ستانتسيوننىي كەنتى اكىمدىگىنىڭ مالىمەتىنشە, 24 ساۋىردە كارەردىڭ اينالاسىنداعى قۇرعاق ءشوپ ورتەنگەن. كەنت اكىمى ارداق تاسقىنباي ءورت شىققان جەرگە بارعان.
«كارەر ماڭىندا جۇرگەن ەر ادامدى كوردىم. باستاپقى دا ونى ءشوپتى ورتەپ جۇرگەن وسى كىسى دەپ ويلادىم. كەيىن ونى كەرىسىنشە دالا ءورتىن ءسوندىرىپ جۇرگەنىنە كوزىم جەتتى. ونىڭ ەكى ۇلى دا ۇستىندەگى سىرتقى كيىمىن شەشىپ اكەلەرىنە ءورتتى سوندىرۋگە كومەكتەستى», دەيدى كەنت اكىمى ا.تاسقىنباي.
انىقتالعانداي, كەنت تۇرعىنى ابسالەم قۇسمانعا ءورتتى سوندىرۋگە 11 جانە 12 جاستاعى ۇلدارى كومەكتەسكەن.
«مەن قويشىمىن. تۇسكى ۋاقىتتا وتاردىڭ باسىندا بالالارىمدى قالدىرىپ, ءوزىم ۇيگە تۇسكى اس ىشۋگە كەتتىم. ءبىر كەزدە ءتۇتىندى كورىپ, كەيىن قايتتىم. بارسام ءشوپ ورتەنىپ جاتىر ەكەن. بىردەن ءورتتى سوندىرۋگە كىرىستىم. الدىمەن ۇلدارىم, كەيىن كەنت اكىمى كەلىپ كومەكتەستى», دەيدى ابسالەم قۇسمان.
ايتا كەتەيىك, ءورت 300-400 شارشى مەتر اۋماققا جايىلعان. ءورتتىڭ تەز تارالۋىنا قاتتى جەل اسەر ەتكەن. ابىروي بولعاندا ءورت ءبىر جارىم ساعاتتىڭ ىشىندە ءسوندىرىلدى.
