سۋديا قانات دۇيسەمبيەۆ ەكس-باسشى بەرىك شارىپكە قاتىستى قىلمىستىق ءىس قر قىلمىستىق كودەكسىنىڭ 361-بابى, 4 ءبولىمى, 3-تارماعى (قىزمەتتىك وكىلەتتىكتەرىن اسىرا پايدالانۋ) جانە 287-بابى (قارۋ-جاراقتى, وق-دارىلەردى, جارىلعىش زاتتاردى زاڭسىز يەمدەنۋ, بەرۋ, ساتۋ, ساقتاۋ, تاسىمالداۋ نەمەسە الىپ ءجۇرۋ) بويىنشا قارالىپ جاتقانىن مالىمدەدى.
ايتا كەتەيىك, 9 ساۋىردە قر سىبايلاس جەمقورلىققا قارسى ءىس-قيمىل اگەنتتىگىنىڭ اسا ماڭىزدى ىستەر جونىندەگى تەرگەۋشىسى دانيار بيعايداروۆ سىبايلاس جەمقورلىققا قارسى قىزمەت «سك-فارماتسيا» جشس-ءنىڭ ەكس-باسشىسىنا قاتىستى قىلمىستىق ءىس بويىنشا تەرگەۋدى اياقتاعانىن حابارلاعان.
ال 21 ءساۋىر كۇنى سوت «سق-فارماتسيانىڭ» بۇرىنعى باسشىسى بەرىك شارىپكە قاتىستى ءىس بويىنشا الدىن الا تىڭداۋدا ايىپتالۋشىنى قاماۋدان بوساتۋدان باس تارتتى.
قاڭتاردا بەرىك شارىپكە قىزمەت بابىن اسىرا پايدالاندى دەگەن ايىپ تاعىلعاندىعى تۋرالى حابارلانعان, بىراق كەيىنىرەك ءىس سالاقتىق بابى بويىنشا قايتا قاراستىرىلدى. ياعني لاۋازىمدى تۇلعانىڭ ءوز قىزمەتىنە ۇقىپسىز قاراۋى, ادالدىق تانىتپاۋى بويىنشا.
ەسكە سالايىق, وتكەن جىلدىڭ 10 شىلدەسىندە «سق-فارماتسيا» باسقارما توراعاسى بەرىك ءشارىپ قىزمەتىنەن بوساتىلعان بولاتىن. ول توراعالىق قىزمەتكە 3 اي ۋاقىت بۇرىن عانا كەلگەن ەدى. ارتىنشا 14 تامىزدا باسقارمانىڭ بۇرىنعى توراعاسى بەرىك ءشارىپ ۇستالدى.
