– بايقاۋ يدەياسىمەن بارلىعىمىز تانىسپىز, دەسە دە ساحنانىڭ ارعى جاعىنداعى اتقارىلىپ جاتقان جۇمىستان حابارىمىز از. وسى جىلى بالالاردى ىرىكتەۋ كەزەڭىنە شاقىرۋ ناۋقانى قالاي ءوتىپ جاتىر؟
– بارلىق بالالاردى, ولاردىڭ اتا-انالارى مەن ۇستازدارىن جاڭا ماۋسىمنىڭ باستالۋىمەن شىن جۇرەكتەن قۇتتىقتايمىز! شىن مانىندە, تۇراقتى نەگىزدە جۇزەگە اسىرىلاتىن جوبالار جىل سايىن كوپ كۇش پەن شىعارماشىلىقتى قاجەت ەتەدى. قاشىقتان ىرىكتەۋ كەزەڭىنىڭ باستالۋى تۋرالى كەڭىنەن اقپاراتتاندىرۋ ماقساتىندا, ءبىرىنشى كەزەكتە, وڭىرلەردىڭ اكىمدىكتەرىمەن, جالپى ورتا ءبىلىم بەرەتىن وقۋ ورىندارىمەن, مامانداندىرىلعان مۋزىكا مەكتەپتەرىمەن ىنتىماقتاستىق تۋرالى كەلىسىمگە قول جەتكىزىلدى. قوسىمشا تانىمال جاڭالىقتار پورتالدارىندا جانە مەديا-رەسۋرستاردا ونلاين-كاستينگكە قاتىسۋ شارتتارى, سونداي-اق كونكۋرستى وتكىزۋدىڭ نەگىزگى كەزەڭدەرى جازىلعان ماقالالار ورنالاستىرىلدى. رەسپۋبليكالىق تەلەارنالاردىڭ ەفيرىندە جارناما فورماتىندا انونستىق روليكتەر كورسەتىلدى. وسىلايشا, باستاپقى كەزەڭدە جۇمىستىڭ نەگىزگى بولىگى اتقارىلدى.
– شىنىندا دا, وسىنداي اۋقىمدى كونكۋرستى وتكىزۋ ءۇشىن مىقتى ىرگەتاس قالاۋ قاجەت. التىنشى ماۋسىمنىڭ ىرىكتەۋ كەزەڭىندە قاي ايماقتار بەلسەندى؟
– بۇگىنگى تاڭدا 1 562-دەن استام ءوتىنىم قابىلدانىپ, وڭدەلدى. ءبىز اتا-انالارعا, بالالارعا جانە ولاردىڭ مۇعالىمدەرىنە ءوتىنىش بەرۋگە دەگەن بايىپتى جانە جاۋاپتى كوزقاراسى ءۇشىن وتە ريزامىز. بيىل جاس تالانتتاردىڭ شىعارماشىلىعىن جەكە-جەكە ماقتاۋعا تۇرارلىق. كەيبىر بالالار تەلەديداردا كورسەتۋگە بولاتىن دايىن كليپتەردى جىبەرەدى. ىرىكتەۋ كەزەڭىنىڭ قاتىسۋشىلارى ارتىستىك, بي شەبەرلىگى, ساحنالىق بەينەلەردىڭ جارقىن كورىنىستەرى بەينەوتىنىمدەر دەڭگەيىن جوعارى كوتەردى. وڭىرلەر بويىنشا كوشباسشىلار ماڭعىستاۋ, الماتى جانە باتىس قازاقستان وبلىستارى, نۇر-سۇلتان مەن شىمكەنت قالالارى الدىڭعى ورىندا. تانىمال كومپوزيتسيالارعا كەلەتىن بولساق, ءبىزدىڭ جاس ورىنداۋشىلارىمىزدىڭ تاڭداۋى ءار- ءتۇرلى. بالالار نەگىزىنەن باتىس ەستراداسىنىڭ تانىمال حيتتەرىن, قازاق حالىق اندەرىن ورىندايدى جانە ءبىزدىڭ بايقاۋىمىزدىڭ اۆتورلىق اندەرى ۇمىتكەرلەر اراسىندا تانىمال بولعانى قۋانتادى.
– تاعى ءبىر ماسەلە, ءبىز الەۋمەتتىك جەلىلەردىڭ ءرولى مەن قاشىقتان ارالاسۋ مۇمكىندىگىنىڭ ارتقانىن تۇسىندىك. وسى فورماتتا بالالارمەن قانداي جۇمىس جۇرگىزىلەدى؟
– ءيا, جاس دوستارىمىز سياقتى ءبىز دە الەۋمەتتىك جەلىلەردە بەلسەندىمىز. بۇل ۇنەمى جۇرگىزىلىپ جاتقان جۇمىس. تۇراقتى نەگىزدە, ءار اپتا سايىن Instagram-داعى تىكەلەي ەفيرلەر ارقىلى ءبىز رەپەرتۋاردى, ۆوكالدى دامىتۋ جاتتىعۋلارىن تاڭداۋعا كومەك كورسەتۋ ماقساتىندا بايقاۋدىڭ مۋزىكالىق پروديۋسەرى دانيار وتەگەنمەن كەزدەسۋلەر وتكىزەمىز.
– ال ۇيىمداستىرۋشىلار وسى جولعى ماۋسىمنان قانداي ءۇمىت كۇتەدى جانە بالالارعا قانداي جاڭالىقتارىڭىز بار؟
– ءبىرىنشى كەزەكتە, ءبىز قاتىسۋعا ءوتىنىم جىبەرگەن ءار بالانى ماقتان تۇتاتىنىمىزدى ايتقىم كەلەدى. ءبىز بالالاردىڭ تالانتى مەن باتىلدىعىنا تاڭدانامىز. بالالارعا ارتار ءۇمىت نەمەسە قانداي دا ءبىر مىندەتتەمەلەر جوق. مۇمكىن سوندىقتان بالالار ءوز قابىلەتىن جان-جاقتى كورسەتىپ, ەمىن-ەركىن ءجۇرىپ, ءبىزدى قۋانتا بەرەتىن شىعار. مۇنداعى ماقساتىمىز – ءار بالاعا نازار اۋدارۋ, شىعارماشىلىعىن شىڭداۋ, بالالاردىڭ ارمانىن ورىنداۋ. ال التىنشى ماۋسىمنىڭ فيناليست-بالالارىن ۆوكال, اكتەرلىك شەبەرلىك, حورەوگرافيا بويىنشا جەكە ساباقتار كۇتىپ تۇر. ولارمەن 7-9 قازان ارالىعىندا نۇر-سۇلتان قالاسىندا وتەتىن فينالدىق كونتسەرتتىك باعدارلامالاردا ونەر كورسەتۋ ءۇشىن قايتالانباس جانە ەرەكشە ساحنالىق وبراز جاساۋ ءۇشىن رەجيسسەرلەر, گرافيكا جانە جارىق بويىنشا سۋرەتشىلەر, ديزاينەرلەر, ستيليستەر جۇمىس ىستەيتىن بولادى. ايتپاقشى بيىل بالالار مۋزىكالىق توپتىڭ سۇيەمەلدەۋىمەن مۋزىكالىق شىعارمالاردى ورىندايدى. ىرىكتەۋ كەزەڭىنىڭ ءاربىر قاتىسۋشىسى اتاۋلى ديپلومدار الادى, ال فيناليستەر باعالى سىيلىقتارمەن ماراپاتتالادى. «بالا داۋىسى» جەڭىمپازى كونكۋرستىڭ العاشقى كۇندەرىنەن باستاپ تاعايىندالعان اتاۋلى ءبىلىم بەرۋ گرانتىنىڭ يەگەرى بولادى.
– اڭگىمەڭىز ءۇشىن كوپ راحمەت, تولعاناي! بارلىق «بالا داۋىسى» شىعارماشىلىق ۇجىمىنا ساتتىلىك تىلەيمىز!
اڭگىمەلەسكەن
ايا ءومىرتاي,
«Egemen Qazaqstan»
