قوعام • 29 ءساۋىر، 2021

«Nur Otan»-دا ءادىل سوت جۇيەسى تالقىلاندى

«Nur Otan» جانىنداعى قۇقىقتىق كەڭەس وتىرىسىندا قىلمىستىق سوت ءىسىن جۇرگىزۋدىڭ جاڭا ءۇش بۋىندى مودەلىن ەنگىزۋ جونىندەگى زاڭ جوباسى تالقىلاندى، دەپ حابارلايدى Egemen.kz.

Marzhan Tileubekova

پارتيانىڭ ءباسپاسوز قىزمەتىنىڭ ايتۋىنشا، كەڭەستىڭ باستى مىندەتى – ء«ادىل قۇقىق قورعاۋ جۇيەسى» باعىتى بويىنشا سايلاۋالدى ۋادەلەردى ورىنداۋ، ونىڭ ىشىندە زاڭ جوبالارى مەن قولدانىستاعى زاڭنامانى جەتىلدىرۋ بويىنشا ۇسىنىستاردى ازىرلەۋ. ەلباسى، پارتيا ليدەرى نۇرسۇلتان نازارباەۆتىڭ تاپسىرماسى بويىنشا 2025 جىلعا دەيىنگى ءتيىستى جول كارتاسى ازىرلەندى.

باس پروكۋروردىڭ ءبىرىنشى ورىنباسارى بەرىك اسىلوۆ بۇدان كەيىن جاڭا ءۇش بۋىندى مودەل اياسىندا ادامدى كۇدىكتى دەپ تانۋ، ءىس-ارەكەتتى ايقىنداۋ جانە باسقا دا سول سياقتى شەشىمدەردى پروكۋرور قابىلدايتىنىن ايتتى. سونىمەن قاتار، ەندى تەرگەۋشىلەردىڭ ورنىنا ايىپتاۋ اكتىسىن دايىنداۋدى دا پروكۋرورلارعا جۇكتەۋ ۇسىنىلادى.

ءوز كەزەگىندە كەڭەس مۇشەسى قايىربەك سۇلەيمەنوۆ وكىلەتتىكتەردى قايتا بولۋگە بايلانىستى پروكۋراتۋرا جۇيەسىنە جۇمىستىڭ ارتىپ كەلە جاتقانىن ەسكەرە وتىرىپ، باستاپقى كەزدە تەك اۋىر جانە اسا اۋىر قىلمىستار بويىنشا عانا ايىپتاۋ اكتىسىن جاساۋدى تاپسىرۋدى ۇسىندى.

قۇقىقتىق كەڭەستىڭ توراعاسى، پارلامەنت ءماجىلىسىنىڭ دەپۋتاتى قانات ءمۋسيننىڭ پىكىرىنشە، قىلمىستىق سوت ءىسىن جۇرگىزۋدىڭ جاڭا مودەلى سوت تورەلىگىن ىسكە اسىرۋدىڭ پاراديگماسىن تۇبەگەيلى وزگەرتەدى.

«قازاقستان بۇگىندە ازاماتتاردىڭ كونستيتۋتسيالىق قۇقىقتارى مەن بوستاندىقتارىن قورعاۋ، سوت تورەلىگىنىڭ قولجەتىمدىلىگى مەن اشىقتىعىن قامتاماسىز ەتۋ، سونداي-اق ەكونوميكالىق ىنتىماقتاستىق جانە دامۋ ۇيىمى ەلدەرىنىڭ جوعارى ستاندارتتارىن ەنگىزۋ جانە الەمنىڭ دامىعان 30 ەلىنىڭ قاتارىنا كىرۋ مىندەتتەمەسىن راستاۋ ءۇشىن ءوزىنىڭ قىلمىستىق ءىس جۇرگىزۋ زاڭناماسىن جەتىلدىرۋدە. بۇگىندە ەكونوميكالىق ىنتىماقتاستىق جانە دامۋ ۇيىمى جەتەكشى ەلدەرىنىڭ تاجىريبەسى ىشكى ىستەر ورگاندارىنىڭ، پروكۋراتۋرا مەن سوتتىڭ ءوزارا ءىس-قيمىلىنىڭ كلاسسيكالىق مودەلى قانداي بولۋعا ءتيىس ەكەنىن كورسەتىپ وتىر. قىلمىستىق قۋدالاۋ ورگاندارى، پروكۋراتۋرا جانە سوت اراسىنداعى سوتقا دەيىنگى تەرگەۋ ساتىسىنداعى ءوزارا ءىس-قيمىل ازاماتتاردىڭ كونستيتۋتسيالىق قۇقىقتارى مەن بوستاندىقتارىنىڭ ءتيىمدى جۇمىسى مەن قورعالۋىن قامتاماسىز ەتەدى»، دەدى قانات مۋسين.

ەسكە سالا كەتەيىك، وتكەن جىلدىڭ 1 قىركۇيەگىندە مەملەكەت باسشىسى قاسىم-جومارت توقاەۆ قازاقستان حالقىنا جولداۋىندا پوليتسيا، پروكۋراتۋرا جانە سوت اراسىندا وكىلەتتىكتەردى ناقتى بولە وتىرىپ، سوت تورەلىگىنىڭ ءۇش بۋىندى جۇيەسىن ەنگىزۋدى تاپسىرعان بولاتىن.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز