سەناتتىڭ قارجى جانە بيۋدجەت كوميتەتىنىڭ توراعاسى ولگا پەرەپەچينا مەملەكەت باسشىسىنىڭ قازاقستان حالقىنا جولداۋىندا كۆازيمەملەكەتتىك سەكتوردىڭ قايتارىمىن ارتتىرۋدى نەگىزگى مىندەتتەردىڭ ءبىرى رەتىندە بەلگىلەگەنىن اتاپ ءوتتى.
«بۇگىنگى تاڭدا كۆازيمەملەكەتتىك سەكتور جارعىلىق كاپيتالدى تولىقتىرۋ, بيۋدجەتتەن نەسيەلەۋ جانە ت.ب. ارقىلى ۇلتتىق قور مەن مەملەكەتتىك بيۋدجەتتەن قانداي تۇردە بولسا دا جىل سايىن دوتاتسيالانىپ كەلەدى. ال سوڭعى جىلداردا شىعىندار, رەنتابەلدىلىكتىڭ تومەندەۋى جانە مەنشىك يەسى – مەملەكەتكە تولەنەتىن ديۆيدەندتەر كۆازيمەملەكەتتىك سەكتوردىڭ جەكەلەگەن سۋبەكتىلەرى قىزمەتىنىڭ ناتيجەلەرى بولىپ تابىلادى», دەدى ولگا پەرەپەچينا.
رەسپۋبليكالىق بيۋدجەتتىڭ اتقارىلۋىن باقىلاۋ جونىندەگى ەسەپ كوميتەتى كۆازيمەملەكەتتىك سەكتور كومپانيالارىندا جۇرگىزىلگەن اۋديت قورىتىندىلارى تۋرالى سەناتورلاردى حاباردار ەتتى. باياندامادا باسقارۋ مەنەدجمەنتىنىڭ تيىمدىلىگى ءالى دە جەتكىلىكسىز ەكەندىگى ءجيى كەزدەسىپ قالاتىنى ايتىلدى. سونىمەن قاتار وسى سەكتوردىڭ مەملەكەتتىك قارجىلاندىرۋ كوزدەرىنە تاۋەلدى بولۋ باسىمدىعى بۇرىنعىشا ساقتالىپ وتىر.
ۇلتتىق ەكونوميكا مينيسترلىگىنىڭ وكىلدەرى كۆازيمەملەكەتتىك سەكتوردىڭ قىزمەتىن, مىندەتتەرى مەن ولشەمشارتتارىن ناقتى اجىراتۋ, قارجى ءتارتىبىن جاقسارتۋ, مەملەكەتتىڭ ەكونوميكاداعى ۇلەسىن تومەندەتۋ, مونيتورينگ پەن باعالاۋدىڭ تيىمدىلىگىن ارتتىرۋ, سونداي-اق كورپوراتيۆتىك باسقارۋدى كۇشەيتۋ قاجەت دەپ ەسەپتەيدى.
دوڭگەلەك ۇستەل بارىسىندا ۇلتتىق ەكونوميكا, قارجى مينيسترلىكتەرىنىڭ وكىلدەرى جانە سەنات جانىنداعى جاس ساراپشىلار كلۋبىنىڭ مۇشەلەرى كۆازيمەملەكەتتىك سەكتوردىڭ بيۋدجەت قارجىسىن پايدالانۋدىڭ تيىمدىلىگىن ارتتىرۋ جونىندە بايانداما جاسادى.
سەناتورلار كەزدەسۋ قورىتىندىسىندا كۆازيمەملەكەتتىك سەكتور سۋبەكتىلەرى قىزمەتىنىڭ ستراتەگيالىق دامۋىندا, قارجى-شارۋاشىلىق قىزمەتتى جۇزەگە اسىرۋ مەن كورپوراتيۆتىك باسقارۋدا كومپانيالاردىڭ ناتيجەلى ىسىنە تەرىس اسەر ەتەتىن جانە جەدەل شەشۋدى تالاپ ەتەتىن بىرقاتار جۇيەلى پروبلەمالار بار ەكەنىن ايتتى.
