولەنەتىن دەنساۋلىق دەمالىسىن الۋدى قامتاماسىز ەتۋ, كوللەدجگە تۇسەردە تولەيتىن تولەمدى الىپ تاستاۋ, پاندەميا كەزىندە سالىقتان بوساتۋ كوزدەلىپ وتىر.
