جۋىردا تۇركىستان وبلىسىنداعى ادەپ جونىندەگى كەڭەستىڭ كەزەكتى وتىرىسىندا بىرقاتار اۋىل اكىمدەرىنە قاتىستى ماسەلە قارالدى.
حانتاعى اۋىلى اكىمى اپپاراتىنىڭ باس مامانى مەملەكەتتىك قىزمەت ىستەرى اگەنتتىگىنىڭ تۇركىستان وبلىسى بويىنشا دەپارتامەنتى باسشىسى ا.ءشىلمانوۆتىڭ قابىلداۋىندا بولىپ, ءوز قۇقىقتارىنىڭ بۇزىلعاندىعى تۋرالى ارىزدانعان. سول ارىز بويىنشا دەپارتامەنت تاراپىنان جوسپاردان تىس تەكسەرۋ جۇمىستارى جۇرگىزىلىپ, ءوز قۇزىرەتىندە بولماسا دا شتاتتىق قۇرىلىمدى نەگىزسىز بەكىتكەن, قىزمەتشىلەردىڭ ەڭبەك ءوتىلى دۇرىس ەسەپتەلمەگەن, قىزمەتتىك تەرگەپ-تەكسەرۋ زاڭناماعا سايكەس جۇرگىزىلمەگەنى سىندى بىرقاتار زاڭ بۇزۋشىلىقتار انىقتالعان. تەكسەرۋ قورىتىندىسىمەن نۇسقاما ەنگىزىلىپ, اكىمنىڭ 10 وكىمىنىڭ جانە ءتيىستى كوميسسيانىڭ حاتتاماسىنىڭ كۇشى جويىلىپ, مەملەكەتتىك قىزمەتشىنىڭ قۇقىعى قالپىنا كەلتىرىلدى. ادەپ جونىندەگى كەڭەس شەشىمىمەن حانتاعى اۋىلىنىڭ اكىمىنە «قىزمەتىنە تولىق سايكەس ەمەستىگى تۋرالى ەسكەرتۋ» تۇرىندەگى جازا قولدانۋ ۇسىنىلدى.
ءدال وسىنداي تارتىپتىك جازانى شەشىمدەردى دايىنداۋ مەن قابىلداۋ كەزىندە زاڭدى تۇلعاعا قۇقىققا سىيىمسىز قولداۋ كورسەتكەنى ءۇشىن سوزاق اۋدانى جارتىتوبە اۋىلدىق وكرۋگىنىڭ اكىمىنە دە قولدانۋ ۇسىنىلدى. اكىم كەلىسىمشارتتا كورسەتىلگەن جۇمىستاردىڭ تولىق ورىندالماعانىنا قاراماستان, مەردىگەرگە قارجىنى اۋدارعان. ال جەتىساي اۋدانىنىڭ تۇرعىن ءۇي-كوممۋنالدىق شارۋاشىلىق ءبولىمىنىڭ باسشىسى مەملەكەتتىك ساتىپ الۋ تۋرالى شارت بويىنشا اقشا قاراجاتىن يگەرۋ مەن ءبولۋدى توقتاتا تۇرۋ جونىندە سوتتىڭ ۇيعارىمىنا قاراماستان ءونىم بەرۋشىگە مەملەكەت قاراجاتىن اۋدارعانى انىقتالعان. اتالعان لاۋازىمدى تۇلعاعا ادەپ جونىندەگى كەڭەس شەشىمىمەن «قاتاڭ سوگىس» تۇرىندەگى جازا قولدانۋ ۇسىنىلدى.
