كوروناۆيرۋس • 27 ءساۋىر، 2021

ەلوردالىقتار QazVac ۆاكتسيناسىن بەلسەندى قابىلداۋدا

ەلوردانىڭ مەديتسينالىق مەكەمەلەرىنىڭ ەگۋ پۋنكتەرىندە قالا تۇرعىندارى وتاندىق QazVac ۆاكتسيناسىن بەلسەندى تۇردە الىپ جاتىر، دەپ حابارلايدى Egemen.kz قالا اكىمدىگىنىڭ رەسمي سايتىنا سىلتەمە جاساپ.

Marzhan Tileubekova

مىسالى «ابۋ-دابي پلازا» ساۋدا ويىن-ساۋىق ورتالىعىنىڭ ۆاكتسينا ەگۋ پۋنكتى 3 بولمە جانە كۇتۋ زالىنان تۇرادى. ەكپەنى سالدىرۋعا كەلگەن ادام ەڭ الدىمەن دارىگەر قاراۋىنان وتەدى.

دارىگەر پاتسيەنتتىڭ جاعدايىن تەكسەرىپ، دەنساۋلىعىنا قاتىستى بىرنەشە سۇراق قويادى. ارتىنشا تاماعىن، قان قىسىمى مەن دەنە قىزۋىن ولشەيدى. پاتسيەنتتىڭ ءحالى بارلىق پارامەترگە ساي كەلسە ۆاكتسينا سالاتىن بولمەگە كىرەدى.

QazVac برەندىمەن شىعارىلاتىن QazCovid-In وتاندىق ۆاكتسيناسى دۇنيەجۇزىلىك دەنساۋلىق ساقتاۋ ۇيىمىنىڭ تىزىلىمىنە ەنگىزىلگەن. ول بيولوگيالىق قاۋىپسىزدىك پروبلەمالارىنىڭ عىلىمي-زەرتتەۋ ينستيتۋتىنىڭ بازاسىندا جاسالعان. ۆاكتسينا كوروناۆيرۋستىق ينفەكتسياعا قارسى تۇراقتى يممۋنيتەتتى قالىپتاستىرادى. ونىڭ قاۋىپسىزدىگى مەن باسقا ۆاكتسينالارعا قاراعاندا ارتىقشىلىعى دالەلدەندى. QazVac ۆاكتسينااسسوتسياتسيالانعان اۋرۋلاردى تۋدىرمايدى.

ەكى كومپونەنتتى QazVac ۆاكتسيناسىنىڭ تيىمدىلىگى كلينيكالىق سىناقتاردان كەيىن 96%-دى كورسەتكەن. دەنساۋلىق ساقتاۋ ءمينيسترىنىڭ مالىمەتىنشە، بۇگىنگى كۇنى ءاربىر جيىرماسىنشى وتانداسىمىز كورونوۆيرۋسقا قارسى ۆاكتسينا سالدىرعان. وتاندىق ۆاكتسينانىڭ ارتىقشىلىقتارىنىڭ ءبىرى ساقتاۋ شارتتارى. ەگەر «Sputnik V» ۆاكتسيناسى توڭازىتقىشتا -18 گرادۋس تەمپەراتۋرادا ساقتالسا، QazVac ۆاكتسيناسى 2-8 گرادۋس تەمپەراتۋرادا ساقتالادى.

«مەن ارنايى وسى قازاقستاندىق ۆاكتسينانى كۇتىپ، بۇگىن سالدىردىم. مەنىڭ ويىمشا، عالىمدار، بيولوگيالىق قاۋىپسىزدىك وكىلدەرى QazVac ۆاكتسيناسىن وتە جوعارى دەڭگەيدە جاساعان. سالدىرعان سوڭ ەشقانداي كەرى اسەرىن بايقامادىم. ءوزىمدى جاقسى سەزىنىپ تۇرمىن»، دەدى استانالىق ارىن ورساريەۆ.

بۇگىندە ەلوردادا 100-گە جۋىق ەگۋ پۋنكتى جۇمىس ىستەيدى. ەلوردالىقتاردى ۆاكتسيناتسيالاۋ ءۇشىن بارىنشا جاعداي جاسالعان. سونىمەن قاتار «Mega Silk Way»، «كەرۋەن»، «حان شاتىر» سوو-لارىندا ەگۋ پۋنكتەرى اشىلعان. قالا تۇرعىندارى قاۋىپتى ۆيرۋسقا قارسى ۆاكتسيناتسيانى بەلسەندى قابىلداۋدا.

ايتا كەتەيىك، 27 ساۋىردەگى جاعداي بويىنشا ەلوردادا كوروناۆيرۋسقا قارسى 95 مىڭعا جۋىق ادام ەكپە سالدىرعان. ونىڭ ىشىندە قالا تۇرعىندارى مەن قوناقتارى، مادەنيەت جانە ونەر قايراتكەرلەرى دە بار

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز